ਸਿੱਖ ਪੰਚਾਇਤ ਵੱਲੋਂ ਗੁਰਦੁਆਰਾ ਸਾਹਿਬ ਫਰੀਮਾਂਟ ਵਿਚ ਮਨੋਰੋਗ-ਤਨਾਅ ਬਾਰੇ ਸੈਮੀਨਾਰ ਕਰਵਾਇਆ ਗਿਆ
ਫਰੀਮਾਂਟ, 11 ਸਤੰਬਰ (ਬਲਵਿੰਦਰਪਾਲ ਸਿੰਘ ਖਾਲਸਾ/ਪੰਜਾਬ ਮੇਲ)- ਗੁਰਦੁਆਰਾ ਸਾਹਿਬ ਫਰੀਮਾਂਟ ਵਿਚ ਸਿੱਖ ਪੰਚਾਇਤ ਵੱਲੋਂ ਸਿੱਖ ਸੰਗਤਾਂ ਵਾਸਤੇ ਤਨਾਅ ਭਾਵ ਸਟਰੈੱਸ ਬਾਰੇ ਇਕ ਵਿਸ਼ੇਸ਼ ਵਿਚਾਰ-ਗੋਸ਼ਟੀ ਕਰਵਾਈ ਗਈ, ਜਿਸਨੂੰ ਮਨੋਰੋਗਾਂ ