2020 ‘ਚ ਨਿਊਜ਼ੀਲੈਂਡ ਵਿਚ ਚੋਣ ਲੜੇਗਾ ਦੁਨੀਆ ਦਾ ਪਹਿਲਾ ਰੋਬੋਟ ਨੇਤਾ

ਵੇਲਿੰਗਟਨ, 27 ਨਵੰਬਰ (ਪੰਜਾਬ ਮੇਲ)- ਨਿਊਜ਼ੀਲੈਂਡ ਵਿਚ ਵਿਗਿਆਨੀਆਂ ਨੇ ਦੁਨੀਆ ਦਾ ਪਹਿਲਾ ਨਕਲੀ ਦਿਮਾਗ ਵਾਲਾ ਸਿਆਸਤਦਾਨ ਵਿਕਸਿਤ ਕੀਤਾ ਹੈ। ਜੋ ਆਵਾਜ਼, ਸਿੱਖਿਆ, ਇਮੀਗਰੇਸ਼ਨ ਸਬੰਧੀ ਨੀਤੀਆਂ ਵਰਗੇ ਸਥਾਨਕ ਮੁੱਦਿਆਂ ‘ਤੇ ਪੁੱਛੇ ਗਏ ਸਵਾਲਾਂ ਦਾ ਜਵਾਬ ਦੇ ਸਕਦਾ ਹੈ। ਇੰਨਾ ਹੀ ਨਹੀਂ, ਉਸ ਨੂੰ 2020 ਵਿਚ ਨਿਊਜ਼ੀਲੈਂਡ ਵਿਚ ਹੋਣ ਵਾਲੀਆਂ ਆਮ ਚੋਣਾਂ ਵਿਚ ਉਮੀਦਵਾਰ ਬਣਾਏ ਜਾਣ ਦੀਆਂ ਤਿਆਰੀਆਂ ਵੀ ਕੀਤੀਆਂ ਜਾ ਰਹੀਆਂ ਹਨ। ਇਸ ਸਿਆਸਤਦਾਨ ਦਾ ਨਾਂ ਸੈਮ ਰੱਖਿਆ ਗਿਆ ਹੈ। ਇਸ ਨੂੰ ਤਿਆਰ ਕਰਨ ਵਾਲੇ ਦਾ ਨਾਂ 49 ਸਾਲਾ ਨਿਕ ਗੇਰਿਸਟਨ ਹੈ। ਉਕਤ ਨਕਲੀ ਦਿਮਾਗ ਵਾਲਾ ਇਹ ਸਿਆਸਤਦਾਨ ਫੇਸਬੁੱਕ ਮੈਸੰਜਰ ਰਾਹੀਂ ਲੋਕਾਂ ਵਿਚ ਪ੍ਰਤੀਕ੍ਰਿਆ ਪ੍ਰਗਟਾਉਣ ਦਾ ਢੰਗ ਸਿੱਖ ਰਿਹਾ ਹੈ।
ਗੇਰਿਸਟਨ ਦਾ ਮੰਨਣਾ ਹੈ ਕਿ ਨਿਊਜ਼ੀਲੈਂਡ ਵਿਚ 2020 ਦੇ ਆਖ਼ਰ ਵਿਚ ਆਮ ਚੋਣਾਂ ਹੋਣਗੀਆਂ। ਤਦ ਸੈਮ ਬਤੌਰ ਉਮੀਦਵਾਰ ਅਪਣੀ ਦਾਅਵੇਦਾਰੀ ਪੇਸ਼ ਕਰ ਸਕੇਗਾ। ਟੇਕ ਇਨ ਏਸ਼ੀਆ ਨੇ ਅਪਣੀ ਰਿਪੋਰਟ ਵਿਚ ਦੱਸਿਆ ਕਿ ਪ੍ਰਣਾਲੀ ਬੇਸ਼ੱਕ ਹੀ ਪੂਰੀ ਤਰ੍ਹਾਂ ‘ਸਹੀ’ ਨਾ ਹੋਵੇ, ਲੇਕਿਨ ਇਹ ਕਈ ਦੇਸ਼ਾਂ ਵਿਚ ਵਧਦੇ ਰਾਜਨੀਤਕ ਤੇ ਸੱਭਿਆਚਾਰਕ ਅੰਤਰ ਨੂੰ ਭਰਨ ਵਿਚ ਮਦਦਗਾਰ ਹੋ ਸਕਦੀ ਹੈ। ਹਾਲ ਵਿਚ ਨਿਊਜ਼ੀਲੈਂਡ ਵਿਚ ਰਾਜਨੀਤਕ ਉਥਲ ਪੁਥਲ ਦੇ ਵਿਚ ਤਿੰਨ ਦਲਾਂ ਦੇ ਗਠਜੋੜ ਨਾਲ ਜੇਸਿੰਡਾ ਪ੍ਰਧਾਨ ਮੰਤਰੀ ਬਣੀ ਸੀ। ਜੇਸਿੰਡਾ ਦੇਸ਼ ਦੇ 150 ਸਾਲ ਦੇ ਇਤਿਹਾਸ ਵਿਚ ਤੀਜੀ ਮਹਿਲਾ ਅਤੇ ਸਭ ਤੋਂ ਯੁਵਾ ਪ੍ਰਧਾਨ ਮੰਤਰੀ ਵੀ ਹੈ। ਉਨ੍ਹਾਂ ਦੀ ਪਹਿਲ ‘ਤੇ ਹੀ ਰੋਬੋਟ ਸੈਮ ਨੂੰ ਵੈਕਲਪਿਕ ਨੇਤਾ ਦੇ ਤੌਰ ‘ਤੇ ਤਿਆਰ ਕੀਤਾ ਜਾ ਰਿਹਾ ਹੈ। ਜੇਸਿੰਡਾ ਸੈਮ ਦੇ ਨਾਲ ਵਿਚਾਰ ਵੀ ਸ਼ੇਅਰ ਕਰਦੀ ਹੈ। ਸਾਊਦੀ ਅਰਬ ਵਿਚ ਇਕ ਮਹੀਨੇ ਪਹਿਲਾਂ ਹੀ ਇਕ ਮਹਿਲਾ ਰੋਬੋਟ ਸੋਫੀਆ ਨੂੰ ਨਾਗਰਿਕਤਾ ਮਿਲ ਚੁੱਕੀ ਹੈ। ਇਹ ਲੋਕਾਂ ਨਾਲ ਗੱਲਬਾਤ ਵੀ ਕਰ ਸਕਦੀ ਹੈ। ਇਸ ਰੋਬੋਟ ਨੂੰ ਖਾੜ੍ਹੀ ਦੇਸ਼ਾਂ ਵਿਚ ਕਿਸੇ ਆਮ ਮਹਿਲਾ ਤੋਂ ਜ਼ਿਆਦਾ ਅਧਿਕਾਰ ਹਾਸਲ ਹਨ।