ਕਿਹਾ: ਇਕ ਦਿਨ ‘ਚ ਵਿਕੇ 1000 ਵੀਜ਼ਾ
ਵਾਸ਼ਿੰਗਟਨ, 25 ਮਾਰਚ (ਪੰਜਾਬ ਮੇਲ)- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਹਾਲ ਹੀ ਵਿਚ ਗੋਲਡਨ ਵੀਜ਼ਾ ਸਕੀਮ ਦਾ ਐਲਾਨ ਕੀਤਾ ਸੀ। ਇਸ ਯੋਜਨਾ ਤਹਿਤ 5 ਮਿਲੀਅਨ (50 ਲੱਖ ਡਾਲਰ) ਦਾ ਭੁਗਤਾਨ ਕਰਕੇ ਸਥਾਈ ਅਮਰੀਕੀ ਨਾਗਰਿਕਤਾ ਪ੍ਰਾਪਤ ਕੀਤੀ ਜਾ ਸਕਦੀ ਹੈ। ਹੁਣ ਟਰੰਪ ਪ੍ਰਸ਼ਾਸਨ ਦੇ ਇੱਕ ਸੀਨੀਅਰ ਮੰਤਰੀ ਨੇ ਦਾਅਵਾ ਕੀਤਾ ਹੈ ਕਿ ਇਹ ਯੋਜਨਾ ਹਿੱਟ ਸਾਬਤ ਹੋਈ ਹੈ। ਮੰਤਰੀ ਨੇ ਦੱਸਿਆ ਕਿ ਸਿਰਫ ਇੱਕ ਦਿਨ ਵਿਚ 1 ਹਜ਼ਾਰ ਗੋਲਡ ਕਾਰਡ ਵਿਕ ਗਏ ਹਨ ਅਤੇ ਲੋਕ ਗੋਲਡ ਕਾਰਡ ਲੈਣ ਲਈ ਲਾਈਨ ਵਿਚ ਖੜ੍ਹੇ ਹਨ। ਭਾਰਤੀ ਕਰੰਸੀ ਦੇ ਹਿਸਾਬ ਨਾਲ ਇਸ ਵੀਜ਼ੇ ਦੀ ਕੀਮਤ ਲਗਭਗ 42 ਕਰੋੜ 80 ਲੱਖ ਰੁਪਏ ਬਣਦੀ ਹੈ।
ਟਰੰਪ ਪ੍ਰਸ਼ਾਸਨ ਵਿਚ ਵਣਜ ਸਕੱਤਰ ਹਾਵਰਡ ਲੂਟਨਿਕ ਨੇ ਇੱਕ ਪੋਡਕਾਸਟ ਦੌਰਾਨ ਦੱਸਿਆ ਕਿ ਗੋਲਡ ਕਾਰਡ ਸਕੀਮ ਰਸਮੀ ਤੌਰ ‘ਤੇ ਦੋ ਹਫ਼ਤਿਆਂ ਬਾਅਦ ਸ਼ੁਰੂ ਹੋਵੇਗੀ, ਪਰ ਸਕੀਮ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਇੱਕ ਦਿਨ ਵਿਚ ਇੱਕ ਹਜ਼ਾਰ ਗੋਲਡ ਕਾਰਡ ਵੇਚੇ ਜਾ ਚੁੱਕੇ ਹਨ। ਗੋਲਡ ਕਾਰਡ ਸਕੀਮ ਦੇ ਫਾਇਦਿਆਂ ਬਾਰੇ ਦੱਸਦੇ ਹੋਏ ਲੁਟਨਿਕ ਨੇ ਕਿਹਾ, ”ਜੇਕਰ ਤੁਸੀਂ ਅਮਰੀਕੀ ਨਾਗਰਿਕ ਹੋ, ਤਾਂ ਤੁਹਾਨੂੰ ਗਲੋਬਲ ਟੈਕਸ ਅਦਾ ਕਰਨੇ ਪੈਣਗੇ ਅਤੇ ਬਾਹਰੋਂ ਲੋਕ ਗਲੋਬਲ ਟੈਕਸ ਅਦਾ ਕਰਨ ਲਈ ਅਮਰੀਕਾ ਨਹੀਂ ਆਉਣਗੇ।” ਜੇਕਰ ਤੁਹਾਡੇ ਕੋਲ ਗ੍ਰੀਨ ਕਾਰਡ ਹੈ ਜਾਂ ਹੁਣ ਗੋਲਡ ਕਾਰਡ ਹੈ ਤਾਂ ਤੁਸੀਂ ਅਮਰੀਕਾ ਦੇ ਸਥਾਈ ਨਿਵਾਸੀ ਬਣ ਸਕਦੇ ਹੋ ਅਤੇ ਤੁਹਾਨੂੰ ਟੈਕਸ ਵੀ ਨਹੀਂ ਦੇਣਾ ਪਵੇਗਾ। ਤੁਸੀਂ ਇੱਥੋਂ ਦੇ ਨਾਗਰਿਕ ਬਣ ਸਕਦੇ ਹੋ ਅਤੇ ਨਹੀਂ ਵੀ।
ਟਰੰਪ ਅਨੁਸਾਰ ਗੋਲਡ ਕਾਰਡ ਵੀਜ਼ਾ ਪਹਿਲਕਦਮੀ ਦਾ ਟੀਚਾ ਅਮੀਰ ਨਿਵੇਸ਼ਕਾਂ ਨੂੰ 10 ਲੱਖ ਵੀਜ਼ਾ ਵੇਚ ਕੇ 5 ਟ੍ਰਿਲੀਅਨ ਡਾਲਰ ਇਕੱਠਾ ਕਰਨਾ ਹੈ। ਅਮਰੀਕੀ ਰਾਸ਼ਟਰਪਤੀ ਦਾ ਮੰਨਣਾ ਹੈ ਕਿ ਇਹ ਪ੍ਰੋਗਰਾਮ ਅਮੀਰ ਵਿਅਕਤੀਆਂ ਨੂੰ ਆਕਰਸ਼ਿਤ ਕਰੇਗਾ, ਜੋ ਖਰਚ, ਨਿਵੇਸ਼ ਅਤੇ ਟੈਕਸ ਰਾਹੀਂ ਅਰਥਵਿਵਸਥਾ ਨੂੰ ਹੁਲਾਰਾ ਦੇਣਗੇ। ਇਨ੍ਹਾਂ ਗੋਲਡ ਕਾਰਡਾਂ ਨੂੰ ਵੇਚ ਕੇ ਇਕੱਠੇ ਕੀਤੇ ਪੈਸੇ ਦੀ ਵਰਤੋਂ ਦੇਸ਼ ਦੇ ਕਰਜ਼ੇ ਨੂੰ ਘਟਾਉਣ ਲਈ ਕੀਤੀ ਜਾਵੇਗੀ। ਗੋਲਡ ਕਾਰਡ ਜਾਰੀ ਕਰਨ ਤੋਂ ਪਹਿਲਾਂ ਬਿਨੈਕਾਰ ਦੀ ਪੂਰੀ ਜਾਂਚ ਕੀਤੀ ਜਾਵੇਗੀ ਅਤੇ ਇਹ ਦੇਖਿਆ ਜਾਵੇਗਾ ਕਿ ਬਿਨੈਕਾਰ ਕਾਨੂੰਨ ਦੀ ਪਾਲਣਾ ਕਰਦਾ ਹੈ ਜਾਂ ਨਹੀਂ।
ਜੇਕਰ ਗੋਲਡ ਕਾਰਡ ਧਾਰਕ ਗੈਰ-ਕਾਨੂੰਨੀ ਗਤੀਵਿਧੀਆਂ ਵਿਚ ਸ਼ਾਮਲ ਪਾਏ ਜਾਂਦੇ ਹਨ, ਤਾਂ ਉਨ੍ਹਾਂ ਦਾ ਗੋਲਡ ਕਾਰਡ ਵੀ ਸਥਾਈ ਤੌਰ ‘ਤੇ ਰੱਦ ਕੀਤਾ ਜਾ ਸਕਦਾ ਹੈ। ਲੁਟਨਿਕ ਨੇ ਕਿਹਾ, ”ਦੁਨੀਆਂ ਵਿਚ 37 ਮਿਲੀਅਨ ਲੋਕ ਹਨ, ਜੋ ਕਾਰਡ ਖਰੀਦਣ ਦੇ ਯੋਗ ਹਨ… ਰਾਸ਼ਟਰਪਤੀ ਸੋਚਦੇ ਹਨ ਕਿ ਅਸੀਂ ਇੱਕ ਮਿਲੀਅਨ ਕਾਰਡ ਵੇਚ ਸਕਦੇ ਹਾਂ।” ਲੁਟਨਿਕ ਨੇ ਕਿਹਾ, ”ਕੱਲ੍ਹ ਮੈਂ ਇੱਕ ਹਜ਼ਾਰ ਕਾਰਡ ਵੇਚੇ।” ਰਿਪੋਰਟ ਅਨੁਸਾਰ ਪ੍ਰੋਗਰਾਮ ਦੇ ਫੰਡਾਂ ਦਾ ਉਦੇਸ਼ ਅਮਰੀਕੀ ਰਾਸ਼ਟਰੀ ਕਰਜ਼ੇ ਨੂੰ ਘਟਾਉਣਾ ਹੈ, ਜੋ ਕਿ ਵਰਤਮਾਨ ਵਿਚ 36.2 ਟ੍ਰਿਲੀਅਨ ਡਾਲਰ ਹੈ।
ਲੁਟਨਿਕ ਨੇ ਕਿਹਾ ਕਿ ਟਰੰਪ ਨੂੰ ਗੋਲਡ ਕਾਰਡ ਦਾ ਵਿਚਾਰ ਨਿਵੇਸ਼ਕ ਜੌਨ ਪਾਲਸਨ ਨਾਲ ਮੁਲਾਕਾਤ ਦੌਰਾਨ ਆਇਆ ਸੀ। ਫਿਰ ਲੁਟਨਿਕ ਨੂੰ ਇਸ ਨੂੰ ਕਿਵੇਂ ਕੰਮ ਕਰਨਾ ਹੈ, ਇਹ ਪਤਾ ਲਗਾਉਣ ਲਈ ਸ਼ਾਮਲ ਕੀਤਾ ਗਿਆ। ਲੁਟਨਿਕ ਨੇ ਕਿਹਾ ਕਿ ਐਲੋਨ ਮਸਕ ਸਾਫਟਵੇਅਰ ਬਣਾ ਰਿਹਾ ਹੈ। ਲੁਟਨਿਕ ਨੇ ਵਿਸਥਾਰ ਨਾਲ ਦੱਸਿਆ ਕਿ ਗੋਲਡ ਕਾਰਡ ਰਵਾਇਤੀ ਗ੍ਰੀਨ ਕਾਰਡ ਦੀ ਥਾਂ ਲੈ ਲਵੇਗਾ ਅਤੇ ਇਸਦੇ ਧਾਰਕਾਂ ਨੂੰ ਅਮਰੀਕਾ ਵਿਚ ਸਥਾਈ ਨਿਵਾਸ ਦਿੱਤਾ ਜਾਵੇਗਾ। ਹਾਲਾਂਕਿ ਕਾਰਡ ਧਾਰਕ ਨਾਗਰਿਕਤਾ ਪ੍ਰਾਪਤ ਕਰਨ ਦੀ ਕੋਸ਼ਿਸ਼ ਕਰ ਸਕਦੇ ਹਨ, ਪਰ ਉਨ੍ਹਾਂ ਕਿਹਾ ਕਿ ਜ਼ਿਆਦਾਤਰ ਲੋਕ ਅਮਰੀਕੀ ਗਲੋਬਲ ਟੈਕਸ ਤੋਂ ਬਚਣ ਲਈ ਅਜਿਹਾ ਨਹੀਂ ਕਰਨਾ ਚਾਹੁਣਗੇ। ਹਰੇਕ ਕਾਰਡ ਦੀ ਕੀਮਤ 5 ਮਿਲੀਅਨ ਡਾਲਰ ਹੈ ਅਤੇ ਇਹ ਅਮਰੀਕਾ ਵਿਚ ਅਣਮਿੱਥੇ ਸਮੇਂ ਲਈ ਰਹਿਣ ਦਾ ਅਧਿਕਾਰ ਦੇਵੇਗਾ।