#CANADA

ਕੈਨੇਡਾ ਨੇ ਪਰਿਵਾਰਕ ਵਰਕ ਪਰਮਿਟ ਨਿਯਮ ਕੀਤੇ ਸਖ਼ਤ

ਓਟਾਵਾ, 27 ਜਨਵਰੀ (ਪੰਜਾਬ ਮੇਲ)- ਕੈਨੇਡਾ ਪ੍ਰਵਾਸੀਆਂ ਪ੍ਰਤੀ ਆਪਣੇ ਨਿਯਮ ਸਖ਼ਤ ਕਰਦਾ ਜਾ ਰਿਹਾ ਹੈ। ਹਾਲ ਹੀ ਵਿਚ ਕੈਨੇਡਾ ਨੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਅਤੇ ਵਿਦੇਸ਼ੀ ਕਾਮਿਆਂ ਦੇ ਜੀਵਨ ਸਾਥੀਆਂ ਲਈ ਫੈਮਿਲੀ ਓਪਨ ਵਰਕ ਪਰਮਿਟ (ਓ.ਡਬਲਯੂ.ਪੀ.) ਲਈ ਨਿਯਮਾਂ ਨੂੰ ਸਖ਼ਤ ਕਰ ਦਿੱਤਾ ਹੈ, ਜਿਸ ਨਾਲ ਯੋਗਤਾ ਨੂੰ ਘੱਟ ਗਿਣਤੀ ਵਿਚ ਬਿਨੈਕਾਰਾਂ ਤੱਕ ਸੀਮਤ ਕਰ ਦਿੱਤਾ ਗਿਆ ਹੈ। ਕੈਨੇਡਾ ਵਿਚ ਰੁਜ਼ਗਾਰ ਦੇ ਮੌਕੇ ਭਾਲਣ ਵਾਲੇ ਭਾਰਤੀ ਵੀ ਸੋਧੇ ਹੋਏ ਨਿਯਮਾਂ ਦੇ ਘੇਰੇ ਵਿਚ ਆਉਣਗੇ। ਇਹ ਬਦਲਾਅ ਜੋ ਜਨਵਰੀ 2025 ਤੋਂ ਲਾਗੂ ਹੋਣਗੇ, ਦੇਸ਼ ਦੀ ਇਮੀਗ੍ਰੇਸ਼ਨ ਨੀਤੀ ਦੇ ਵਿਆਪਕ ਸੁਧਾਰ ਦਾ ਹਿੱਸਾ ਹਨ।
21 ਜਨਵਰੀ ਤੋਂ ਲਾਗੂ ਸੋਧੇ ਹੋਏ ਓ.ਡਬਲਯੂ.ਪੀ. ਨਿਯਮ ਇੱਕ ਅੱਪਡੇਟ ਕੀਤੀ ਇਮੀਗ੍ਰੇਸ਼ਨ ਯੋਜਨਾ ਦੇ ਨਾਲ ਆਉਂਦੇ ਹਨ, ਜੋ ਹਰ ਸਾਲ ਕੈਨੇਡਾ ਵਿਚ ਸਵੀਕਾਰ ਕੀਤੇ ਜਾਣ ਵਾਲੇ ਸਥਾਈ ਨਿਵਾਸੀਆਂ ਦੀ ਗਿਣਤੀ ਨੂੰ ਘਟਾਉਂਦੀ ਹੈ। ਕੈਨੇਡਾ ਇਸ ਸਾਲ 395,000 ਨਵੇਂ ਸਥਾਈ ਨਿਵਾਸੀਆਂ ਦਾ ਸਵਾਗਤ ਕਰਨ ਦੀ ਉਮੀਦ ਕਰਦਾ ਹੈ, ਜੋ ਕਿ ਇਸਦੇ ਪਿਛਲੇ 500,000 ਦੇ ਟੀਚੇ ਤੋਂ ਬਹੁਤ ਘੱਟ ਹੈ। ਇਹ ਟੀਚਾ 2026 ਵਿਚ 380,000 ਅਤੇ 2027 ਵਿਚ 365,000 ਤੱਕ ਘਟਾ ਦਿੱਤਾ ਜਾਵੇਗਾ।
