ਵਾਸ਼ਿੰਗਟਨ, 19 ਅਕਤੂਬਰ (ਪੰਜਾਬ ਮੇਲ)- ਅਮਰੀਕਾ ਵਿਚ ਗ੍ਰੀਨ ਕਾਰਡ ਲਾਟਰੀ ਦੀ ਉਡੀਕ ਕਰ ਰਹੇ ਲੋਕਾਂ ਲਈ ਇੱਕ ਅਹਿਮ ਖ਼ਬਰ ਸਾਹਮਣੇ ਆਈ ਹੈ। ਕੈਲੀਫੋਰਨੀਆ ਦੀ ਸੰਘੀ ਅਦਾਲਤ ਨੇ ਅਮਰੀਕੀ ਵਿਦੇਸ਼ ਵਿਭਾਗ ਨੂੰ ਸਾਲ 2027 ਦੀ ਗ੍ਰੀਨ ਕਾਰਡ ਲਾਟਰੀ ਮੁੜ ਸ਼ੁਰੂ ਕਰਨ ਦਾ ਮੁੱਢਲਾ ਹੁਕਮ ਦਿੱਤਾ ਹੈ।
ਅਦਾਲਤ ਵਿਚ ਇਹ ਮਾਮਲਾ ਉਸ ਸਮੇਂ ਪਹੁੰਚਿਆ, ਜਦੋਂ ਸਰਕਾਰ ਵੱਲੋਂ ਇਸ ਸਾਲ ਗ੍ਰੀਨ ਕਾਰਡ ਲਾਟਰੀ ਲਈ ਰਜਿਸਟ੍ਰੇਸ਼ਨ ਸ਼ੁਰੂ ਨਹੀਂ ਕੀਤੀ ਗਈ ਸੀ। ਇਸ ਦੇਰੀ ਨੂੰ ਅਦਾਲਤ ਵਿਚ ਚੁਣੌਤੀ ਦਿੱਤੀ ਗਈ ਸੀ।
ਅਦਾਲਤੀ ਹੁਕਮ ਮੁਤਾਬਕ ਵਿਦੇਸ਼ ਵਿਭਾਗ ਨੂੰ 29 ਅਕਤੂਬਰ 2026 ਤੱਕ ਲਾਟਰੀ ਦੀ ਰਜਿਸਟ੍ਰੇਸ਼ਨ ਬਾਰੇ ਸਰਕਾਰੀ ਜਾਣਕਾਰੀ ਜਾਰੀ ਕਰਨੀ ਹੋਵੇਗੀ। ਪਹਿਲੀ ਨਵੰਬਰ ਤੱਕ ਆਨਲਾਈਨ ਅਰਜ਼ੀਆਂ ਲੈਣ ਦੀ ਪ੍ਰਕਿਰਿਆ ਸ਼ੁਰੂ ਕਰਨੀ ਪਵੇਗੀ। ਇਹ ਪ੍ਰਕਿਰਿਆ ਘੱਟੋ-ਘੱਟ 30 ਦਿਨ ਚੱਲੇਗੀ।
ਇਸ ਤੋਂ ਇਲਾਵਾ ਚੁਣੇ ਗਏ ਲੋਕਾਂ ਨੂੰ ਤਿੰਨ ਦਸੰਬਰ ਤੱਕ ਜਾਣਕਾਰੀ ਦੇਣ ਦੀ ਸਮਾਂ-ਹੱਦ ਵੀ ਰੱਖੀ ਗਈ ਹੈ।
ਗ੍ਰੀਨ ਕਾਰਡ ਲਾਟਰੀ ਰਾਹੀਂ ਹਰ ਸਾਲ ਯੋਗ ਦੇਸ਼ਾਂ ਦੇ ਲੋਕਾਂ ਨੂੰ ਅਮਰੀਕਾ ਵਿਚ ਪੱਕੇ ਹੋਣ ਦਾ ਮੌਕਾ ਮਿਲਦਾ ਹੈ। ਹਾਲਾਂਕਿ ਹਰ ਦੇਸ਼ ਦੇ ਨਾਗਰਿਕ ਇਸ ਲਾਟਰੀ ਵਿਚ ਹਿੱਸਾ ਨਹੀਂ ਲੈ ਸਕਦੇ। ਭਾਰਤ ਵਿਚ ਜਨਮੇ ਜ਼ਿਆਦਾਤਰ ਲੋਕ ਆਮ ਤੌਰ ਉੱਤੇ ਇਸ ਲਈ ਯੋਗ ਨਹੀਂ ਹੁੰਦੇ।
ਇਮੀਗ੍ਰੇਸ਼ਨ ਮਾਹਿਰਾਂ ਮੁਤਾਬਕ ਲਾਟਰੀ ਵਿਚ ਚੁਣੇ ਜਾਣ ਨਾਲ ਗ੍ਰੀਨ ਕਾਰਡ ਮਿਲਣ ਦੀ ਗਾਰੰਟੀ ਨਹੀਂ ਹੁੰਦੀ। ਇਸ ਲਈ ਹੋਰ ਕਾਨੂੰਨੀ ਸ਼ਰਤਾਂ ਵੀ ਪੂਰੀਆਂ ਕਰਨੀਆਂ ਪੈਂਦੀਆਂ ਹਨ।
ਇਹ ਅਦਾਲਤ ਦਾ ਮੁੱਢਲਾ ਹੁਕਮ ਹੈ, ਅੰਤਿਮ ਫ਼ੈਸਲਾ ਨਹੀਂ। ਸਰਕਾਰ ਇਸ ਖ਼ਿਲਾਫ਼ ਅਪੀਲ ਕਰ ਸਕਦੀ ਹੈ। ਲੋਕਾਂ ਨੂੰ ਸਿਰਫ਼ ਸਰਕਾਰੀ ਵੈੱਬਸਾਈਟ ਤੋਂ ਹੀ ਜਾਣਕਾਰੀ ਲੈਣ ਦੀ ਸਲਾਹ ਦਿੱਤੀ ਗਈ ਹੈ।