ਵਾਸ਼ਿੰਗਟਨ, 27 ਜੁਲਾਈ (ਪੰਜਾਬ ਮੇਲ)- ਅਮਰੀਕੀ ਖੇਤੀਬਾੜੀ ਵਿਭਾਗ (ਯੂ.ਐੱਸ.ਡੀ.ਏ.) ਨੇ ਐਲਾਨ ਕੀਤਾ ਹੈ ਕਿ ਨਿਊ ਵਰਲਡ ਸਕਰੂਵਰਮ (ਐਨ.ਡਬਲਯੂ.ਐਸ.) ਦੇ ਫੈਲਾਅ ਕਾਰਨ ਮਈ ਮਹੀਨੇ ਤੋਂ ਬੰਦ ਕੀਤੇ ਗਏ ਮੈਕਸੀਕੋ ਸਰਹੱਦ ਦੇ ਪਸ਼ੂ ਆਯਾਤ ਕੇਂਦਰਾਂ ਨੂੰ ਹੁਣ ਪੜਾਅਵਾਰ ਢੰਗ ਨਾਲ ਮੁੜ ਖੋਲ੍ਹਿਆ ਜਾਵੇਗਾ।
ਯੂ.ਐੱਸ.ਡੀ.ਏ. ਮੁਤਾਬਕ, 24 ਅਗਸਤ ਤੋਂ ਐਰੀਜ਼ੋਨਾ ਦੇ ਡਗਲਸ ਸਥਿਤ ਪਸ਼ੂ ਆਯਾਤ ਬੰਦਰਗਾਹ ਨੂੰ ਸਭ ਤੋਂ ਪਹਿਲਾਂ ਖੋਲ੍ਹਿਆ ਜਾਵੇਗਾ। ਇਸ ਤੋਂ ਬਾਅਦ ਨਿਊ ਮੈਕਸੀਕੋ ਦੇ ਸਾਂਤਾ ਤੇਰੇਸਾ ਅਤੇ ਕੋਲੰਬਸ ਵਾਲੇ ਬਾਰਡਰ ਪੋਰਟ ਵੀ ਖੋਲ੍ਹੇ ਜਾਣਗੇ, ਜੇਕਰ ਮੈਕਸੀਕੋ ਸਕਰੂਵਰਮ ਰੋਕਥਾਮ ਲਈ ਦੋਵੇਂ ਦੇਸ਼ਾਂ ਦੇ ਸਾਂਝੇ ਐਕਸ਼ਨ ਪਲਾਨ ਦੀ ਪੂਰੀ ਪਾਲਣਾ ਕਰਦਾ ਹੈ।
ਯੂ.ਐੱਸ.ਡੀ.ਏ. ਨੇ ਕਿਹਾ ਹੈ ਕਿ ਅਮਰੀਕਾ ਵਿਚ ਦਾਖਲ ਹੋਣ ਵਾਲੇ ਹਰ ਪਸ਼ੂ ਦੀ ਪੂਰੀ ਜਾਂਚ ਕੀਤੀ ਜਾਵੇਗੀ, ਤਾਂ ਜੋ ਸਕਰੂਵਰਮ ਸੰਕਰਮਣ ਦਾ ਕੋਈ ਵੀ ਲੱਛਣ ਮਿਲਣ ‘ਤੇ ਤੁਰੰਤ ਕਾਰਵਾਈ ਕੀਤੀ ਜਾ ਸਕੇ।
ਯੂ.ਐੱਸ.ਡੀ.ਏ. ਸਕੱਤਰ ਬਰੂਕ ਰੋਲਿਨਜ਼ ਨੇ ਕਿਹਾ ਕਿ ਟਰੰਪ ਪ੍ਰਸ਼ਾਸਨ ਦੀ ਪਹਿਲੀ ਤਰਜੀਹ ਅਮਰੀਕੀ ਪਸ਼ੂਧਨ ਨੂੰ ਇਸ ਖ਼ਤਰਨਾਕ ਕੀੜੇ ਤੋਂ ਬਚਾਉਣਾ ਹੈ। ਉਨ੍ਹਾਂ ਕਿਹਾ ਕਿ ਸਰਹੱਦੀ ਪੋਰਟਾਂ ਨੂੰ ਬੰਦ ਰੱਖਣਾ ਇੱਕ ਮੁਸ਼ਕਲ ਪਰ ਜ਼ਰੂਰੀ ਕਦਮ ਸੀ, ਜਿਸ ਨਾਲ ਅਮਰੀਕੀ ਪਸ਼ੂ ਉਦਯੋਗ ਦੀ ਸੁਰੱਖਿਆ ਯਕੀਨੀ ਬਣਾਈ ਗਈ।
ਵਿਭਾਗ ਦੇ ਅੰਕੜਿਆਂ ਅਨੁਸਾਰ 3 ਜੂਨ ਤੋਂ ਹੁਣ ਤੱਕ ਅਮਰੀਕਾ ਵਿਚ ਸਕਰੂਵਰਮ ਦੇ 42 ਮਾਮਲੇ ਸਾਹਮਣੇ ਆਏ ਹਨ। ਇਨ੍ਹਾਂ ਵਿਚੋਂ ਹੁਣ ਸਿਰਫ਼ 9 ਮਾਮਲੇ ਹੀ ਸਰਗਰਮ ਹਨ। ਜੂਨ ਵਿਚ 31 ਅਤੇ ਜੁਲਾਈ ਵਿਚ 11 ਮਾਮਲੇ ਦਰਜ ਹੋਏ। ਇਨ੍ਹਾਂ ਵਿਚੋਂ ਇੱਕ ਮਾਮਲਾ ਨਿਊ ਮੈਕਸੀਕੋ ਅਤੇ ਬਾਕੀ ਟੈਕਸਾਸ ਵਿਚ ਮਿਲੇ ਹਨ।
ਉੱਧਰ ਸੀ.ਡੀ.ਸੀ. ਨੇ ਕਿਹਾ ਹੈ ਕਿ ਇਸ ਸਮੇਂ ਅਮਰੀਕਾ ਵਿਚ ਮਨੁੱਖਾਂ ਅਤੇ ਪਸ਼ੂਆਂ ਲਈ ਸਕਰੂਵਰਮ ਦਾ ਖ਼ਤਰਾ ਬਹੁਤ ਘੱਟ ਹੈ ਅਤੇ ਇਸ ਪ੍ਰਕੋਪ ਨਾਲ ਜੁੜਿਆ ਮਨੁੱਖਾਂ ਵਿਚ ਇੱਕ ਵੀ ਸੰਕਰਮਣ ਦਰਜ ਨਹੀਂ ਹੋਇਆ।
ਹਾਲਾਂਕਿ ਮੱਧ ਅਮਰੀਕਾ ਅਤੇ ਮੈਕਸੀਕੋ ਵਿਚ ਹਾਲਾਤ ਕਾਫ਼ੀ ਗੰਭੀਰ ਹਨ। ਉੱਥੇ 1.89 ਲੱਖ ਤੋਂ ਵੱਧ ਪਸ਼ੂਆਂ ਅਤੇ 2,290 ਲੋਕਾਂ ਵਿਚ ਸਕਰੂਵਰਮ ਦੇ ਮਾਮਲੇ ਦਰਜ ਕੀਤੇ ਜਾ ਚੁੱਕੇ ਹਨ।