ਵਾਸ਼ਿੰਗਟਨ, 13 ਅਗਸਤ (ਪੰਜਾਬ ਮੇਲ)- ਅਮਰੀਕੀ ਵਿਦੇਸ਼ ਵਿਭਾਗ ਨੇ 12 ਅਗਸਤ 2026 ਨੂੰ “ਬਰਥ ਟੂਰਿਜ਼ਮ” ਖ਼ਿਲਾਫ਼ ਵੱਡੀ ਕਾਰਵਾਈ ਦਾ ਐਲਾਨ ਕਰਦਿਆਂ ਇੱਕ ਨਵੀਂ Birth Tourism Prevention Task Force ਬਣਾਈ ਹੈ। ਵਿਭਾਗ ਮੁਤਾਬਕ ਇਸ ਟਾਸਕ ਫੋਰਸ ਦਾ ਮਕਸਦ ਉਹਨਾਂ ਵਿਦੇਸ਼ੀ ਨਾਗਰਿਕਾਂ ਅਤੇ ਏਜੰਟਾਂ ਦੀ ਪਛਾਣ ਕਰਨਾ ਹੈ ਜੋ ਟੂਰਿਸਟ ਜਾਂ ਹੋਰ ਗੈਰ-ਇਮੀਗ੍ਰੈਂਟ ਵੀਜ਼ਿਆਂ ਦੀ ਵਰਤੋਂ ਮੁੱਖ ਤੌਰ ’ਤੇ ਅਮਰੀਕਾ ਵਿੱਚ ਬੱਚੇ ਨੂੰ ਜਨਮ ਦੇਣ ਲਈ ਕਰਦੇ ਹਨ ਅਤੇ ਆਪਣਾ ਅਸਲ ਯਾਤਰਾ ਮਕਸਦ ਲੁਕਾਉਂਦੇ ਹਨ। ਵਿਦੇਸ਼ ਵਿਭਾਗ ਨੇ ਕਿਹਾ ਹੈ ਕਿ ਹੁਣ ਤੱਕ ਇਸ ਮੁਹਿੰਮ ਤਹਿਤ ਦੁਨੀਆ ਭਰ ਦੇ 600 ਤੋਂ ਵੱਧ ਵੀਜ਼ੇ ਰੱਦ ਕੀਤੇ ਜਾ ਚੁੱਕੇ ਹਨ।
ਸਟੇਟ ਡਿਪਾਰਟਮੈਂਟ ਅਨੁਸਾਰ ਨਵੀਂ ਟਾਸਕ ਫੋਰਸ ਵੀਜ਼ਾ ਧਾਰਕਾਂ ਦੀ ਯਾਤਰਾ ਹਿਸਟਰੀ, ਪਿਛਲੀਆਂ ਅਰਜ਼ੀਆਂ ਅਤੇ ਹੋਰ ਸਰਕਾਰੀ ਰਿਕਾਰਡਾਂ ਦੀ ਜਾਂਚ ਕਰ ਰਹੀ ਹੈ। ਇਸ ਕੰਮ ਵਿੱਚ Department of Homeland Security ਸਮੇਤ ਹੋਰ ਫੈਡਰਲ ਏਜੰਸੀਆਂ ਨਾਲ ਵੀ ਜਾਣਕਾਰੀ ਸਾਂਝੀ ਕੀਤੀ ਜਾ ਰਹੀ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜੇ ਕਿਸੇ ਵਿਅਕਤੀ ਨੇ ਵੀਜ਼ਾ ਲੈਂਦੇ ਸਮੇਂ ਜਾਣ-ਬੁੱਝ ਕੇ ਆਪਣੇ ਸਫ਼ਰ ਦਾ ਅਸਲ ਮਕਸਦ ਗਲਤ ਦੱਸਿਆ, ਤਾਂ ਉਸਦਾ ਵੀਜ਼ਾ ਰੱਦ ਹੋ ਸਕਦਾ ਹੈ ਅਤੇ ਗੰਭੀਰ ਮਾਮਲਿਆਂ ਵਿੱਚ ਭਵਿੱਖ ਵਿੱਚ ਅਮਰੀਕੀ ਵੀਜ਼ਾ ਜਾਂ ਦਾਖ਼ਲੇ ਲਈ ਸਥਾਈ ਅਯੋਗਤਾ ਵੀ ਬਣ ਸਕਦੀ ਹੈ।
ਵਿਦੇਸ਼ ਵਿਭਾਗ ਨੇ ਕਿਹਾ ਕਿ “ਬਰਥ ਟੂਰਿਜ਼ਮ” ਹੁਣ ਇੱਕ ਮੁਨਾਫ਼ੇ ਵਾਲੇ ਕਾਰੋਬਾਰ ਦਾ ਰੂਪ ਵੀ ਲੈ ਚੁੱਕਾ ਹੈ। ਕੁਝ ਏਜੰਟ ਆਪਣੇ ਆਪ ਨੂੰ ਡੂਲਾ, ਮਿਡਵਾਈਫ ਜਾਂ ਵੈਲਨੈੱਸ ਸਲਾਹਕਾਰ ਦੱਸ ਕੇ “ਅਮਰੀਕਾ ਵਿੱਚ ਬੱਚੇ ਦਾ ਜਨਮ”, ਵੀਜ਼ਾ ਕੋਚਿੰਗ ਅਤੇ ਹਸਪਤਾਲ ਪ੍ਰਬੰਧ ਵਰਗੀਆਂ ਸੇਵਾਵਾਂ ਵੇਚਦੇ ਹਨ। ਸਰਕਾਰ ਦਾ ਦੋਸ਼ ਹੈ ਕਿ ਕੁਝ ਮਾਮਲਿਆਂ ਵਿੱਚ ਮੈਡੀਕਲ ਦਸਤਾਵੇਜ਼ਾਂ ਨਾਲ ਛੇੜਛਾੜ ਜਾਂ ਯਾਤਰਾ ਦਾ ਅਸਲ ਮਕਸਦ ਲੁਕਾਉਣ ਦੀ ਕੋਚਿੰਗ ਵੀ ਕੀਤੀ ਜਾਂਦੀ ਹੈ।
ਵਿਭਾਗ ਨੇ ਕੁਝ ਉਦਾਹਰਣਾਂ ਵੀ ਦਿੱਤੀਆਂ ਹਨ। ਇੱਕ ਜੋੜੇ ਨੇ ਕਾਨਫਰੰਸ ਅਤੇ ਖਰੀਦਦਾਰੀ ਨੂੰ ਯਾਤਰਾ ਦਾ ਕਾਰਨ ਦੱਸਿਆ, ਪਰ ਦੋ ਵੱਖ-ਵੱਖ ਮੌਕਿਆਂ ’ਤੇ ਅਮਰੀਕਾ ਵਿੱਚ ਬੱਚਿਆਂ ਨੂੰ ਜਨਮ ਦਿੱਤਾ। ਇੱਕ ਹੋਰ ਵਿਦੇਸ਼ੀ ਸਰਕਾਰੀ ਅਧਿਕਾਰੀ ਨੇ ਇੱਕ ਹਫ਼ਤੇ ਦੀ ਸਰਕਾਰੀ ਯਾਤਰਾ ਲਈ ਵੀਜ਼ਾ ਲਿਆ, ਪਰ ਤਿੰਨ ਮਹੀਨੇ ਰਹਿ ਕੇ ਅਮਰੀਕਾ ਵਿੱਚ ਬੱਚੇ ਨੂੰ ਜਨਮ ਦਿੱਤਾ। ਇਹਨਾਂ ਮਾਮਲਿਆਂ ਵਿੱਚ ਵੀਜ਼ੇ ਰੱਦ ਕਰ ਦਿੱਤੇ ਗਏ।
