-ਸ਼ੇਅਰ ਬਾਜ਼ਾਰ ਨਿਰੰਤਰ ਨਿਵਾਣਾਂ ਵੱਲ
ਸੈਕਰਾਮੈਂਟੋ, 12 ਮਾਰਚ (ਹੁਸਨ ਲੜੋਆ ਬੰਗਾ/ਪੰਜਾਬ ਮੇਲ)- ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੁਆਰਾ ਅਪਣਾਈਆਂ ਜਾ ਰਹੀਆਂ ਨੀਤੀਆਂ ਤੇ ਪ੍ਰੋਗਰਾਮਾਂ ਦੇ ਸਿੱਟੇ ਵਜੋਂ ਸਮੁੱਚੇ ਅਮਰੀਕਾ ‘ਚ ਬੇਯਕੀਨੀ ਦਾ ਮਾਹੌਲ ਪਾਇਆ ਜਾ ਰਿਹਾ ਹੈ, ਜਿਸ ਕਾਰਨ ਸ਼ੇਅਰ ਬਾਜ਼ਾਰ ਨਿਰੰਤਰ ਡਿੱਗ ਰਿਹਾ ਹੈ। ਕੈਨੇਡਾ, ਮੈਕਸੀਕੋ, ਚੀਨ, ਯੂਰਪੀ ਯੂਨੀਅਨ ਤੇ ਭਾਰਤ ਸਮੇਤ ਟੈਰਿਫ ਦਰਾਂ ਨੂੰ ਲੈ ਕੇ ਚੱਲ ਰਹੇ ਟਕਰਾਅ ਕਾਰਨ ਮੰਦੇ ਦੀਆਂ ਸੰਭਾਵਨਾਵਾਂ ਦਰਮਿਆਨ ਨਿਵੇਸ਼ਕਾਰ ਦੜ ਵੱਟ ਗਿਆ ਹੈ। ਰਾਸ਼ਟਰਪਤੀ ਟਰੰਪ ਨੇ ਵੀ ਮੰਦੇ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਹੈ। ਫੌਕਸ ਨਿਊਜ਼ ਨਾਲ ਗੱਲਬਾਤ ਦੌਰਾਨ ਟਰੰਪ ਨੇ ਮੰਦੇ ਦੀ ਸੰਭਾਵਨਾ ਬਾਰੇ ਕੋਈ ਭਵਿੱਖਬਾਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਉਨ੍ਹਾਂ ਕਿਹਾ ਕਿ ”ਮੈਂ ਇਸ ਤਰ੍ਹਾਂ ਦੀ ਕੋਈ ਭਵਿੱਖਬਾਣੀ ਕਰਨ ਨੂੰ ਪਸੰਦ ਨਹੀਂ ਕਰਦਾ। ਇਹ ਤਬਦੀਲੀ ਦਾ ਦੌਰ ਹੈ ਕਿਉਂਕਿ ਜੋ ਕੁਝ ਅਸੀਂ ਕਰ ਰਹੇ ਹਾਂ, ਉਹ ਬਹੁਤ ਵੱਡੀ ਗੱਲ ਹੈ।” ਆਰਥਕ ਮਹਿਰਾਂ ਅਨੁਸਾਰ ਅਰਥ ਵਿਵਸਥਾ ਲਈ ਅਸਥਿਰਤਾ ਵਾਲੇ ਹਾਲਾਤ ਬਣ ਸਕਦੇ ਹਨ ਕਿਉਂਕਿ ਨਵਾਂ ਟਰੰਪ ਪ੍ਰਸ਼ਾਸਨ ਸਰਕਾਰੀ ਖਰਚਿਆਂ ਵਿਚ ਕਟੌਤੀ ਕਰ ਰਿਹਾ ਹੈ। ਇਹ ਖਰਚੇ ਉਸ ਸਮੇਂ ਘਟਾਏ ਜਾ ਰਹੇ ਹਨ, ਜਦੋਂ ਨਿਵੇਸ਼ਕਾਰ ਮੈਕਸੀਕੋ, ਕੈਨੇਡਾ ਤੇ ਚੀਨ ਸਮੇਤ ਹੋਰ ਦੇਸ਼ਾਂ ਨਾਲ ਅਸਥਿਰ ਵਪਾਰਕ ਨੀਤੀਆਂ ਬਾਰੇ ਚਿੰਤਤ ਹਨ। ਇਨ੍ਹਾਂ ਨੀਤੀਆਂ ਦੇ ਸਿੱਟੇ ਵਜੋਂ ਖਪਤਕਾਰਾਂ ਦੀ ਮੰਗ ਘਟੇਗੀ ਤੇ ਕਾਰਪੋਰੇਟ ਨਿਵੇਸ਼ ਉਪਰ ਬੁਰਾ ਅਸਰ ਪਵੇਗਾ। ਖਜ਼ਾਨਾ ਸਕੱਤਰ ਸਕਾਟ ਬੇਸੈਂਟ ਨੇ ਵੀ ਸੀ.ਐੱਨ.ਬੀ.ਸੀ. ਉਪਰ ਗੱਲਬਾਤ ਦੌਰਾਨ ਇਸ ਕਿਸਮ ਦੀਆਂ ਸੰਭਾਵਨਾਵਾਂ ਹੀ ਪ੍ਰਗਟਾਈਆਂ ਹਨ। ਉਨ੍ਹਾਂ ਕਿਹਾ ਕਿ ਅਰਥਵਿਵਸਥਾ ਲਈ ਇਹ ਸਮਾਂ ਜ਼ੋਖਮ ਵਾਲਾ ਹੈ। ਐਸ ਐਂਡ ਪੀ ਗਲੋਬਲ ਮਾਰਕੀਟ ਇੰਟੈਲੀਜੈਂਸ ਵਿਖੇ ਆਰਥਿਕ ਮਾਹਿਰ ਵਜੋਂ ਕੰਮ ਕਰਦੇ ਐਂਡਰੀਊ ਹਾਰਕਰ ਅਨੁਸਾਰ ”ਭੂਗੋਲਿਕ ਰਾਜਨੀਤੀ ਤੇ ਕੌਮਾਂਤਰੀ ਵਪਾਰ ਬਾਰੇ ਪੈਦਾ ਹੋਏ ਅਸਥਿਰਤਾ ਦੇ ਮਾਹੌਲ ਦਰਮਿਆਨ ਵਿਸ਼ਵ ਭਰ ਵਿਚ ਕੰਪਨੀਆਂ ‘ਉਡੀਕੋ ਤੇ ਵੇਖੋ’ ਵਾਲੀ ਪਹੁੰਚ ਅਪਣਾ ਰਹੀਆਂ ਹਨ। ਫਿਲਹਾਲ ਉਹ ਮੁਲਾਜ਼ਮਾਂ ਨੂੰ ਭਰਤੀ ਕਰਨ ਤੇ ਆਪਣੀਆਂ ਨਿਵੇਸ਼ ਸਬੰਧ ਯੋਜਨਾਵਾਂ ਨੂੰ ਮੁਲਤਵੀ ਕਰ ਰਹੀਆਂ ਹਨ।