-ਇਕ ਦਿਨ ‘ਚ 44.4 ਅਰਬ ਡਾਲਰ ਦਾ ਨੁਕਸਾਨ
ਵਾਸ਼ਿੰਗਟਨ, 23 ਜੁਲਾਈ (ਪੰਜਾਬ ਮੇਲ)- ਦੁਨੀਆਂ ਦੇ ਸਭ ਤੋਂ ਅਮੀਰ ਕਾਰੋਬਾਰੀ ਐਲੋਨ ਮਸਕ ਨੂੰ ਵੱਡਾ ਝਟਕਾ ਲੱਗਾ ਹੈ। ਇਲੈਕਟ੍ਰਿਕ ਵਾਹਨ ਨਿਰਮਾਤਾ ਕੰਪਨੀ ਟੇਸਲਾ ਦੇ ਅਪ੍ਰੈਲ-ਜੂਨ ਦੇ ਤਿਮਾਹੀ ਨਤੀਜਿਆਂ ਦੇ ਜਾਰੀ ਹੋਣ ਤੋਂ ਬਾਅਦ, ਕੰਪਨੀ ਦੇ ਸ਼ੇਅਰਾਂ ਵਿਚ ਭਾਰੀ ਗਿਰਾਵਟ ਦੇ ਨਤੀਜੇ ਵਜੋਂ ਇਸਦੀ ਜਾਇਦਾਦ ਵਿਚ ਲਗਭਗ 44.4 ਅਰਬ ਡਾਲਰ (ਲਗਭਗ 4.2 ਲੱਖ ਕਰੋੜ ਰੁਪਏ) ਦੀ ਗਿਰਾਵਟ ਆਈ ਹੈ। ਬਲੂਮਬਰਗ ਬਿਲੀਨੇਅਰਜ਼ ਇੰਡੈਕਸ ਅਨੁਸਾਰ, ਮਸਕ ਦੀ ਕੁੱਲ ਜਾਇਦਾਦ ਹੁਣ 745 ਬਿਲੀਅਨ ਡਾਲਰ ਤੱਕ ਆ ਗਈ ਹੈ। ਪਿਛਲੇ ਮਹੀਨੇ ਹੀ ਉਹ ਦੁਨੀਆਂ ਦਾ ਪਹਿਲਾ ਖਰਬਪਤੀ ਬਣਨ ਨੂੰ ਲੈ ਕੇ ਸੁਰਖੀਆਂ ‘ਚ ਰਿਹਾ ਸੀ ਪਰ ਹੁਣ ਟੇਸਲਾ ਦੇ ਕਮਜ਼ੋਰ ਵਿੱਤੀ ਸੰਕੇਤਾਂ ਨੇ ਨਿਵੇਸ਼ਕਾਂ ਦੀ ਚਿੰਤਾ ਵਧਾ ਦਿੱਤੀ ਹੈ।
ਟੇਸਲਾ ਦਾ ਮਾਲੀਆ ਮਾਰਕੀਟ ਅਨੁਮਾਨਾਂ ਨਾਲੋਂ ਬਿਹਤਰ ਸੀ, ਪਰ ਮੁਨਾਫਾ ਅਤੇ ਨਕਦ ਪ੍ਰਵਾਹ ਉਮੀਦ ਨਾਲੋਂ ਕਮਜ਼ੋਰ ਰਿਹਾ ਸੀ। ਇਸ ਕਾਰਨ ਨਿਵੇਸ਼ਕਾਂ ਨੇ ਸ਼ੇਅਰ ਵੇਚਣੇ ਸ਼ੁਰੂ ਕਰ ਦਿੱਤੇ ਹਨ। ਨਤੀਜਿਆਂ ਤੋਂ ਬਾਅਦ ਟੇਸਲਾ ਦੇ ਸ਼ੇਅਰ ਬਾਜ਼ਾਰ ਤੋਂ ਬਾਅਦ ਦੇ ਵਪਾਰ ਵਿਚ ਲਗਭਗ 5% ਡਿੱਗ ਗਏ। ਨਿਯਮਤ ਵਪਾਰ ਵਿਚ ਵੀ ਸਟਾਕ ਦਬਾਅ ਵਿਚ ਰਿਹਾ ਅਤੇ ਸਾਲ 2026 ਵਿਚ ਹੁਣ ਤੱਕ ਲਗਭਗ 15% ਦੀ ਗਿਰਾਵਟ ਆਈ ਹੈ। ਟੇਸਲਾ ਦੀ ਕੁੱਲ ਆਮਦਨ 28.24 ਬਿਲੀਅਨ ਡਾਲਰ ਸੀ, ਜੋ ਪਿਛਲੇ ਸਾਲ ਦੀ ਇਸੇ ਮਿਆਦ ਨਾਲੋਂ 26% ਵੱਧ ਹੈ। ਹਾਲਾਂਕਿ, ਕੰਪਨੀ ਦੀ ਪ੍ਰਤੀ ਸ਼ੇਅਰ ਕਮਾਈ (ਈ.ਪੀ.ਐੱਸ.) 0.33 ਡਾਲਰ ਰਹੀ, ਜਦੋਂ ਕਿ ਮਾਰਕੀਟ 0.51 ਡਾਲਰ ਦੀ ਉਮੀਦ ਕਰ ਰਹੀ ਸੀ। ਕੰਪਨੀ ਦਾ ਸ਼ੁੱਧ ਲਾਭ 5% ਘਟ ਕੇ 1.11 ਬਿਲੀਅਨ ਡਾਲਰ ਹੋ ਗਿਆ।
ਆਟੋਮੋਬਾਈਲ ਕਾਰੋਬਾਰ ਤੋਂ ਵਿਕਰੀ ਵਧਣ ਦੇ ਬਾਵਜੂਦਨ ਪ੍ਰਤੀ ਵਾਹਨ ਔਸਤ ਵਿਕਰੀ ਮੁੱਲ ਘੱਟ ਰਹਿਣ ਕਾਰਨ ਕੰਪਨੀ ਦਾ ਗ੍ਰਾਸ ਪ੍ਰਾਫਿਟ ਮਾਰਜਨ ਘੱਟ ਕੇ 16.8% ਤੱਕ ਰਹਿ ਗਿਆ, ਜੋ ਮਾਰਕੀਟ ਦੀਆਂ ਉਮੀਦਾਂ ਤੋਂ ਘੱਟ ਹੈ। ਇਸ ਤੋਂ ਇਲਾਵਾ, ਕੰਪਨੀ ਦਾ ਫਰੀ ਕੈਸ਼ ਫਲੋ 1.1 ਅਰਬ ਡਾਲਰ ਨੈਗੇਟਿਵ ਰਿਹਾ ਸੀ। ਪੂੰਜੀ ਖਰਚ (ਕੈਪੈਕਸ) ਵੀ ਦੁੱਗਣੇ ਤੋਂ ਵੱਧ ਵਧਿਆ, ਜਿਸ ਨਾਲ ਨਿਵੇਸ਼ਕਾਂ ਦੀ ਚਿੰਤਾ ਹੋਰ ਵਧ ਗਈ।