ਫੈਮਿਲੀ ਓਪਨ ਵਰਕ ਪਰਮਿਟ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਅਤੇ ਵਿਦੇਸ਼ੀ ਕਾਮਿਆਂ ਦੇ ਜੀਵਨ ਸਾਥੀ ਨੂੰ ਕਿਸੇ ਇੱਕ ਨੌਕਰੀ ਜਾਂ ਮਾਲਕ (ਕੰਪਨੀ) ਨਾਲ ਜੁੜੇ ਬਿਨਾਂ ਕੈਨੇਡਾ ਭਰ ਵਿਚ ਜ਼ਿਆਦਾਤਰ ਮਾਲਕਾਂ ਲਈ ਕੰਮ ਕਰਨ ਦੀ ਆਗਿਆ ਦਿੰਦਾ ਹੈ। ਪਹਿਲਾਂ ਸਾਰੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਅਤੇ ਬਹੁਤ ਸਾਰੇ ਵਿਦੇਸ਼ੀ ਕਾਮਿਆਂ ਦੇ ਜੀਵਨ ਸਾਥੀ ਓਪਨ ਵਰਕ ਪਰਮਿਟ ਲਈ ਅਰਜ਼ੀ ਦੇ ਸਕਦੇ ਸਨ। ਹਾਲਾਂਕਿ ਨਵੇਂ ਨਿਯਮਾਂ ਦੇ ਤਹਿਤ ਯੋਗਤਾ ਨੂੰ ਕਾਫ਼ੀ ਹੱਦ ਤੱਕ ਸੀਮਤ ਕਰ ਦਿੱਤਾ ਗਿਆ ਹੈ।
ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੇ ਜੀਵਨ ਸਾਥੀ ਨੂੰ ਹੁਣ ਓ.ਡਬਲਯੂ.ਪੀ. ਲਈ ਯੋਗਤਾ ਪੂਰੀ ਕਰਨ ਲਈ ਹੇਠ ਲਿਖੀਆਂ ਸ਼ਰਤਾਂ ਵਿਚੋਂ ਇੱਕ ਪੂਰੀ ਕਰਨੀ ਪਵੇਗੀ, ਜੋ ਕਿ ਹੇਠ ਲਿਖੇ ਅਨੁਸਾਰ ਹਨ:-
-ਅੰਤਰਰਾਸ਼ਟਰੀ ਵਿਦਿਆਰਥੀ ਘੱਟੋ-ਘੱਟ 16 ਮਹੀਨਿਆਂ ਦੇ ਮਾਸਟਰ ਪ੍ਰੋਗਰਾਮ ਵਿਚ ਦਾਖਲ ਹੋਵੇ।
-ਵਿਦਿਆਰਥੀ ਡਾਕਟਰੇਟ ਪ੍ਰੋਗਰਾਮ ਕਰ ਰਿਹਾ ਹੋਵੇ।
-ਵਿਦਿਆਰਥੀਆਂ ਨੂੰ ਖਾਸ ਪੇਸ਼ੇਵਰ ਜਾਂ ਯੋਗ ਪ੍ਰੋਗਰਾਮਾਂ ਵਿਚ ਦਾਖਲ ਹੋਣਾ ਚਾਹੀਦਾ ਹੈ।
