ਵਾਸ਼ਿੰਗਟਨ, 20 ਜੁਲਾਈ (ਪੰਜਾਬ ਮੇਲ)- ਅਮਰੀਕਾ ਦੀ ਇਮੀਗ੍ਰੇਸ਼ਨ ਐਂਡ ਕਸਟਮਜ਼ ਐਨਫੋਰਸਮੈਂਟ ਏਜੰਸੀ ਆਈਸ ਵੱਲੋਂ ਮੈਡੀਕੇਡ ਨਾਲ ਸਬੰਧਤ ਉਹ ਜਾਣਕਾਰੀ ਨਿੱਜੀ ਡਾਟਾ ਵਿਸ਼ਲੇਸ਼ਣ ਕੰਪਨੀ ਪੈਲੈਂਟਿਰ ਨਾਲ ਸਾਂਝੀ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਜੋ ਏਜੰਸੀ ਨੂੰ ਕਥਿਤ ਤੌਰ ‘ਤੇ ਅਦਾਲਤ ਵੱਲੋਂ ਮਨਜ਼ੂਰ ਕੀਤੀ ਹੱਦ ਤੋਂ ਬਾਹਰ ਮਿਲੀ ਸੀ। ਨੈਸ਼ਨਲ ਪਬਲਿਕ ਰੇਡੀਓ ਦੀ ਰਿਪੋਰਟ ਅਨੁਸਾਰ ਇਹ ਖੁਲਾਸਾ ਸੰਘੀ ਅਦਾਲਤ ਵਿਚ ਜਮ੍ਹਾਂ ਕਰਵਾਏ ਗਏ ਨਵੇਂ ਦਸਤਾਵੇਜ਼ਾਂ ਰਾਹੀਂ ਹੋਇਆ ਹੈ।
20 ਤੋਂ ਵੱਧ ਡੈਮੋਕ੍ਰੇਟਿਕ ਰਾਜਾਂ ਦੇ ਅਟਾਰਨੀ ਜਨਰਲਾਂ ਵੱਲੋਂ ਚੱਲ ਰਹੇ ਮੁਕੱਦਮੇ ਵਿਚ ਦਾਇਰ ਕੀਤੀ ਗਈ ਅਰਜ਼ੀ ਵਿਚ ਕਿਹਾ ਗਿਆ ਹੈ ਕਿ ਸੰਘੀ ਸਰਕਾਰ ਵੱਲੋਂ ਪੇਸ਼ ਕੀਤੇ ਦਸਤਾਵੇਜ਼ਾਂ ਤੋਂ ਪੁਸ਼ਟੀ ਹੁੰਦੀ ਹੈ ਕਿ ਮੁਕੱਦਮਾ ਕਰਨ ਵਾਲੇ ਰਾਜਾਂ ਦਾ ਮੈਡੀਕੇਡ ਡਾਟਾ ਪੈਲੈਂਟਿਰ ਦੇ ਕਰਮਚਾਰੀਆਂ ਜਾਂ ਠੇਕੇਦਾਰਾਂ ਨਾਲ ਸਾਂਝਾ ਕੀਤਾ ਗਿਆ ਸੀ। ਇਹ ਰਾਜ ਮੈਡੀਕੇਡ ਜਾਣਕਾਰੀ ਨੂੰ ਇਮੀਗ੍ਰੇਸ਼ਨ ਕਾਰਵਾਈਆਂ ਲਈ ਵਰਤਣ ਵਾਸਤੇ ਸੈਂਟਰਜ਼ ਫਾਰ ਮੈਡੀਕੇਅਰ ਐਂਡ ਮੈਡੀਕੇਡ ਸਰਵਿਸਿਜ਼ ਅਤੇ ਆਈਸ ਵਿਚਕਾਰ ਹੋਏ ਡਾਟਾ ਸਾਂਝਾ ਸਮਝੌਤੇ ਨੂੰ ਚੁਣੌਤੀ ਦੇ ਰਹੇ ਹਨ।
ਪੈਲੈਂਟਿਰ ਵੱਲੋਂ ਤਿਆਰ ਕੀਤੀ ਗਈ ”ਐਨਹਾਂਸਡ ਲੀਡਜ਼ ਆਈਡੈਂਟੀਫਿਕੇਸ਼ਨ ਐਂਡ ਟਾਰਗੇਟਿੰਗ ਫਾਰ ਐਨਫੋਰਸਮੈਂਟ” ਨਾਮਕ ਐਪ, ਜਿਸ ਨੂੰ ਛੋਟੇ ਰੂਪ ਵਿਚ ”ਇਲੀਟ” ਕਿਹਾ ਜਾਂਦਾ ਹੈ, ਆਈਸ ਅਧਿਕਾਰੀਆਂ ਵੱਲੋਂ ਵਰਤੀ ਜਾਂਦੀ ਹੈ। ਇਹ ਪ੍ਰਣਾਲੀ ਨਕਸ਼ੇ ਉੱਤੇ ਉਨ੍ਹਾਂ ਗੈਰ-ਨਾਗਰਿਕਾਂ ਦੇ ਸੰਭਾਵੀ ਪਤੇ ਦਿਖਾਉਂਦੀ ਹੈ, ਜਿਨ੍ਹਾਂ ਖ਼ਿਲਾਫ਼ ਦੇਸ਼ ਨਿਕਾਲੇ ਦੀ ਕਾਰਵਾਈ ਕੀਤੀ ਜਾ ਸਕਦੀ ਹੈ। ਨਵੇਂ ਅਦਾਲਤੀ ਦਸਤਾਵੇਜ਼ਾਂ ਅਨੁਸਾਰ ਜਨਵਰੀ ਵਿਚ ਮੈਡੀਕੇਡ ਅਧਿਕਾਰੀਆਂ ਵੱਲੋਂ ਲੱਖਾਂ ਲੋਕਾਂ ਨਾਲ ਸਬੰਧਤ ਡਾਟਾ ਆਈਸ ਨੂੰ ਦਿੱਤਾ ਗਿਆ ਸੀ ਅਤੇ ਬਾਅਦ ਵਿਚ ਉਹ ਜਾਣਕਾਰੀ ਪੈਲੈਂਟਿਰ ਤੱਕ ਪਹੁੰਚੀ।
ਕੈਲੀਫੋਰਨੀਆ ਦੇ ਸੰਘੀ ਜੱਜ ਵਿਨਸ ਛਾਬਰੀਆ ਨੇ ਦਸੰਬਰ ਵਿਚ ਫ਼ੈਸਲਾ ਦਿੱਤਾ ਸੀ ਕਿ ਸਿਹਤ ਅਧਿਕਾਰੀ ਮੁਕੱਦਮੇ ਵਿਚ ਸ਼ਾਮਲ ਰਾਜਾਂ ਦੇ ਗੈਰ-ਕਾਨੂੰਨੀ ਇਮੀਗ੍ਰੇਸ਼ਨ ਦਰਜੇ ਵਾਲੇ ਕੁਝ ਵਿਅਕਤੀਆਂ ਦੇ ਘਰਾਂ ਦੇ ਪਤੇ, ਜਨਮ ਤਰੀਕਾਂ ਅਤੇ ਇਮੀਗ੍ਰੇਸ਼ਨ ਸਥਿਤੀ ਵਰਗੀ ਸੀਮਤ ਜਾਣਕਾਰੀ ਆਈਸ ਨਾਲ ਸਾਂਝੀ ਕਰ ਸਕਦੇ ਹਨ। ਪਰ ਬਾਅਦ ਵਿਚ ਇਹ ਸਾਹਮਣੇ ਆਇਆ ਕਿ ਜਨਵਰੀ ਵਿਚ ਦਿੱਤੇ ਗਏ ਡਾਟੇ ਵਿਚ ਅਦਾਲਤ ਵੱਲੋਂ ਨਿਰਧਾਰਤ ਹੱਦ ਤੋਂ ਵੱਧ ਜਾਣਕਾਰੀ ਸ਼ਾਮਲ ਸੀ।
ਇਸ ਖੁਲਾਸੇ ਤੋਂ ਬਾਅਦ ਜੱਜ ਨੇ ਮਈ ਵਿਚ ਆਈਸ ਅਤੇ ਮੈਡੀਕੇਡ ਅਧਿਕਾਰੀਆਂ ਵਿਚਕਾਰ ਡਾਟਾ ਸਾਂਝਾ ਕਰਨ ਦੀ ਪ੍ਰਕਿਰਿਆ ਅਸਥਾਈ ਤੌਰ ‘ਤੇ ਰੋਕ ਦਿੱਤੀ ਸੀ। ਆਈਸ ਨੂੰ ਗਲਤ ਤਰੀਕੇ ਨਾਲ ਪ੍ਰਾਪਤ ਕੀਤੀ ਜਾਣਕਾਰੀ ਮਿਟਾਉਣ ਦੇ ਹੁਕਮ ਵੀ ਦਿੱਤੇ ਗਏ ਸਨ। ਹੁਣ ਸੰਘੀ ਅਧਿਕਾਰੀਆਂ ਵੱਲੋਂ ਅਦਾਲਤ ਵਿਚ ਦਿੱਤੀ ਗਈ ਜਾਣਕਾਰੀ ਤੋਂ ਪਤਾ ਲੱਗਿਆ ਹੈ ਕਿ ਇਹ ਡਾਟਾ ਪੈਲੈਂਟਿਰ ਦੇ ਕਰਮਚਾਰੀਆਂ ਜਾਂ ਠੇਕੇਦਾਰਾਂ ਤੱਕ ਵੀ ਪਹੁੰਚ ਚੁੱਕਾ ਸੀ। ਮਾਮਲੇ ਨੇ ਮਰੀਜ਼ਾਂ ਦੀ ਨਿੱਜਤਾ, ਸਰਕਾਰੀ ਸਿਹਤ ਜਾਣਕਾਰੀ ਦੀ ਸੁਰੱਖਿਆ ਅਤੇ ਇਮੀਗ੍ਰੇਸ਼ਨ ਕਾਰਵਾਈਆਂ ਵਿਚ ਨਿੱਜੀ ਡਾਟੇ ਦੀ ਵਰਤੋਂ ਬਾਰੇ ਨਵੇਂ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।