ਵਾਸ਼ਿੰਗਟਨ, 20 ਅਗਸਤ (ਪੰਜਾਬ ਮੇਲ)- ਅਮਰੀਕੀ ਵਿਦੇਸ਼ ਵਿਭਾਗ ਨੇ 18 ਅਗਸਤ 2026 ਨੂੰ ਵਿਜ਼ਟਰ ਵੀਜ਼ਾ ਲੈਣ ਵਾਲਿਆਂ ਲਈ ਇੱਕ ਨਵਾਂ Paid Expedited Appointment Pilot Program ਸ਼ੁਰੂ ਕੀਤਾ ਹੈ। ਇਸ ਯੋਜਨਾ ਤਹਿਤ ਯੋਗ B ਸ਼੍ਰੇਣੀ ਦੇ ਬਿਜ਼ਨਸ ਜਾਂ ਟੂਰਿਸਟ ਵੀਜ਼ਾ ਬਿਨੈਕਾਰ ਵਾਧੂ 750 ਡਾਲਰ ਫੀਸ ਦੇ ਕੇ, ਜੇ ਸਮਾਂ ਉਪਲਬਧ ਹੋਵੇ, 10 ਕੰਮਕਾਜੀ ਦਿਨਾਂ ਦੇ ਅੰਦਰ ਵੀਜ਼ਾ ਇੰਟਰਵਿਊ ਲੈ ਸਕਦੇ ਹਨ। ਇਹ ਯੋਜਨਾ ਫਿਲਹਾਲ ਚੁਣੀਆਂ ਹੋਈਆਂ ਅਮਰੀਕੀ ਅੰਬੈਸੀਆਂ ਅਤੇ ਕੌਂਸਲੇਟਾਂ ਵਿੱਚ ਟੈਸਟ ਵਜੋਂ ਚਲਾਈ ਜਾ ਰਹੀ ਹੈ ਅਤੇ 31 ਦਸੰਬਰ 2026 ਤੱਕ ਜਾਰੀ ਰਹੇਗੀ।
ਇਹ 750 ਡਾਲਰ ਦੀ ਫੀਸ ਆਮ 185 ਡਾਲਰ MRV ਵੀਜ਼ਾ ਅਰਜ਼ੀ ਫੀਸ ਤੋਂ ਵੱਖਰੀ ਅਤੇ ਵਾਧੂ ਹੋਵੇਗੀ। ਬਿਨੈਕਾਰ ਨੂੰ ਪਹਿਲਾਂ ਆਮ ਤਰੀਕੇ ਨਾਲ ਫੀਸ ਭਰ ਕੇ ਆਪਣਾ ਰੈਗੂਲਰ ਇੰਟਰਵਿਊ ਬੁੱਕ ਕਰਨਾ ਪਵੇਗਾ। ਜੇ ਉਸਦੇ ਦੇਸ਼ ਵਿੱਚ Paid Expedite ਦੀ ਸਹੂਲਤ ਅਤੇ appointment ਉਪਲਬਧ ਹੋਵੇ, ਤਾਂ ਉਹ ਵਾਧੂ ਫੀਸ ਦੇ ਕੇ ਪਹਿਲਾਂ ਦੀ ਤਾਰੀਖ ਲੈ ਸਕੇਗਾ।
ਵਿਦੇਸ਼ ਵਿਭਾਗ ਨੇ ਸਾਫ਼ ਕੀਤਾ ਹੈ ਕਿ 750 ਡਾਲਰ ਦੇਣ ਨਾਲ ਵੀਜ਼ਾ ਮਿਲਣ ਦੀ ਕੋਈ ਗਾਰੰਟੀ ਨਹੀਂ ਹੈ। ਇਸ ਨਾਲ ਸਿਰਫ਼ ਇੰਟਰਵਿਊ ਦੀ ਤਾਰੀਖ ਜਲਦੀ ਮਿਲੇਗੀ। Visa screening ਅਤੇ ਮਨਜ਼ੂਰੀ ਦੇ ਸਾਰੇ ਨਿਯਮ ਪਹਿਲਾਂ ਵਾਂਗ ਹੀ ਰਹਿਣਗੇ। ਇਹ ਫੀਸ ਵਾਪਸ ਨਹੀਂ ਹੋਵੇਗੀ ਅਤੇ Paid Expedite appointment ਨੂੰ ਬਾਅਦ ਵਿੱਚ ਬਦਲਿਆ ਵੀ ਨਹੀਂ ਜਾ ਸਕੇਗਾ। ਇੰਟਰਵਿਊ ਮਿਸ ਹੋਣ ’ਤੇ 750 ਡਾਲਰ ਦੀ ਰਕਮ ਵੀ ਖਤਮ ਹੋ ਜਾਵੇਗੀ।
18 ਅਗਸਤ ਤੋਂ Canada, Bogotá, Guatemala City, San José ਅਤੇ Tegucigalpa ਵਿੱਚ ਇਹ ਸਹੂਲਤ ਸ਼ੁਰੂ ਹੋਈ ਹੈ। Mexico ਵਿੱਚ ਇਹ pilot ਪਹਿਲਾਂ ਹੀ 21 ਜੁਲਾਈ ਤੋਂ ਚੱਲ ਰਿਹਾ ਹੈ। ਵਿਦੇਸ਼ ਵਿਭਾਗ ਨੇ ਕਿਹਾ ਹੈ ਕਿ ਆਉਣ ਵਾਲੇ ਸਮੇਂ ਵਿੱਚ ਹੋਰ ਦੇਸ਼ ਵੀ ਇਸ ਯੋਜਨਾ ਵਿੱਚ ਸ਼ਾਮਲ ਕੀਤੇ ਜਾ ਸਕਦੇ ਹਨ। ਭਾਰਤ ਇਸ ਵੇਲੇ ਜਾਰੀ ਕੀਤੀ ਗਈ ਸੂਚੀ ਵਿੱਚ ਸ਼ਾਮਲ ਨਹੀਂ ਹੈ।
