-ਕਾਂਗਰਸ ਵਿਚ ਛਿੜੀ ਬਹਿਸ
ਵਾਸ਼ਿੰਗਟਨ ਡੀ.ਸੀ., 9 ਜੂਨ (ਪੰਜਾਬ ਮੇਲ)- ਅਮਰੀਕੀ ਕਾਂਗਰਸ ਦੀ ਹਾਊਸ ਆਰਮਡ ਸਰਵਿਸਿਜ਼ ਕਮੇਟੀ ਨੇ ਇੱਕ ਵਿਵਾਦਿਤ ਸੋਧ ਨੂੰ ਮਨਜ਼ੂਰੀ ਦਿੱਤੀ ਹੈ, ਜਿਸ ਤਹਿਤ ਮੌਜੂਦਾ ਡਿਪਾਰਟਮੈਂਟ ਆਫ ਡਿਫੈਂਸ (ਡੀ.ਓ.ਡੀ) ਦਾ ਨਾਮ ਬਦਲ ਕੇ ”ਡਿਪਾਰਟਮੈਂਟ ਆਫ ਵਾਰ” ਰੱਖਣ ਦਾ ਰਾਹ ਖੁੱਲ੍ਹ ਸਕਦਾ ਹੈ।
ਇਹ ਸੋਧ ਟੈਕਸਾਸ ਦੇ ਰਿਪਬਲਿਕਨ ਕਾਂਗਰਸਮੈਨ ਰੌਨੀ ਜੈਕਸਨ ਵੱਲੋਂ ਪੇਸ਼ ਕੀਤੀ ਗਈ ਸੀ ਅਤੇ ਕਮੇਟੀ ਵਿਚ ਪਾਰਟੀ ਲਾਈਨਾਂ ਅਨੁਸਾਰ ਪਾਸ ਹੋ ਗਈ। ਰਿਪਬਲਿਕਨ ਮੈਂਬਰਾਂ ਨੇ ਇਸ ਕਦਮ ਨੂੰ ਅਮਰੀਕੀ ਫੌਜ ਦੇ ਮੂਲ ਉਦੇਸ਼ ਨੂੰ ਸਪੱਸ਼ਟ ਕਰਨ ਵਾਲਾ ਕਦਮ ਦੱਸਿਆ, ਜਦਕਿ ਡੈਮੋਕ੍ਰੈਟ ਮੈਂਬਰਾਂ ਨੇ ਇਸਦੀ ਤਿੱਖੀ ਆਲੋਚਨਾ ਕੀਤੀ।
ਕਮੇਟੀ ਦੇ ਸੀਨੀਅਰ ਡੈਮੋਕ੍ਰੈਟ ਮੈਂਬਰ ਐਡਮ ਸਮਿਥ ਨੇ ਇਸ ਪ੍ਰਸਤਾਵ ਨੂੰ ”ਇਸ ਪ੍ਰਸ਼ਾਸਨ ਦੇ ਸਭ ਤੋਂ ਬੇਤੁਕੇ ਕਦਮਾਂ ਵਿਚੋਂ ਇੱਕ” ਕਰਾਰ ਦਿੱਤਾ।
ਰਿਪੋਰਟਾਂ ਅਨੁਸਾਰ, ਡੋਨਾਲਡ ਟਰੰਪ ਨੇ ਪਿਛਲੇ ਸਾਲ ਇੱਕ ਕਾਰਜਕਾਰੀ ਹੁਕਮ ‘ਤੇ ਦਸਤਖ਼ਤ ਕੀਤੇ ਸਨ, ਜਿਸ ਵਿਚ ਵਿਭਾਗ ਦਾ ਨਾਮ ਬਦਲਣ ਅਤੇ ਰੱਖਿਆ ਮੰਤਰੀ ਪੀਟ ਹੇਗਸੇਥ ਨੂੰ ”ਸੈਕਰੇਟਰੀ ਆਫ ਵਾਰ” ਦਾ ਅਹੁਦਾ ਦੇਣ ਦੀ ਹਦਾਇਤ ਦਿੱਤੀ ਗਈ ਸੀ। ਹਾਲਾਂਕਿ ਇਹ ਤਬਦੀਲੀ ਅਜੇ ਕਾਨੂੰਨੀ ਤੌਰ ‘ਤੇ ਲਾਗੂ ਨਹੀਂ ਹੋਈ ਅਤੇ ਇਸ ਲਈ ਕਾਂਗਰਸ ਦੀ ਮਨਜ਼ੂਰੀ ਲੋੜੀਂਦੀ ਹੈ।
