ਨਿਊਯਾਰਕ, 25 ਸਤੰਬਰ (ਰਾਜ ਗੋਗਨਾ/ਪੰਜਾਬ ਮੇਲ)-ਬੀਤੇ ਦਿਨੀਂ ਅਮਰੀਕਾ ਦੇ ਇੰਡੀਆਨਾ ਸਟੇਟ ਦੀ ਪੁਲਿਸ ਨੇ ਰੂਟ 1-94 ‘ਤੇ ਇੱਕ ਰੂਟੀਨ ‘ਚ ਵਪਾਰਕ ਵਾਹਨ ਸਟਾਪ ‘ਤੇ ਇੱਕ ਟਰੱਕ ਦੀ ਜਾਂਚ ਪੜਤਾਲ ਦੌਰਾਨ ਨਸ਼ੀਲੇ ਪਦਾਰਥਾਂ ਦਾ ਇੱਕ ਮਹੱਤਵਪੂਰਨ ਪਰਦਾਫਾਸ਼ ਕੀਤਾ ਹੈ। ਸਵੇਰੇ ਕਰੀਬ 9:30 ਵਜੇ ਦੇ ਕਰੀਬ ਵਪਾਰਕ ਵਹੀਕਲ ਇਨਫੋਰਸਮੈਂਟ ਡਿਵੀਜ਼ਨ ਦੇ ਅਧਿਕਾਰੀਆਂ ਨੇ ਸਟੇਟ ਰੋਡ 49 ਤੋਂ ਦੋ ਮੀਲ ਦੀ ਦੂਰੀ ‘ਤੇ ਪੂਰਬ ਵਿਚ ਸਥਿਤ ਈਸਟਬਾਊਂਡ ਵੇਟ ਸਟੇਸ਼ਨ ‘ਤੇ ਨਿਯਮਾਂ ਦੀ ਉਲੰਘਣਾ ਕਰਨ ‘ਤੇ ਇੱਕ ਟਰੱਕ ਨੂੰ ਰੋਕਿਆ। ਇਸ ਦੌਰਾਨ ਜਦੋਂ ਇੰਡੀਆਨਾ ਰਾਜ ਦੀ ਪੁਲਿਸ ਨੇ ਕੇ-9 ਨਾਮੀਂ ਖੋਜੀ ਕੁੱਤਿਆਂ ਦੇ ਯੂਨਿਟ ਨੂੰ ਵਾਹਨ ਦੇ ਆਲੇ-ਦੁਆਲੇ ਚੈੱਕ ਕਰਨ ਲਈ ਘੁਮਾਇਆ, ਤਾਂ ਕੁੱਤਿਆ ਨੇ ਅਫਸਰਾਂ ਨੂੰ ਇਸ ਟਰੱਕ ਵਿਚ ਨਸ਼ਿਆਂ ਦੀ ਮੌਜੂਦਗੀ ਬਾਰੇ ਸੁਚੇਤ ਕਰ ਕੀਤਾ। ਜਦੋਂ ਟਰੱਕ ਟ੍ਰੇਲਰ ਦੀ ਤਲਾਸ਼ੀ ਲਈ ਗਈ ਅਤੇ ਪੁਲਿਸ ਨੂੰ ਉਸ ਵਿਚੋਂ 123.9 ਕਿਲੋਗ੍ਰਾਮ ਚਿੱਟਾ ਪਾਊਡਰ ਪਦਾਰਥ ਮਿਲਿਆ, ਜੋ ਬਾਅਦ ਵਿਚ ਫੀਲਡ ਟੈਸਟਾਂ ਦੁਆਰਾ ਟੈਸਟ ਕਰਨ ‘ਤੇ ਉਨ੍ਹਾਂ ਵੱਲੋ ਇਹ ਪਦਾਰਥ ਕੋਕੀਨ ਹੋਣ ਦੀ ਪੁਸ਼ਟੀ ਕੀਤੀ ਗਈ। ਟਰੱਕ ਚਾਲਕ ਕੈਨੇਡਾ ਦਾ ਰਹਿਣ ਵਾਲਾ 49 ਸਾਲਾ ਨਸੀਬ ਚਿਸਤੀ ਹੈ। ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ, ਜੋ ਪੋਰਟਰ ਕਾਉਂਟੀ ਨਾਂ ਦੀ ਜੇਲ੍ਹ ਵਿਚ ਬੰਦ ਹੈ। ਹੁਣ  ਉਸ ਨੂੰ ਗੰਭੀਰ ਦੋਸ਼ਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ, ਜਿਸ ਵਿਚ ਕੋਕੀਨ ਦੇ ਲੈਵਲ ਦੇ 3 ਦੇ ਅਪਰਾਧਿਕ ਸੰਗੀਨ ਜੁਰਮ ਉਸ ‘ਤੇ ਲੱਗੇ ਹਨ। ਦੋਸ਼ ਸਾਬਤ ਹੋਣ ‘ਤੇ ਉਸ ਨੂੰ ਲੰਮੀ ਜੇਲ੍ਹ ਦੀ ਸਜ਼ਾ ਹੋ ਸਕਦੀ ਹੈ।