ਵਿਦੇਸ਼ੀ ਕਾਮਿਆਂ ਦੇ ਜੀਵਨ ਸਾਥੀ ਤਾਂ ਹੀ ਯੋਗ ਮੰਨੇ ਜਾਂਦੇ ਹਨ, ਜੇਕਰ ਉਹ ਕਰਮਚਾਰੀ ‘ਸਿਖਲਾਈ, ਸਿੱਖਿਆ, ਤਜ਼ਰਬਾ ਅਤੇ ਜ਼ਿੰਮੇਵਾਰੀਆਂ’ (TEER) 0 ਜਾਂ 1 ਦੇ ਅਧੀਨ ਵਰਗੀਕ੍ਰਿਤ ਨੌਕਰੀ ਕਰਦਾ ਹੈ ਜਾਂ ਮਜ਼ਦੂਰਾਂ ਦੀ ਘਾਟ ਦਾ ਸਾਹਮਣਾ ਕਰ ਰਹੇ ਖੇਤਰਾਂ ਜਾਂ ਸਰਕਾਰੀ ਤਰਜੀਹਾਂ ਵਜੋਂ ਪਛਾਣੇ ਗਏ ਖੇਤਰਾਂ ਦੱਸੀ ਗਈ TEER 2 ਜਾਂ 3 ਭੂਮਿਕਾਵਾਂ ਵਿਚ ਕੰਮ ਕਰਦਾ ਹੈ। ਇਨ੍ਹਾਂ ਖੇਤਰਾਂ ਵਿਚ ਕੁਦਰਤੀ ਵਿਗਿਆਨ, ਉਸਾਰੀ, ਸਿਹਤ ਸੰਭਾਲ, ਕੁਦਰਤੀ ਸਰੋਤ, ਸਿੱਖਿਆ, ਖੇਡਾਂ ਅਤੇ ਫੌਜ ਸ਼ਾਮਲ ਹਨ।
ਪਿਛਲੇ ਮਾਪਦੰਡਾਂ ਤਹਿਤ ਪ੍ਰਵਾਨਿਤ ਓ.ਡਬਲਯੂ.ਪੀ. ਆਪਣੀ ਮਿਆਦ ਪੁੱਗਣ ਤੱਕ ਵੈਧ ਰਹਿਣਗੇ। ਕੈਨੇਡਾ ਵਿਚ ਪਹਿਲਾਂ ਤੋਂ ਹੀ ਰਹਿ ਰਹੇ ਪਰਿਵਾਰਕ ਮੈਂਬਰਾਂ ਲਈ ਨਵੀਨੀਕਰਨ ਸੰਭਵ ਹੈ, ਬਸ਼ਰਤੇ ਉਹ ਆਪਣੇ ਮੌਜੂਦਾ ਪਰਮਿਟ ਲਈ ਮੁੱਢਲੇ ਮਾਪਦੰਡ ਪੂਰੇ ਕਰਦੇ ਹੋਣ। ਇਨ੍ਹਾਂ ਮਾਮਲਿਆਂ ਵਿਚ ਨਵੀਨੀਕਰਨ ਦੀ ਮਿਆਦ ਮੁੱਖ ਬਿਨੈਕਾਰ ਦੇ ਅਧਿਐਨ ਜਾਂ ਵਰਕ ਪਰਮਿਟ ਨਾਲ ਮੇਲ ਖਾਂਦੀ ਹੋਣੀ ਚਾਹੀਦੀ ਹੈ। ਕਰਮਚਾਰੀਆਂ ਦੇ ਜੀਵਨ ਸਾਥੀ ਜੋ ਮੁਕਤ ਵਪਾਰ ਸਮਝੌਤੇ ਦੇ ਅਧੀਨ ਆਉਂਦੇ ਹਨ ਜਾਂ ਸਥਾਈ ਨਿਵਾਸ ਵਿਚ ਚਲੇ ਜਾਂਦੇ ਹਨ, ਇਨ੍ਹਾਂ ਤਬਦੀਲੀਆਂ ਤੋਂ ਪ੍ਰਭਾਵਿਤ ਨਹੀਂ ਹੁੰਦੇ। ਪਰਿਵਾਰਕ ਮੈਂਬਰ ਜੋ ਹੁਣ ਓ.ਡਬਲਯੂ.ਪੀ. ਲਈ ਯੋਗ ਨਹੀਂ ਹਨ, ਉਹ ਅਜੇ ਵੀ ਕੈਨੇਡਾ ਦੇ ਮੌਜੂਦਾ ਪ੍ਰੋਗਰਾਮਾਂ ਦੇ ਤਹਿਤ ਹੋਰ ਕਿਸਮਾਂ ਦੇ ਵਰਕ ਪਰਮਿਟਾਂ ਲਈ ਅਰਜ਼ੀ ਦੇ ਸਕਦੇ ਹਨ।