ਸੁਰੱਖਿਆ ਰੋਬਟ ‘ਤੇ ਲੱਗਾ ਬੇਘਰ ਲੋਕਾਂ ਦੇ ਸ਼ੋਸ਼ਣ ਕਰਨ ਦਾ ਦੋਸ਼

ਵਾਸ਼ਿੰਗਟਨ, 22 ਦਸੰਬਰ (ਪੰਜਾਬ ਮੇਲ)- ਸਾਨ ਫਰਾਂਸਿਸਕੋ ਦੇ ਇਕ ਇਲਾਕੇ ‘ਚ ਤਾਇਨਾਤ ਸੁਰੱਖਿਆ ਰੋਬੋਟ ‘ਦੇ ‘9’ ‘ਤੇ ਬੇਘਰ ਲੋਕਾਂ ਦਾ ਸ਼ੋਸ਼ਣ ਕਰਨ ਦਾ ਦੋਸ਼ ਲੱਗਾ ਹੈ। ਇਸ ਤੋਂ ਬਾਅਦ ਰੋਬੋਟ ਨੂੰ ਉਸ ਦੇ ਕੰਮ ਤੋਂ ਬਰਖਾਸਤ ਕਰਕੇ ਉੱਥੋਂ ਹਟਾ ਦਿੱਤਾ ਗਿਆ ਹੈ। ਦੋਸ਼ ਹੈ ਕਿ ਰੋਬੋਟ ਸੜਕ ਕੰਢੇ ਗਸ਼ਤ ਕਰਕੇ ਬੇਘਰ ਲੋਕਾਂ ਨੂੰ ਟੈਂਟ ਲਗਾਉਣ ਤੋਂ ਰੋਕ ਰਿਹਾ ਸੀ। ਇਹ ਹਰ ਮਿੰਟ ਅਣਗਿਣਤ ਤਸਵੀਰਾਂ ਖਿੱਚਦਾ ਸੀ, ਜਿਸ ਨਾਲ ਲੋਕਾਂ ਦੀ ਨਿੱਜੀ ਜ਼ਿੰਦਗੀ ਪ੍ਰਭਾਵਿਤ ਹੋ ਰਹੀ ਸੀ।
ਲੋਕਾਂ ਨੇ ਦੋਸ਼ ਲਗਾਇਆ ਕਿ ਇਹ ਰੋਬੋਟ ਸਿਰਫ ਗਰੀਬਾਂ ਅਤੇ ਬੇਘਰਾਂ ‘ਤੇ ਕਾਰਵਾਈ ਕਰ ਰਿਹਾ ਹੈ। ‘ਦਿ ਸਾਨ ਫਰਾਂਸਿਸਕੋ ਸੋਸਾਇਟੀ ਫਾਰ ਦਿ ਪ੍ਰਿਵੈਨਸ਼ਨ ਆਫ ਕਰੂਐਲਟੀ ਟੂ ਐਨੀਮਲ’ ਨੇ ਇਸ ਰੋਬੋਟ ਨੂੰ ਤਾਇਨਾਤ ਕੀਤਾ ਸੀ ਤਾਂ ਜੋ ਰੋਬੋਟ ਸੰਸਥਾਨ ਦੇ ਨੇੜੇ ਵਾਲੇ ਇਲਾਕੇ ‘ਚ ਗਸ਼ਤ ਕਰਕੇ ਸੁਰੱਖਿਆ ਵਿਵਸਥਾ ਮਜ਼ਬੂਤ ਕਰ ਸਕੇ, ਜਿਸ ਨਾਲ ਕਾਰ ਚੋਰੀ ਅਤੇ ਸਾਮਾਨ ਚੁੱਕਣ ਵਰਗੇ ਦੋਸ਼ਾ ‘ਚ ਕਮੀ ਆਈ ਹੈ।
ਸੰਸਥਾਨ ਦੀ ਪ੍ਰਧਾਨ ਜੈਨੀਫਰ ਸਕਾਰਲੈਟ ਦਾ ਕਹਿਣਾ ਹੈ ਕਿ ਰੋਬੋਟ ਨੇ ਜਾਣਬੁੱਝ ਕੇ ਬੇਘਰ ਲੋਕਾਂ ਨੂੰ ਪ੍ਰੇਸ਼ਾਨ ਨਹੀਂ ਕੀਤਾ, ਨਾ ਹੀ ਰਸਤੇ ‘ਤੇ ਸੌਣ ਵਾਲਿਆਂ ਨੂੰ ਤੰਗ ਕੀਤਾ। ਉਥੇ ਹੀ ਸੰਸਥਾਨ ਦੇ ਕੈਂਪਸ ਦੇ ਕੋਲ ‘ਚ ਸਥਿਤ ਕੈਂਪ ‘ਚ ਰਹਿਣ ਵਾਲੇ ਲੋਕਾਂ ਦਾ ਦੋਸ਼ ਹੈ ਕਿ ਰੋਬੋਟ ਨੇ ਉਨ੍ਹਾਂ ਨੂੰ ਨਿਸ਼ਾਨਾ ਬਣਾਇਆ ਹੈ। ਸਕਾਰਲੈਟ ਮੁਤਾਬਕ ਲੋਕਾਂ ਨੇ ਰੋਬੋਟ ਨੂੰ ਬੰਨ੍ਹਿਆ, ਉਸ ਦੀ ਤੋੜ-ਭੰਨ ਕੀਤੀ ਅਤੇ ਉਸਦੇ ਸੈਂਸਰ ‘ਤੇ ਸੌਸ ਸੁੱਟ ਦਿੱਤੀ ਸੀ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਸੰਸਥਾਨ ਦੇ ਬਾਹਰ ਵੱਡੀ ਗਿਣਤੀ ‘ਚ ਟੈਂਟ ਹਨ ਅਤੇ ਉੱਥੇ ਗੱਡੀਆ ਖੜ੍ਹੀਆਂ ਰਹਿੰਦੀਆਂ ਹਨ।
ਇਸ ਰੋਬੋਟ ਨੂੰ ਬਣਾਉਣ ਵਾਲੀ ਕੰਪਨੀ ਨਾਇਟਸਕੂਪ ਮੁਤਾਬਕ ਗਲਤ ਖਬਰਾਂ ਫੈਲਾਈਆ ਗਈਆਂ ਹਨ ਕਿ ਇਹ ਰੋਬਟ ਬੇਘਰ ਲੋਕਾਂ ਨੂੰ ਹਟਾਉਣ ਲਈ ਲਿਆਇਆ ਗਿਆ ਸੀ। ਇਸਦਾ ਮਕਸਦ ਸਿਰਫ ਉਨ੍ਹਾਂ ਦੀ ਗਾਹਕ ਸੰਸਥਾ ਦੀ ਸੁਰੱਖਿਆ ਨੂੰ ਵਧਾਉਣਾ ਸੀ ਅਤੇ ਉਹ ਇਸ ‘ਚ ਸਫ਼ਲ ਵੀ ਰਹੀ। ਰੋਬੋਟ ਦੀ ਨਿਯੁਕਤੀ ਤੋਂ ਬਾਅਦ ਚੋਰੀ ਦੀਆਂ ਘਟਨਾਵਾਂ ‘ਚ ਕਮੀ ਆਈ ਸੀ।