ਇਸ ਤਬਦੀਲੀ ਦੀ ਲਾਗਤ ਵੀ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ। ਪੈਂਟਾਗਨ ਦੇ ਅਨੁਸਾਰ ਨਾਮ ਬਦਲਣ ਅਤੇ ਸਾਰੇ ਦਸਤਾਵੇਜ਼, ਲੋਗੋ, ਸਾਈਨਬੋਰਡ ਅਤੇ ਪ੍ਰਣਾਲੀਆਂ ਨੂੰ ਅਪਡੇਟ ਕਰਨ ਲਈ ਲਗਭਗ 52 ਮਿਲੀਅਨ ਡਾਲਰ ਖਰਚ ਹੋ ਸਕਦੇ ਹਨ। ਜਦਕਿ ਕਾਂਗਰੇਸ਼ਨਲ ਬਜਟ ਆਫਿਸ ਦਾ ਅੰਦਾਜ਼ਾ ਹੈ ਕਿ ਕੁੱਲ ਲਾਗਤ 125 ਮਿਲੀਅਨ ਡਾਲਰ ਤੱਕ ਪਹੁੰਚ ਸਕਦੀ ਹੈ।
ਇਤਿਹਾਸਕ ਤੌਰ ‘ਤੇ ”ਡਿਪਾਰਟਮੈਂਟ ਆਫ ਵਾਰ” ਕੋਈ ਨਵਾਂ ਨਾਮ ਨਹੀਂ ਹੈ। 1789 ਵਿਚ ਜਾਰਜ ਵਾਸ਼ਿੰਗਟਨ ਦੇ ਸਮੇਂ ਇਹੀ ਨਾਮ ਵਰਤਿਆ ਜਾਂਦਾ ਸੀ। ਇਹ ਨਾਮ 1947 ਤੱਕ ਚੱਲਦਾ ਰਿਹਾ, ਜਦੋਂ ਹੈਰੀ ਐੱਸ. ਟਰੂਮੈਨ ਦੇ ਪ੍ਰਸ਼ਾਸਨ ਦੌਰਾਨ ਫੌਜੀ ਢਾਂਚੇ ਦੀ ਪੁਨਰਗਠਨ ਕਰਕੇ ਆਰਮੀ, ਨੇਵੀ ਅਤੇ ਏਅਰ ਫੋਰਸ ਨੂੰ ਇਕੱਠਾ ਕਰਕੇ ਡਿਪਾਰਟਮੈਂਟ ਆਫ ਡਿਫੈਂਸ ਬਣਾਇਆ ਗਿਆ।
ਪ੍ਰਸਤਾਵ ਦੇ ਹਮਾਇਤੀ ਕਹਿੰਦੇ ਹਨ ਕਿ ”ਡਿਪਾਰਟਮੈਂਟ ਆਫ ਵਾਰ” ਨਾਮ ਅਮਰੀਕੀ ਫੌਜ ਦੀ ਭੂਮਿਕਾ ਨੂੰ ਸਿੱਧੇ ਅਤੇ ਸਪੱਸ਼ਟ ਤਰੀਕੇ ਨਾਲ ਦਰਸਾਉਂਦਾ ਹੈ। ਦੂਜੇ ਪਾਸੇ, ਵਿਰੋਧੀਆਂ ਦਾ ਮੰਨਣਾ ਹੈ ਕਿ ਇਹ ਨਾਮ ਅਮਰੀਕਾ ਦੀ ਵਿਦੇਸ਼ ਨੀਤੀ ਅਤੇ ਅੰਤਰਰਾਸ਼ਟਰੀ ਸਾਥੀਆਂ ਲਈ ਗਲਤ ਸੰਦੇਸ਼ ਭੇਜ ਸਕਦਾ ਹੈ, ਖ਼ਾਸ ਕਰਕੇ ਉਸ ਸਮੇਂ ਜਦੋਂ ਦੁਨੀਆਂ ਦੇ ਕਈ ਖੇਤਰਾਂ ਵਿਚ ਤਣਾਅ ਅਤੇ ਸੰਘਰਸ਼ ਜਾਰੀ ਹਨ।
ਹੁਣ ਇਹ ਪ੍ਰਸਤਾਵ ਪੂਰੇ ਹਾਊਸ ਆਫ਼ ਰਿਪ੍ਰਿਜ਼ੈਂਟੇਟਿਵਜ਼ ਅੱਗੇ ਜਾਵੇਗਾ। ਜੇਕਰ ਹਾਊਸ ਇਸਨੂੰ ਪਾਸ ਕਰ ਵੀ ਦਿੰਦਾ ਹੈ, ਤਾਂ ਇਸਨੂੰ ਯੂਨਾਈਟਿਡ ਸਟੇਟ ਸੈਨੇਟ ਵਿਚ ਵੀ ਮਨਜ਼ੂਰੀ ਲੈਣੀ ਪਵੇਗੀ, ਜਿੱਥੇ ਇਸ ਦੇ ਪਾਸ ਹੋਣ ਬਾਰੇ ਅਜੇ ਅਨਿਸ਼ਚਿਤਤਾ ਬਣੀ ਹੋਈ ਹੈ।