ਬਾਇਡਨ ਨੇ ‘ਓਬਾਮਾ ਕੇਅਰ’ ਦਾ ਘੇਰਾ ਵਧਾਇਆ

148
Share

ਕੋਲੰਬਸ, 25 ਮਾਰਚ (ਪੰਜਾਬ ਮੇਲ)- ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਕਿਹਾ ਕਿ ਉਨ੍ਹਾਂ ਦਾ 1.9 ਅਰਬ ਡਾਲਰ ਦਾ ਰਾਹਤ ਪੈਕੇਜ ਬਰਾਕ ਓਬਾਮਾ ਪ੍ਰਸਾਸ਼ਨ ਦੇ ‘ਐਫੋਰਡਏਬਲ ਕੇਅਰ ਐਕਟ’ ਦੇ ਵਾਅਦੇ ’ਤੇ ਆਧਾਰਿਤ ਹੋਵੇਗਾ, ਜੋ 11 ਸਾਲ ਪਹਿਲਾਂ ਕਾਨੂੰਨ ਬਣ ਗਿਆ ਸੀ। ਬਾਇਡਨ ਦਾ ਕੋਵਿਡ-19 ਰਾਹਤ ਕਾਨੂੰਨ ‘ਓਬਾਮਾਕੇਅਰ’ ਤਹਿਤ ਮਿਲਣ ਵਾਲੀਆਂ ਰਾਹਤਾਂ ਨੂੰ ਹੁਲਾਰਾ ਦੇੇਵੇਗਾ, ਜਿਸ ਨਾਲ ਕਰੋਨਾ ਮਹਾਮਾਰੀ ਕਾਰਨ ਲੰਬੇ ਸਮੇਂ ਵਿੱਤੀ ਅਤੇ ਹੋਰ ਮੁਸ਼ਕਲਾਂ ਝੱਲਾਂ ਲੱਖਾਂ ਲੋਕਾਂ ਨੂੰ ਰਾਹਤ ਮਿਲੇਗੀ। ਇਸ ਤਹਿਤ ਹੈਲਥਕੇਅਰ.ਜੀਓਵੀ ਰਾਹੀਂ ਪਾਲਿਸੀਆਂ ਖ਼ਰੀਦਣ ਵਾਲੇ ਲੋਕਾਂ ਨੂੰ ਪਾਲਿਸੀ ਲਈ 100 ਡਾਲਰ ਘੱਟ ਅਦਾ ਕਰਨੇ ਪੈਣਗੇ। ਬਾਇਡਨ ਨੇ ਓਹਾਇਓ ਦੇ ਕੋਲੰਬਸ ’ਚ ਜੇਮਸ ਕੈਂਸਰ ਹਸਪਤਾਲ ’ਚ ਕਿਹਾ, ‘‘ਇਸ ਨਾਲ ਲੱਖਾਂ ਪਰਿਵਾਰ ਬੇਫਿਕਰ ਹੋ ਕੇ ਸੌਂ ਸਕਣਗੇ ਕਿਉਂਕਿ ਬਿਮਾਰ ਹੋਣ ਦੀ ਸੂਰਤ ਵਿੱਚ ਵੀ ਉਨ੍ਹਾਂ ਨੂੰ ਖਰਚੇ ਦਾ ਡਰ ਨਹੀਂ ਸਤਾਏਗਾ।’ ਪ੍ਰਸਾਸ਼ਨ ਵੱਲੋਂ ਐਲਾਨ ਕੀਤਾ ਗਿਆ ਕਿ ਲੋਕ ਹੁਣ ਸਬਸਿਡਰੀ ਹੈਲਥਕੇਅਰ.ਜੀਓਵੀ ਬੀਮੇ ਲਈ 15 ਅਗਸਤ ਤੱਕ ਰਜਿਸਟਰੇਸ਼ਨ ਕਰਵਾ ਸਕਦੇ ਹਨ। ਬਾਇਡਨ ਪ੍ਰਸਾਸ਼ਨ ਵੱਲੋਂ ਆਪਣੇ ਕਰੋਨਾ ਪੈਕੇਜ ਤਹਿਤ ਸਿਹਤ ਬੀਮਾ ਲਈ ਰਜਿਸਟਰੇਸ਼ਨ ਵਾਸਤੇ ਤਿੰਨ ਮਹੀਨਿਆਂ ਦੀ ਮਿਆਦ ਵਧਾਈ ਗਈ ਹੈ।

Share