ਨਵੀਂ ਦਿੱਲੀ, 17 ਮਾਰਚ (ਪੰਜਾਬ ਮੇਲ)- ਹਾਲ ਵਿਚ ਹੋਏ ਇਕ ਅਧਿਐਨ ‘ਚ ਭਾਰਤੀ ਯਾਤਰੀਆਂ ਲਈ ਇੱਕ ਚਿੰਤਾਜਨਕ ਰੁਝਾਨ ਦਾ ਖੁਲਾਸਾ ਹੋਇਆ ਹੈ। ਮਹਾਮਾਰੀ ਤੋਂ ਬਾਅਦ ਕਈ ਦੇਸ਼ਾਂ ਵਿਚ ਵਿਜ਼ਟਰ ਵੀਜ਼ਾ ਰਿਜੈਕਸ਼ਨ ਦਰ ਵਿਚ ਮਹੱਤਵਪੂਰਨ ਵਾਧਾ ਦਰਜ ਕੀਤਾ ਗਿਆ। ਰਿਜੈਕਸ਼ਨ ਵਿਚ ਇਸ ਵਾਧੇ ਕਾਰਨ ਭਾਰਤੀਆਂ ਨੂੰ 2024 ‘ਚ ਸਮੂਹਿਕ ਤੌਰ ‘ਤੇ ਲਗਭਗ 664 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ। ਸਖ਼ਤ ਵੀਜ਼ਾ ਨੀਤੀਆਂ ਵਾਲੇ ਦੇਸ਼ਾਂ ਵਿਚ ਆਸਟ੍ਰੇਲੀਆ, ਨਿਊਜ਼ੀਲੈਂਡ, ਯੂ.ਕੇ. ਅਤੇ ਯੂ.ਏ.ਈ. ਸ਼ਾਮਲ ਹਨ। ਇਹ ਤਬਦੀਲੀ ਪਿਛਲੇ ਅੰਕੜਿਆਂ ਤੋਂ ਇੱਕ ਧਿਆਨ ਦੇਣ ਯੋਗ ਤਬਦੀਲੀ ਨੂੰ ਦਰਸਾਉਂਦੀ ਹੈ, ਖਾਸ ਕਰਕੇ ਜਦੋਂ 2019 ਵਿਚ ਵੀਜ਼ਾ ਪ੍ਰਵਾਨਗੀ ਦਰਾਂ ਦੀ ਤੁਲਨਾ ਕੀਤੀ ਜਾਵੇ।
ਦਿਲਚਸਪ ਗੱਲ ਇਹ ਹੈ ਕਿ ਸੰਯੁਕਤ ਰਾਜ ਅਮਰੀਕਾ ਵਿਚ ਵੀ ਵੱਡੀ ਗਿਣਤੀ ਵਿਚ ਵੀਜ਼ੇ ਰਿਜੈਕਟ ਹੋਏ ਹਨ। ਹਾਲਾਂਕਿ 2019 ਦੇ ਮੁਕਾਬਲੇ 2024 ‘ਚ ਵਧੇਰੇ ਭਾਰਤੀਆਂ ਲਈ ਵੀਜ਼ੇ ਸਵਿਕਾਰ ਕੀਤੇ ਗਏ ਹਨ। 2019 ਵਿਚ ਅਮਰੀਕਾ ਦੁਆਰਾ 28 ਪ੍ਰਤੀਸ਼ਤ ਭਾਰਤੀ ਵੀਜ਼ਾ ਅਰਜ਼ੀਆਂ ਨੂੰ ਰੱਦ ਕੀਤਾ ਗਿਆ ਸੀ, ਇਹ ਅੰਕੜਾ 2024 ਵਿਚ ਘੱਟ ਕੇ 16 ਪ੍ਰਤੀਸ਼ਤ ਹੋ ਗਿਆ।
ਇਸੇ ਤਰ੍ਹਾਂ 2024 ‘ਚ ਨਿਊਜ਼ੀਲੈਂਡ ਨੇ 32.5 ਫੀਸਦੀ ਭਾਰਤੀ ਵੀਜ਼ਾ ਬਿਨੈਕਾਰਾਂ ਦੀਆਂ ਅਰਜ਼ੀਆਂ ਨੂੰ ਰੱਦ ਕਰ ਦਿੱਤਾ ਹਿਆ। ਇਸ ਦੇ ਨਾਲ ਹੀ ਆਸਟ੍ਰੇਲੀਆ ਨੇ 29.3 ਫੀਸਦੀ, ਯੂ.ਕੇ. ਨੇ 17 ਫੀਸਦੀ ਤੇ ਸ਼ੈਨੇਗਨ ਖੇਤਰ ਨੇ 15.7 ਫੀਸਦੀ ਵੀਜ਼ੇ ਰੱਦ ਕਰ ਦਿੱਤੇ। ਇਸ ਤੋਂ ਇਲਾਵਾ, ਯੂ.ਏ.ਈ. ਵਿਚ ਭਾਰਤੀ ਵੀਜ਼ਾ ਲਈ ਆਪਣੀ ਰੱਦ ਦਰ ਵਿਚ ਵਾਧਾ ਦੇਖਿਆ ਗਿਆ, ਜੋ ਪਿਛਲੇ ਸਾਲ 6 ਫੀਸਦੀ ਤੱਕ ਪਹੁੰਚ ਗਿਆ।
ਵੀਜ਼ਾ ਨੀਤੀਆਂ ਵਿਚ ਤਬਦੀਲੀ ਅਤੇ ਮਹਾਂਮਾਰੀ ਤੋਂ ਬਾਅਦ ਰੱਦ ਹੋਣ ਵਾਲੇ ਇਹ ਸਭ ਤੋਂ ਵਧੇਰੇ ਵੀਜ਼ੇ ਦੱਸੇ ਜਾ ਰਹੇ ਹਨ। ਇਸ ਦੌਰਾਨ ਭਾਰਤੀਆਂ ਨੂੰ ਬਹੁਤ ਜ਼ਿਆਦਾ ਵਿੱਤੀ ਨੁਕਸਾਨ ਹੋਇਆ ਹੈ। ਆਸਟ੍ਰੇਲੀਆ, ਨਿਊਜ਼ੀਲੈਂਡ, ਯੂ.ਕੇ. ਅਤੇ ਯੂ.ਏ.ਈ. ਵਰਗੇ ਦੇਸ਼ਾਂ ਦੁਆਰਾ ਵੀਜ਼ਾ ਨਿਯਮਾਂ ਨੂੰ ਸਖ਼ਤ ਕਰਨਾ ਮਹਾਂਮਾਰੀ ਤੋਂ ਬਾਅਦ ਦੀ ਦੁਨੀਆਂ ਵਿਚ ਵਧੀ ਹੋਈ ਜਾਂਚ ਤੇ ਚੋਣ ਕਰਨ ਦੇ ਇੱਕ ਵਿਆਪਕ ਰੁਝਾਨ ਨੂੰ ਦਰਸਾਉਂਦਾ ਹੈ।