APCA ਵੱਲੋਂ ਆਪਣਾ ਸਾਲਾਨਾ ਬਾਇਰ ਟਰੇਡ ਸ਼ੋਅ 20 ਸਤੰਬਰ ਨੂੰ

ਸੈਕਰਾਮੈਂਟੋ, 11 ਜੁਲਾਈ (ਪੰਜਾਬ ਮੇਲ)- ਆਪਣੇ ਤਿੰਨ ਸਫਲ ਟਰੇਡ ਸ਼ੋਅ ਕਰਨ ਤੋਂ ਬਾਅਦ ਅਮਰੀਕਨ ਪੈਟਰੋਲੀਅਮ ਐਂਡ ਕੰਨਵੀਨੀਅੰਸ ਸਟੋਰ ਐਸੋਸੀਏਸ਼ਨ ਵੱਲੋਂ ਚੌਥਾ ਸਾਲਾਨਾ ਬਾਇਰ ਟਰੇਡ ਸ਼ੋਅ ਮੈਕਕਲੇਨ ਕਾਨਫਰੰਸ ਸੈਂਟਰ, ਮੈਕਕਲੇਨ (ਸੈਕਰਾਮੈਂਟੋ) ਵਿਖੇ 20 ਸਤੰਬਰ, 2018 ਨੂੰ ਦੁਪਹਿਰ 1 ਵਜੇ ਤੋਂ 6 ਵਜੇ ਤੱਕ ਕਰਵਾਇਆ ਜਾ ਰਿਹਾ ਹੈ। ਇਸ ਵਿਚ ਸ਼ਾਮਲ ਹੋਣ ਲਈ ਕੋਈ ਐਂਟਰੀ ਫੀਸ ਨਹੀਂ ਰੱਖੀ ਗਈ। ਖਾਣਾ ਮੁਫਤ ਹੋਵੇਗਾ। ਇਸ ਤੋਂ ਇਲਾਵਾ ਰੈਫਲ ਇਨਾਮ ਵੀ ਕੱਢੇ ਜਾਣਗੇ। ਮੈਕਕਲੇਨ ਕਾਨਫਰੰਸ ਸੈਂਟਰ ਵਿਖੇ APCA ਵੱਲੋਂ ਸੱਦੀ ਗਈ ਪ੍ਰੈੱਸ ਕਾਨਫਰੰਸ ਦੌਰਾਨ ਇਹ ਜਾਣਕਾਰੀ ਦਿੱਤੀ ਗਈ ਕਿ ਇਸ ਸ਼ੋਅ ਵਿਚ ਗੈਸ ਸਟੇਸ਼ਨ ਅਤੇ ਸਟੋਰਾਂ ਨਾਲ ਸੰਬੰਧਤ ਸੈਂਕੜੇ ਵੈਂਡਰ ਆਪਣੇ ਸਟਾਲ ਲਾਉਣਗੇ, ਜਿੱਥੋਂ ਬਹੁਤ ਸਾਰੀ ਜਾਣਕਾਰੀ ਹਾਸਲ ਹੋਵੇਗੀ ਅਤੇ ਸਟੋਰ ਮਾਲਕ ਇਸ ਦਾ ਭਰਪੂਰ ਫਾਇਦਾ ਉਠਾ ਸਕਣਗੇ। ਇਸ ਸ਼ੋਅ ਵਿਚ ਵੱਖ-ਵੱਖ ਅਮਰੀਕੀ ਆਗੂ ਵੀ ਵਿਸ਼ੇਸ਼ ਤੌਰ ‘ਤੇ ਪਹੁੰਚ ਰਹੇ ਹਨ। ਪ੍ਰੈੱਸ ਕਾਨਫਰੰਸ ਵਿਚ ਹੋਰਨਾਂ ਤੋਂ ਇਲਾਵਾ APCA ਦੇ ਚੇਅਰਮੈਨ ਮਨਰਾਜ ਸਿੰਘ ਨੱਤ, ਡਾਇਰੈਕਟਰ ਕੇਵਲ ਕ੍ਰਿਸ਼ਨ, ਕਿਨੀ ਚਿਤਕਾਰਾ, ਪਾਲ ਹੇਅਰ, ਹਰਜਿੰਦਰ ਸਿੰਘ ਧਾਮੀ, ਹੁਸ਼ਿਆਰ ਸਿੰਘ ਡਡਵਾਲ, ਪਰਮਜੀਤ ਸਿੰਘ ਖਹਿਰਾ ਵੀ ਹਾਜ਼ਰ ਸਨ। APCA ਵੱਲੋਂ ਮੀਡੀਆ ਨੂੰ ਜਾਣਕਾਰੀ ਦਿੰਦਿਆਂ ਦੱਸਿਆ ਗਿਆ ਕਿ ਇਸ ਸੰਸਥਾ ਦੇ ਇਸ ਵੇਲੇ 1200 ਤੋਂ ਵੱਧ ਗੈਸ ਸਟੇਸ਼ਨ ਅਤੇ ਸਟੋਰ ਮਾਲਕ ਮੈਂਬਰ ਬਣ ਚੁੱਕੇ ਹਨ। ਇਸ ਸੰਸਥਾ ਦੇ 7 ਚੈਪਟਰ ਵੱਖ-ਵੱਖ ਥਾਵਾਂ ‘ਤੇ ਕਾਮਯਾਬੀ ਨਾਲ ਚੱਲ ਰਹੇ ਹਨ। ਫਰਿਜ਼ਨੋ, ਬੇਏਰੀਆ, ਨਾਰਥ ਬੇਅ, ਸੈਕਰਾਮੈਂਟੋ, ਬੇਕਰਜ਼ਫੀਲਡ, ਸੈਂਟਰਵੈਲੀ, ਲਾਸ ਏਂਜਲਸ ਪਹਿਲਾਂ ਹੀ ਲਾਂਚ ਹੋ ਚੁੱਕੇ ਹਨ, ਜਦਕਿ ਸਾਲ 2020 ਤੱਕ 5 ਹੋਰ ਚੈਪਟਰ APCA ਵੱਲੋਂ ਖੋਲ੍ਹੇ ਜਾਣ ਦਾ ਟੀਚਾ ਹੈ। ਇਹ ਇਕ ਨਾਨ-ਪਰਾਫਿਟ ਸੰਸਥਾ ਹੈ, ਜੋ ਕਿ ਗੈਸ ਸਟੇਸ਼ਨ, ਲੀਕਰ ਸਟੋਰ ਅਤੇ ਕੰਨਵੀਨੀਅੰਸ ਸਟੋਰ ਮਾਲਕਾਂ ਲਈ ਜੱਦੋ-ਜਹਿਦ ਕਰ ਰਹੀ ਹੈ। ਪਿਛਲੇ ਸਮੇਂ ਦੌਰਾਨ ਇਸ ਸੰਸਥਾ ਵੱਲੋਂ SB-1400 ਬਿੱਲ ਅਤੇ AB-2308 ਬਿੱਲ ਸਟੇਟ ਕੈਪੀਟਲ ‘ਚ ਪਾਸ ਹੋਣ ਤੋਂ ਰੁਕਵਾਇਆ ਗਿਆ ਸੀ। ਇਸ ਤੋਂ ਇਲਾਵਾ ਸਟੋਰ ਮਾਲਕਾਂ ਨੂੰ ਹੋਰ ਵੀ ਬਹੁਤ ਸਾਰੇ ਫਾਇਦੇ ਕੀਤੇ ਗਏ ਹਨ।
APCA ਵੱਲੋਂ ਸਟੋਰ ਮਾਲਕਾਂ ਨੂੰ 20 ਸਤੰਬਰ ਨੂੰ ਵੱਧ ਤੋਂ ਵੱਧ ਗਿਣਤੀ ਵਿਚ ਪਹੁੰਚਣ ਦੀ ਅਪੀਲ ਕੀਤੀ ਗਈ ਹੈ।