ਸਿੱਖ ਰੈਫ਼ਰੀ ਖਿਲਾਫ ਸੋਸ਼ਲ ਮੀਡੀਆ ‘ਤੇ ਨਸਲੀ ਟਿੱਪਣੀਆਂ
ਸਿੰਘਾਪੁਰ, 3 ਅਗਸਤ (ਪੰਜਾਬ ਮੇਲ)- ਇਥੇ ਇਕ ਫੁੱਟਬਾਲ ਮੈਚ ਤੋਂ ਬਾਅਦ 33 ਸਾਲਾ ਸਿੰਘਾਪੁਰ ਦੇ ਇਕ ਸਿੱਖ ਰੈਫ਼ਰੀ ਸੁਖਬੀਰ ਸਿੰਘ ਦੇ ਿਖ਼ਲਾਫ਼ ਸੋਸ਼ਲ ਮੀਡੀਆ ‘ਤੇ ਕਈ ਲੋਕਾਂ ਵੱਲੋਂ ਨਸਲੀ ਟਿੱਪਣੀਆਂ ਕੀਤੀਆਂ ਗਈਆਂ | ਹੁਣ ਇਸ ਮਾਮਲੇ ‘ਚ ਬਰਤਾਨੀਆ ਦੀ ਇਕ ਸੰਸਥਾ ‘ਕਿਕ ਇਟ ਆਊਟ’ ਜਾਂਚ ਕਰ ਰਹੀ ਹੈ | ਬੀਤੇ ਸ਼ਨਿਚਰਵਾਰ ਨੂੰ ਸਿੰਘਾਪੁਰ ਦੇ ਨੈਸ਼ਨਲ ਸਟੇਡੀਅਮ ‘ਚ ਇੰਟਰ ਮਿਲਾਨ ਅਤੇ ਚੈਲਸੀਆ ਵਿਚਾਲੇ ਇਕ ਮੈਚ ਖੇਡਿਆ ਗਿਆ, ਜਿਸ ‘ਚ ਸੁਖਬੀਰ ਸਿੰਘ ਰੈਫ਼ਰੀ ਸੀ | ਇੰਟਰ ਮਿਲਾਨ ਨੇ ਇਸ ਮੈਚ ‘ਚ ਚੈਲਸੀਆ ਨੂੰ 2-1 ਨਾਲ ਹਰਾ ਦਿੱਤਾ | ਮੈਚ ਦੌਰਾਨ ਸੁਖਬੀਰ ਸਿੰਘ ਦੇ ਕੁਝ ਫ਼ੈਸਲਿਆਂ ‘ਤੇ ਵਿਵਾਦ ਵੇਖਣ ਨੂੰ ਮਿਲਿਆ | ਜਿਸ ਤੋਂ ਬਾਅਦ ਟਵਿੱਟਰ ‘ਤੇ ਕਈ ਲੋਕਾਂ ਨੇ ਸੁਖਬੀਰ ਸਿੰਘ ਦੇ ਫ਼ੈਸਲਿਆਂ ਦੀ ਆਲੋਚਨਾ ਕੀਤੀ ਅਤੇ ਉਨ੍ਹਾਂ ਿਖ਼ਲਾਫ਼ ਨਸਲੀ ਟਿੱਪਣੀਆਂ ਵੀ ਕੀਤੀਆਂ | ਮੈਚ ਦੌਰਾਨ ਇਕ ਫ਼ੈਸਲੇ ਤਹਿਤ ਸੁਖਬੀਰ ਨੇ ਇੰਟਰ ਮਿਲਾਨ ਨੂੰ ਉਸ ਸਮੇਂ ਪੈਨਲਟੀ ਦੇ ਦਿੱਤੀ ਜਦੋਂ ਚੈਲਸੀਆ ਦੇ ਰੱਖਿਆ ਪੰਕਤੀ ਦੇ ਇਕ ਿਖ਼ਡਾਰੀ ਨੇ ਇੰਟਰ ਮਿਲਾਨ ਦੇ ਸਟ੍ਰਾਈਕਰ ਸਟੀਵਨ ਜੋਵੇਟਿਕ ਨੂੰ ਸੁੱਟਿਆ ਅਤੇ ਇਕ-ਦੂਸਰੇ ਫ਼ੈਸਲੇ ‘ਚ ਸੁਖਬੀਰ ਨੇ ਚੈਲਸੀਆ ਦੇ ਿਖ਼ਡਾਰੀ ਵੱਲੋਂ ਕੀਤੇ ਗਏ ਗੋਲ ਨੂੰ ਆਫ਼ ਸਾਈਡ ਕਹਿ ਕੇ ਨਕਾਰ ਦਿੱਤਾ | ਫ਼ੀਫ਼ਾ ਮੈਚ ਏਜੰਟ ਬਲਜੀਤ ਰਿਹਾਲ ਅਨੁਸਾਰ ‘ਕਿਕ ਇਟ ਆਊਟ’ ਨੇ ਕਿਹਾ ਕਿ ਸੋਸ਼ਲ ਮੀਡੀਆ ‘ਤੇ ਸੁਖਬੀਰ ਸਿੰਘ ਦੇ ਿਖ਼ਲਾਫ਼ ਕੀਤੀਆਂ ਗਈਆਂ ਨਸਲੀ ਟਿੱਪਣੀਆਂ ਬਾਰੇ ਲੋਕਾਂ ਤੋਂ ਸਾਨੂੰ ਸ਼ਿਕਾਇਤਾਂ ਮਿਲੀਆਂ ਹਨ | ਹਾਲਾਂਕਿ ਸਿੰਘਾਪੁਰ ਫੁੱਟਬਾਲ ਐਸੋਸੀਏਸ਼ਨ ਅਤੇ ਸੁਖਬੀਰ ਸਿੰਘ ਨੇ ਇਸ ਮਾਮਲੇ ‘ਤੇ ਅਜੇ ਕੋਈ ਟਿੱਪਣੀ ਨਹੀਂ ਕੀਤੀ | ਦੱਸਣਯੋਗ ਹੈ ਕਿ ਸੁਖਬੀਰ ਸਿੰਘ ਨੂੰ ਪਿਛਲੇ ਸਾਲ ਸਿੰਘਾਪੁਰ ਲੀਗ ‘ਚ ਰੈਫ਼ਰੀ ਆਫ਼ ਦਾ ਯੀਅਰ ਚੁਣਿਆ ਗਿਆ ਸੀ |
