ਨਵੀਂ ਦਿੱਲੀ, 12 ਅਗਸਤ (ਪੰਜਾਬ ਮੇਲ)- ਫੁਕੇਟ ਤੋਂ ਦਿੱਲੀ ਆ ਰਹੀ ਏਅਰ ਇੰਡੀਆ ਦੀ ਇੱਕ ਉਡਾਣ ਦੌਰਾਨ ਅਚਾਨਕ ਲਗਭਗ 300 ਫੁੱਟ ਦੀ ਉਚਾਈ ਘਟਣ ਦੇ ਮਾਮਲੇ ‘ਚ ਨਵਾਂ ਮੋੜ ਆਇਆ ਹੈ। ਰਿਪੋਰਟ ਮੁਤਾਬਕ ਉਡਾਣ ਦੇ ਕਮਾਂਡ ਵਿਚ ਰਹੇ ਪਾਇਲਟ ਦੇ ਪੁਸ਼ਟੀਕਰਨ ਵਾਲੇ ਡਰੱਗ ਟੈਸਟ ਵਿਚ 11 ਅਗਸਤ ਨੂੰ ਨਸ਼ੀਲੇ ਪਦਾਰਥ ਦੀ ਮੌਜੂਦਗੀ ਪਾਜ਼ੀਟਿਵ ਪਾਈ ਗਈ ਹੈ।
ਏਅਰ ਇੰਡੀਆ ਦੀ ਏ320 ਉਡਾਣ ਏਆਈ2379 ਨੇ 4 ਅਗਸਤ ਨੂੰ ਫੁਕੇਟ ਤੋਂ ਦਿੱਲੀ ਲਈ ਉਡਾਣ ਭਰੀ ਸੀ। ਦੌਰਾਨ ਜਹਾਜ਼ ਨੂੰ ਭਾਰੀ ਟਰਬਿਊਲੈਂਸ ਦਾ ਸਾਹਮਣਾ ਕਰਨਾ ਪਿਆ, ਜਿਸ ਤੋਂ ਬਾਅਦ ਜਹਾਜ਼ ਅਚਾਨਕ ਕਰੀਬ 300 ਫੁੱਟ ਹੇਠਾਂ ਆ ਗਿਆ। ਹਾਲਾਂਕਿ ਇਸ ਤੋਂ ਬਾਅਦ ਜਹਾਜ਼ ਮੁੜ ਸਥਿਰ ਹੋ ਗਿਆ ਅਤੇ ਸੁਰੱਖਿਅਤ ਢੰਗ ਨਾਲ ਦਿੱਲੀ ਵਿਚ ਲੈਂਡ ਕਰ ਗਿਆ। ਘਟਨਾ ਦੌਰਾਨ ਕਈ ਯਾਤਰੀਆਂ ਅਤੇ ਕੈਬਿਨ ਕਰੂ ਮੈਂਬਰਾਂ ਦੇ ਜ਼ਖ਼ਮੀ ਹੋਣ ਦੀ ਜਾਣਕਾਰੀ ਹੈ।
ਘਟਨਾ ਤੋਂ ਬਾਅਦ ਪਾਇਲਟ ਦਾ ਪਹਿਲਾ ਸਾਈਕੋਐਕਟਿਵ ਸਬਸਟੈਂਸ ਸਕ੍ਰੀਨਿੰਗ ਟੈਸਟ ‘ਨਾਨ-ਨੈਗੇਟਿਵ’ ਆਉਣ ਕਾਰਨ ਹੋਰ ਜਾਂਚ ਲਈ ਪੁਸ਼ਟੀਕਰਨ ਵਾਲਾ ਟੈਸਟ ਕਰਵਾਇਆ ਗਿਆ। ਇਸ ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਡਾਇਰੈਕਟੋਰੇਟ ਜਨਰਲ ਆਫ ਸਿਵਲ ਏਵੀਏਸ਼ਨ (ਡੀ.ਜੀ.ਸੀ.ਏ.) ਨੇ ਜਾਂਚ ਪੂਰੀ ਹੋਣ ਤੱਕ ਫਲਾਈਟ ਦੇ ਕਰੂ ਨੂੰ ਡਿਊਟੀ ਰੋਸਟਰ ਤੋਂ ਹਟਾ ਦਿੱਤਾ ਸੀ।
ਹਾਲਾਂਕਿ ਹਵਾਬਾਜ਼ੀ ਖੇਤਰ ਨਾਲ ਜੁੜੇ ਨੁਮਾਇੰਦਿਆਂ ਨੇ ਸਿਰਫ਼ ਸ਼ੁਰੂਆਤੀ ਡਰੱਗ ਸਕ੍ਰੀਨਿੰਗ ਦੇ ਆਧਾਰ ‘ਤੇ ਕਿਸੇ ਨਤੀਜੇ ‘ਤੇ ਪਹੁੰਚਣ ਤੋਂ ਸਾਵਧਾਨ ਕੀਤਾ ਹੈ। ਏਅਰਲਾਈਨ ਪਾਇਲਟਸ ਐਸੋਸੀਏਸ਼ਨ ਆਫ ਇੰਡੀਆ ਦੇ ਪ੍ਰਧਾਨ ਕੈਪਟਨ ਸੈਮ ਥਾਮਸ ਨੇ ਕਿਹਾ ਕਿ ਆਮ ਤੌਰ ‘ਤੇ ਵਰਤੀਆਂ ਜਾਣ ਵਾਲੀਆਂ ਕੁਝ ਦਵਾਈਆਂ ਅਤੇ ਖੁਰਾਕੀ ਸਪਲੀਮੈਂਟ ਵੀ ਪੋਸਟ-ਫਲਾਈਟ ਡਰੱਗ ਸਕ੍ਰੀਨਿੰਗ ਦੇ ਨਤੀਜਿਆਂ ਨੂੰ ਪ੍ਰਭਾਵਿਤ ਕਰ ਸਕਦੇ ਹਨ।
ਫੈਡਰੇਸ਼ਨ ਆਫ ਇੰਡੀਅਨ ਪਾਇਲਟਸ ਦੇ ਪ੍ਰਧਾਨ ਕੈਪਟਨ ਸੀ.ਐੱਸ. ਰੰਧਾਵਾ ਨੇ ਵੀ ਕਿਹਾ ਕਿ ਏਅਰਲਾਈਨ ਵੱਲੋਂ ਅਜੇ ਤੱਕ ਟੈਸਟ ਦੇ ਨਤੀਜੇ ਅਧਿਕਾਰਤ ਤੌਰ ‘ਤੇ ਜਾਰੀ ਨਹੀਂ ਕੀਤੇ ਗਏ। ਉਨ੍ਹਾਂ ਕਿਹਾ ਕਿ ਉਹ ਸਰਕਾਰੀ ਜਾਂ ਏਅਰਲਾਈਨ ਪੁਸ਼ਟੀ ਤੋਂ ਪਹਿਲਾਂ ਪਾਇਲਟ ਦੇ ਟੈਸਟ ਨੂੰ ਪਾਜ਼ੀਟਿਵ ਦੱਸਣ ਵਾਲੀਆਂ ਰਿਪੋਰਟਾਂ ‘ਤੇ ਟਿੱਪਣੀ ਨਹੀਂ ਕਰਨਗੇ।
ਜੇਕਰ ਟੈਸਟ ਅਧਿਕਾਰਤ ਤੌਰ ‘ਤੇ ਪਾਜ਼ੀਟਿਵ ਪੁਸ਼ਟੀ ਹੁੰਦਾ ਹੈ, ਤਾਂ ਪਾਇਲਟ ਦਾ ਲਾਇਸੈਂਸ ਰੱਦ ਹੋਣ ਸਮੇਤ ਜੁਰਮਾਨੇ ਅਤੇ ਹੋਰ ਗੰਭੀਰ ਕਾਰਵਾਈਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।