-ਏਅਰਲਾਈਨਾਂ ਨੂੰ ਭਾਰੀ ਘਾਟਾ: ਕੇਂਦਰ
ਨਵੀਂ ਦਿੱਲੀ, 23 ਜੁਲਾਈ (ਪੰਜਾਬ ਮੇਲ)- ਕੇਂਦਰ ਸਰਕਾਰ ਨੇ ਵੀਰਵਾਰ ਨੂੰ ਕਿਹਾ ਕਿ ਅਮਰੀਕਾ-ਇਰਾਨ ਸੰਘਰਸ਼ ਨੇ ਭਾਰਤ ਦੇ ਅੰਤਰਰਾਸ਼ਟਰੀ ਹਵਾਬਾਜ਼ੀ ਖੇਤਰ ਨੂੰ ਗੰਭੀਰਤਾ ਨਾਲ ਪ੍ਰਭਾਵਿਤ ਕੀਤਾ ਹੈ, ਜਿਸ ਨਾਲ 20 ਜੁਲਾਈ ਤੱਕ ਭਾਰਤੀ ਏਅਰਲਾਈਨਾਂ ਵੱਲੋਂ ਸੰਚਾਲਿਤ ਲਗਪਗ 26,000 ਉਡਾਣਾਂ ਪ੍ਰਭਾਵਿਤ ਹੋਈਆਂ ਹਨ। ਰੂਟ ਬਦਲਣ ਅਤੇ ਉਡਾਣਾਂ ਦਾ ਸਮਾਂ ਵਧਣ ਕਾਰਨ ਏਅਰਲਾਈਨਾਂ ਨੂੰ ਕਮਾਈ ਦਾ ਭਾਰੀ ਨੁਕਸਾਨ ਅਤੇ ਉੱਚ ਸੰਚਾਲਨ ਲਾਗਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਲੋਕ ਸਭਾ ਮੈਂਬਰ ਐਂਟੋ ਐਂਟੋਨੀ ਦੇ ਇੱਕ ਸਵਾਲ ਦਾ ਜਵਾਬ ਦਿੰਦਿਆਂ ਨਾਗਰਿਕ ਹਵਾਬਾਜ਼ੀ ਰਾਜ ਮੰਤਰੀ ਮੁਰਲੀਧਰ ਮੋਹੋਲ ਨੇ ਕਿਹਾ ਕਿ ਸੰਘਰਸ਼ ਤੋਂ ਉਪਜੀਆਂ ਏਅਰਸਪੇਸ (ਹਵਾਈ ਖੇਤਰ) ਦੀਆਂ ਪਾਬੰਦੀਆਂ ਕਾਰਨ ਏਅਰਲਾਈਨਾਂ ਅਤੇ ਹਵਾਈ ਅੱਡਿਆਂ ‘ਤੇ ਵੱਡੇ ਪੱਧਰ ‘ਤੇ ਉਡਾਣਾਂ ਰੱਦ, ਡਾਇਵਰਟ ਅਤੇ ਦੇਰੀ ਨਾਲ ਚੱਲ ਰਹੀਆਂ ਹਨ।
ਹਾਲਾਂਕਿ, ਸਰਕਾਰ ਨੇ ਪ੍ਰਸ਼ਨ ਵਿਚ ਮੰਗੇ ਗਏ ਲਗਪਗ 26,000 ਪ੍ਰਭਾਵਿਤ ਉਡਾਣਾਂ ਦਾ ਏਅਰਲਾਈਨ-ਵਾਰ ਜਾਂ ਹਵਾਈ ਅੱਡੇ-ਵਾਰ ਵੇਰਵਾ ਪ੍ਰਦਾਨ ਨਹੀਂ ਕੀਤਾ।
ਮੰਤਰੀ ਨੇ ਦੱਸਿਆ ਕਿ ਡਾਇਰੈਕਟੋਰੇਟ ਜਨਰਲ ਆਫ਼ ਸਿਵਲ ਐਵੀਏਸ਼ਨ (ਡੀ.ਜੀ.ਐੱਸ.ਏ.) ਨੇ ਏਅਰਲਾਈਨਾਂ ਲਈ ਕਈ ਸੁਰੱਖਿਆ ਐਡਵਾਇਜ਼ਰੀਆਂ ਜਾਰੀ ਕੀਤੀਆਂ ਹਨ। ਇਸ ਵਿੱਚ ਪ੍ਰਭਾਵਿਤ ਹਵਾਈ ਖੇਤਰ ‘ਤੇ ਸੰਚਾਲਨ ਸੰਬੰਧੀ ਮਾਰਗਦਰਸ਼ਨ, ‘ਨੋਟਿਸ ਟੂ ਏਅਰਮੈਨ’ (NOTAMs), ਉੱਚ-ਜੋਖਮ ਵਾਲੇ ਖੇਤਰਾਂ ਦੀ ਪਛਾਣ, ਫਲਾਈਟ ਇਨਫਰਮੇਸ਼ਨ ਰੀਜਨ (ਐੱਫ.ਆਈ.ਆਰ.) ਦੀਆਂ ਸੀਮਾਵਾਂ ਅਤੇ ਪ੍ਰਭਾਵਿਤ ਦੇਸ਼ਾਂ ਬਾਰੇ ਜਾਣਕਾਰੀ ਸ਼ਾਮਲ ਹੈ, ਤਾਂ ਜੋ ਵਿਆਪਕ ਸੁਰੱਖਿਆ ਜੋਖਮ ਮੁਲਾਂਕਣਾਂ ਤੋਂ ਬਾਅਦ ਸੁਰੱਖਿਅਤ ਰੂਟ ਦੀ ਯੋਜਨਾ ਬਣਾਈ ਜਾ ਸਕੇ।
ਵਿੱਤੀ ਪ੍ਰਭਾਵ ਬਾਰੇ ਸਰਕਾਰ ਨੇ ਮੰਨਿਆ ਕਿ ਰੂਟ ਬਦਲਣ ਨਾਲ ਉਡਾਣਾਂ ਦਾ ਸਮਾਂ ਅਤੇ ਈਂਧਨ ਦੀ ਖਪਤ ਵਧੀ ਹੈ, ਜਿਸ ਦੇ ਨਤੀਜੇ ਵਜੋਂ ਏਅਰਲਾਈਨਾਂ ਲਈ ਸੰਚਾਲਨ ਲਾਗਤ ਵਧ ਗਈ ਹੈ। ਸਰਕਾਰ ਨੇ ਇਹ ਵੀ ਕਬੂਲ ਕੀਤਾ ਕਿ ਚੱਲ ਰਹੇ ਭੂ-ਰਾਜਨੀਤਿਕ ਸੰਕਟ ਕਾਰਨ ਭਾਰਤੀ ਏਅਰਲਾਈਨਾਂ ਨੂੰ ਕਮਾਈ ਦਾ ਭਾਰੀ ਨੁਕਸਾਨ ਹੋ ਰਿਹਾ ਹੈ।