ਫਰਾਂਸ ਦੀ ਖੋਜੀ ਪੱਤਰਿਕਾ ਵੱਲੋਂ ਰਾਫੇਲ ਸੌਦੇ ’ਚ ਕਥਿਤ ਰਿਸ਼ਵਤ ਦਿੱਤੇ ਜਾਣ ਦੇ ਨਵੇਂ ਖੁਲਾਸੇ

257
Share

ਨਵੀਂ ਦਿੱਲੀ, 8 ਨਵੰਬਰ (ਪੰਜਾਬ ਮੇਲ)- ਫਰਾਂਸ ਦੀ ਖੋਜੀ ਪੱਤਰਿਕਾ (ਇਨਵੈਸਟੀਗੇਟਿਵ ਜਰਨਲ) ਮੀਡੀਆਪਾਰਟ ਨੇ ਨਵਾਂ ਖੁਲਾਸਾ ਕੀਤਾ ਹੈ ਕਿ ਦਸਾਲਟ ਏਵੀਏਸ਼ਨ ਨੇ ਭਾਰਤ ਨਾਲ 36 ਰਾਫੇਲ ਲੜਾਕੂ ਜਹਾਜ਼ਾਂ ਦੇ ਸੌਦੇ ਨੂੰ ਅੰਤਿਮ ਰੂਪ ਦੇਣ ਲਈ ਕਥਿਤ ਤੌਰ ’ਤੇ ਫਰਜ਼ੀ ਬਿੱਲਾਂ ਸਹਾਰੇ ਇਕ ਵਿਚੌਲੇ ਨੂੰ 75 ਲੱਖ ਯੂਰੋ ਦੀ ਕਮਿਸ਼ਨ ਦਿੱਤੀ ਸੀ। ਪੱਤਰਿਕਾ ਨੇ ਜੁਲਾਈ ਵਿਚ ਖ਼ਬਰ ਦਿੱਤੀ ਸੀ ਕਿ 59000 ਕਰੋੜ ਰੁਪਏ ਦੇ 36 ਰਾਫੇਲ ਲੜਾਕੂ ਜਹਾਜ਼ ਸੌਦੇ ਵਿਚ ਕਥਿਤ ਭਿ੍ਰਸ਼ਟਾਚਾਰ ਅਤੇ ਪੱਖਪਾਤ ਦੀ ਨਿਆਂਇਕ ਜਾਂਚ ਲਈ ਇਕ ਫਰਾਂਸੀਸੀ ਜੱਜ ਨੂੰ ਨਿਯੁਕਤ ਕੀਤਾ ਗਿਆ ਹੈ। ਰੱਖਿਆ ਮੰਤਰਾਲੇ ਜਾਂ ਦਸਾਲਟ ਏਵੀਏਸ਼ਨ ਵੱਲੋਂ ਹਾਲੇ ਇਸ ਸਬੰਧੀ ਕੋਈ ਪ੍ਰਤੀਕਿਰਿਆ ਨਹੀਂ ਆਈ ਹੈ। ਪੱਤਰਿਕਾ ਨੇ ਆਪਣੀ ਨਵੀਂ ਰਿਪੋਰਟ ਵਿਚ ਐਤਵਾਰ ਨੂੰ ਕਿਹਾ, ‘ਮੀਡੀਆਪਾਰਟ ਅੱਜ ਕਥਿਤ ਫਰਜ਼ੀ ਬਿੱਲ ਪ੍ਰਕਾਸ਼ਿਤ ਕਰ ਰਹੀ ਹੈ, ਜਿਸ ਨਾਲ ਫਰਾਂਸ ਦੀ ਜਹਾਜ਼ ਨਿਰਮਾਤਾ ਕੰਪਨੀ ਦਸਾਲਟ ਏਵੀਏਸ਼ਨ ਭਾਰਤ ਨੂੰ 36 ਲੜਾਕੂ ਜਹਾਜ਼ ਸੌਦੇ ਨੂੰ ਅੰਤਿਮ ਰੂਪ ਦੇਣ ਵਿਚ ਮਦਦ ਲਈ ਇਕ ਵਿਚੋਲੇ ਨੂੰ ਘੱਟੋ-ਘੱਟ 75 ਲੱਖ ਯੂਰੋ ਦੀ ਲੁਕਵੀਂ ਕਮਿਸ਼ਨ ਦਾ ਭੁਗਤਾਨ ਕਰਨ ਦੇ ਯੋਗ ਹੋ ਸਕੀ। ਪੱਤਰਿਕਾ ਨੇ ਦੋਸ਼ ਲਗਾਇਆ ਹੈ ਕਿ ‘ਅਜਿਹੇ ਦਸਤਾਵੇਜ਼ ਹੋਣ ਦੇ ਬਾਵਜੂਦ ਭਾਰਤੀ ਜਾਂਚ ਏਜੰਸੀਆਂ ਨੇ ਮਾਮਲੇ ਦੀ ਜਾਂਚ ’ਚ ਅੱਗੇ ਨਾ ਵਧਣ ਦਾ ਫੈਸਲਾ ਕੀਤਾ।

Share