ਟੈਕਸਾਸ ’ਚ ਹੋਏ ਟਰੱਕ ਹਾਦਸੇ ’ਚ ਪੰਜਾਬੀ ਦੀ ਮੌਤ

300
Share

ਫਰਿਜ਼ਨੋ, 10 ਅਗਸਤ (ਮਾਛੀਕੇ/ਧਾਲੀਆਂ/ਪੰਜਾਬ ਮੇਲ)- ਆਏ ਦਿਨ ਅਮੈਰਕਿਨ ਟਰੱਕਿੰਗ ਇੰਡਸਟਰੀ ਤੋਂ ਬੜੀਆਂ ਮੰਦਭਾਗੀ ਖ਼ਬਰ ਪ੍ਰਾਪਤ ਹੋ ਰਹੀਆ ਹਨ। ਫਰਿਜ਼ਨੋ ਨਿਵਾਸੀ ਟਰੱਕ ਡਰਾਈਵਰ ਸ਼ਮਸ਼ੇਰ ਸਿੰਘ (ਸ਼ੇਰਾ) ਸਰਕਾਰੀਆ (53) ਡੈਲਸ ਟੈਕਸਾਸ ਏਰੀਏ ’ਚ ਫਰੀਵੇਅ 635 ’ਤੇ ਐਕਸੀਡੈਂਟ ਵਿਚ ਮੌਤ ਦੇ ਮੂੰਹ ਜਾ ਪਿਆ। ਜਾਣਕਾਰੀ ਮੁਤਾਬਕ ਸ਼ੇਰੇ ਨੇ ਟਰੱਕ ਸ਼ੋਲਡਰ ’ਤੇ ਕੱਢਿਆ ਹੋਇਆ ਸੀ ਅਤੇ ਆਪ ਟਰੱਕ ਤੋਂ ਥੱਲੇ ਉੱਤਰਿਆ ਹੋਇਆ ਸੀ। ਪਿੱਛੋਂ ਸਾਈਡ ਤੋਂ ਟੋਅ-ਟਰੱਕ ਨੇ ਹਿੱਟ ਕੀਤਾ, ਜਿਸ ਕਾਰਨ ਸ਼ੇਰਾ ਟਰੱਕ ਅਤੇ ਸ਼ੋਲਡਰ ’ਤੇ ਬਣੀ ਕੰਧ ਵਿਚਕਾਰ ਘੁੱਟਿਆ ਗਿਆ ਅਤੇ ਮੌਕੇ ’ਤੇ ਹੀ ਪ੍ਰਾਣ ਤਿਆਗ ਗਿਆ।
ਸ਼ੇਰਾ ਪੰਜ ਕੁ ਸਾਲ ਪਹਿਲਾ ਬਲੱਡ ਰਿਲੇਸ਼ਨ ਦੇ ਤੌਰ ’ਤੇ ਪਰਿਵਾਰ ਸਮੇਤ ਇਟਲੀ ਤੋਂ ਆਪਣੇ ਸਾਂਢੂ ਸਤਨਾਮ ਸਿੰਘ ਸ਼ੇਰਗਿੱਲ ਕੋਲ ਫਰਿਜ਼ਨੋ ਆਣ ਵਸਿਆ ਸੀ। ਪਿਛਲੇ ਤਿੰਨ ਸਾਲ ਤੋਂ ਵਿਰਕ ਟਰੱਕਿੰਗ ਲਈ ਡਰਾਈਵ ਕਰ ਰਿਹਾ ਸੀ ਕਿ ਅਚਾਨਕ ਇਹ ਭਾਣਾ ਵਰਤ ਗਿਆ। ਸ਼ਮਸ਼ੇਰ ਸਿੰਘ ਸ਼ੇਰੇ ਦਾ ਪਿਛਲਾ ਪਿੰਡ ਢੰਡੇ ਜ਼ਿਲ੍ਹਾ ਜਲੰਧਰ, ਨੇੜੇ ਗੁਰਾਇਆ ਹੈ। ਸ਼ੇਰਾ ਆਪਣੇ ਪਿੱਛੇ ਪਤਨੀ, ਦੋ ਜਵਾਨ ਧੀਆਂ ਅਤੇ 11 ਕੁ ਸਾਲ ਦਾ ਬੱਚਾ ਛੱਡ ਗਿਆ ਹੈ। ਵਧੇਰੇ ਜਾਣਕਾਰੀ ਜਾਂ ਦੁੱਖ ਸਾਂਝਾ ਕਰਨ ਲਈ ਤੁਸੀਂ ਸਤਨਾਮ ਸਿੰਘ ਸ਼ੇਰਗਿੱਲ ਨਾਲ 559-977-6007 ’ਤੇ ਸੰਪਰਕ ਕਰ ਸਕਦੇ ਹੋ।

Share