ਨਿਊਯਾਰਕ, 17 ਮਾਰਚ (ਪੰਜਾਬ ਮੇਲ)- ਨਿਊਯਾਰਕ ਵਿਚ ਭਾਰਤ ਦੇ ਕੌਂਸੁਲੇਟ ਜਨਰਲ ਤੇ ਫੈਡਰੇਸ਼ਨ ਆਫ਼ ਇੰਡੀਅਨ ਐਸੋਸੀਏਸ਼ਨ (ਐੱਫ.ਆਈ.ਏ.) ਨੇ ਕੌਮਾਂਤਰੀ ਮਹਿਲਾ ਦਿਵਸ ਮੌਕੇ ਭਾਰਤੀ ਮੂਲ ਦੀਆਂ ਚਾਰ ਉੱਘੀਆਂ ਮਹਿਲਾਵਾਂ ਨੂੰ ਵੱਖ-ਵੱਖ ਖੇਤਰਾਂ ਵਿਚ ਪਾਏ ਉਨ੍ਹਾਂ ਦੇ ਯੋਗਦਾਨ ਲਈ ਸਨਮਾਨਿਤ ਕੀਤਾ।
ਇਨ੍ਹਾਂ ਵਿਚ ‘ਜੇ.ਪੀ. ਮੌਰਗਨ’ ਵਿਚ ਸਲਾਹਕਾਰ ਅਤੇ ਰਲੇਵਾਂ ਤੇ ਅਧਿਗ੍ਰਹਿਣ ਦੀ ਆਲਮੀ ਪ੍ਰਮੁੱਖ ਅਨੂ ਆਇੰਗਰ, ‘ਏ ਸੀਰੀਜ਼ ਮੈਨੇਜਮੈਂਟ ਐਂਡ ਇਨਵੈਸਟਮੈਂਟਸ’ ਦੀ ਸੀ.ਈ.ਓ. ਤੇ ਬਾਨੀ ਅੰਜੁਲਾ ਅਚਾਰੀਆ, ‘ਐੱਲ.ਡੀ.ਪੀ. ਵੈਂਚਰਜ਼ ਦੀ ਸੀ.ਈ.ਓ. ਤੇ ਬਾਨੀ ਅਤੇ ‘ਵਿਮੈਨਸ ਐਂਟਰਪ੍ਰਿਨਿਓਰਸ਼ਿਪ ਡੇਅ ਆਰਗੇਨਾਈਜ਼ੇਸ਼ਨ ਦੀ ਬਾਨੀ ਵੈਂਡੀ ਡਾਇਮੰਡ ਤੇ ਸੀ.ਐੱਨ.ਬੀ.ਸੀ. ਦੀ ਪੱਤਰਕਾਰ ਤੇ ਮੇਜ਼ਬਾਨ ਸੀਮਾ ਮੋਦੀ ਸ਼ਾਮਲ ਹਨ।
ਨਿਊਯਾਰਕ ‘ਚ ਪਿਛਲੇ ਹਫ਼ਤੇ ਸੱਤਵੇਂ ਸਾਲਾਨਾ ਕੌਮਾਂਤਰੀ ਮਹਿਲਾ ਦਿਵਸ ਮੌਕੇ ਭਾਰਤੀ ਕੌਂਸਲੇਟ ਜਨਰਲ ਵੱਲੋਂ ਇਨ੍ਹਾਂ ਨੂੰ ਸਨਮਾਨਿਤ ਕੀਤਾ ਗਿਆ। ਐੱਫ.ਆਈ.ਏ. ਵੱਲੋਂ ਜਾਰੀ ਪ੍ਰੈੱਸ ਰਿਲੀਜ਼ ਵਿਚ ਕਿਹਾ ਗਿਆ ਕਿ ਕੇਂਦਰੀ ਮਹਿਲਾ ਤੇ ਬਾਲ ਵਿਕਾਸ ਮੰਤਰੀ ਅੰਨਪੂਰਨਾ ਦੇਵੀ ਇਸ ਪ੍ਰੋਗਰਾਮ ‘ਚ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਈ ਤੇ ਇਸ ਪ੍ਰੋਗਰਾਮ ਵਿਚ ‘ਵੱਖ-ਵੱਖ ਖੇਤਰਾਂ ਵਿਚ ਪਾਏ ਅਹਿਮ ਯੋਗਦਾਨ’ ਲਈ ਇਨ੍ਹਾਂ ਮਹਿਲਾਵਾਂ ਨੂੰ ਸਨਮਾਨਿਤ ਕੀਤਾ ਗਿਆ।