-ਪਹਿਲੀ ਵਾਰ ਅਰਜ਼ੀ ਆਨਲਾਈਨ ਦੇਣ ਦੀ ਵੀ ਤਿਆਰੀ
ਵਾਸ਼ਿੰਗਟਨ, 21 ਅਕਤੂਬਰ (ਪੰਜਾਬ ਮੇਲ)- ਅਮਰੀਕਾ ਦੇ ਨਵੇਂ ਪਾਸਪੋਰਟ ਦਾ ਡਿਜ਼ਾਇਨ ਜਾਰੀ ਕੀਤਾ ਗਿਆ ਹੈ। ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਮੁਤਾਬਕ, ”ਫਲਾਈਟ ਆਫ਼ ਦ ਈਗਲ” ਨਾਮ ਵਾਲਾ ਨਵਾਂ ਪਾਸਪੋਰਟ 2028 ਵਿਚ ਜਾਰੀ ਕਰਨ ਦੀ ਯੋਜਨਾ ਹੈ। ਇਸ ਵਿਚ ਅਮਰੀਕਾ ਦੇ 250 ਸਾਲਾਂ ਦੇ ਇਤਿਹਾਸ ਨਾਲ ਜੁੜੀਆਂ ਤਸਵੀਰਾਂ ਅਤੇ ਨਵੇਂ ਸੁਰੱਖਿਆ ਤੱਤ ਸ਼ਾਮਲ ਹੋਣਗੇ। ਕਿਤਾਬਚੇ ਦੇ ਕਵਰ ਉੱਤੇ ਦੇਸ਼ ਦਾ ਸੁਨਹਿਰੀ ਸਰਕਾਰੀ ਚਿੰਨ੍ਹ ਵੱਡਾ ਹੋਵੇਗਾ। ਅੰਦਰਲੇ ਸਫ਼ਿਆਂ ਉੱਤੇ ਉਕਾਬ ਦੀ ਤਸਵੀਰ ਹੋਵੇਗੀ, ਜੋ ਸਫ਼ੇ ਪਲਟਣ ਨਾਲ ਉੱਡਦਾ ਦਿਖਾਈ ਦੇਵੇਗੀ। ਨਵੇਂ ਪਾਸਪੋਰਟ ਵਿਚ 38 ਸਫ਼ੇ ਹੋਣਗੇ।
ਪਾਸਪੋਰਟ ਬਣਵਾਉਣ ਦੇ ਢੰਗ ਵਿਚ ਵੀ ਤਬਦੀਲੀ ਦੀ ਤਿਆਰੀ ਹੈ। ਰੂਬੀਓ ਨੇ ਦੱਸਿਆ ਕਿ 2027 ਤੋਂ ਪਹਿਲੀ ਵਾਰ ਪਾਸਪੋਰਟ ਲਈ ਅਰਜ਼ੀ ਦੇਣ ਵਾਲੇ ਅਮਰੀਕੀ ਨਾਗਰਿਕ ਘਰ ਬੈਠੇ ਆਨਲਾਈਨ ਅਰਜ਼ੀ ਦੇ ਸਕਣਗੇ। ਇਸ ਲਈ ਸਰਕਾਰ ਦੀ ਨਵੀਂ ਵੈੱਬਸਾਈਟ America.gov ਵਰਤੀ ਜਾਵੇਗੀ। ਅਰਜ਼ੀ ਦੇਣ ਵਾਲੇ ਆਪਣੀ ਤਸਵੀਰ ਫ਼ੋਨ ਨਾਲ ਖਿੱਚ ਕੇ ਭੇਜ ਸਕਣਗੇ ਅਤੇ ਅਰਜ਼ੀ ਦੀ ਸਥਿਤੀ ਵੀ ਆਨਲਾਈਨ ਵੇਖ ਸਕਣਗੇ। ਸਰਕਾਰ ਦਾ ਟੀਚਾ 2027 ਦੇ ਅੰਤ ਤੱਕ ਬਹੁਤੇ ਲੋਕਾਂ ਲਈ ਪਾਸਪੋਰਟ ਜਾਂ ਪਾਸਪੋਰਟ ਕਾਰਡ ਦੀ ਅਰਜ਼ੀ ਆਨਲਾਈਨ ਦੇਣ ਦੀ ਸਹੂਲਤ ਸ਼ੁਰੂ ਕਰਨਾ ਹੈ।
ਇਸ ਵੇਲੇ ਪਹਿਲੀ ਵਾਰ ਪਾਸਪੋਰਟ ਬਣਵਾਉਣ ਵਾਲਿਆਂ ਨੂੰ ਆਮ ਤੌਰ ‘ਤੇ ਨਿਰਧਾਰਤ ਕੇਂਦਰ ‘ਤੇ ਜਾ ਕੇ ਅਰਜ਼ੀ ਦੇਣੀ ਪੈਂਦੀ ਹੈ। ਨਵੀਂ ਸਹੂਲਤ ਲਾਗੂ ਹੋਣ ਨਾਲ ਕਾਗਜ਼ੀ ਫਾਰਮ ਭਰਨ ਅਤੇ ਮੁਲਾਕਾਤ ਲੈਣ ਦੀ ਲੋੜ ਘੱਟ ਸਕਦੀ ਹੈ। ਹਾਲਾਂਕਿ, ਸਰਕਾਰ ਨੇ ਹਾਲੇ ਇਹ ਨਹੀਂ ਦੱਸਿਆ ਕਿ ਆਨਲਾਈਨ ਅਰਜ਼ੀ ਲਈ ਕਿਹੜੇ ਦਸਤਾਵੇਜ਼ ਲਾਜ਼ਮੀ ਹੋਣਗੇ ਅਤੇ ਕਿਹੜੇ ਲੋਕ ਇਸ ਸਹੂਲਤ ਲਈ ਯੋਗ ਹੋਣਗੇ। ਇਸ ਲਈ ਨਵੀਂ ਪ੍ਰਣਾਲੀ ਸ਼ੁਰੂ ਹੋਣ ਤੱਕ ਪਹਿਲੀ ਵਾਰ ਅਰਜ਼ੀ ਦੇਣ ਵਾਲਿਆਂ ਨੂੰ ਮੌਜੂਦਾ ਨਿਯਮਾਂ ਅਨੁਸਾਰ ਹੀ ਕਾਰਵਾਈ ਕਰਨੀ ਪਵੇਗੀ।
ਨਵਾਂ ਡਿਜ਼ਾਇਨ ਆਉਣ ਦਾ ਮਤਲਬ ਇਹ ਨਹੀਂ ਕਿ ਮੌਜੂਦਾ ਪਾਸਪੋਰਟ ਤੁਰੰਤ ਬਦਲਣਾ ਪਵੇਗਾ। ਮੌਜੂਦਾ ਪਾਸਪੋਰਟ ਆਪਣੀ ਮਿਆਦ ਮੁੱਕਣ ਤੱਕ ਵਰਤਿਆ ਜਾ ਸਕੇਗਾ।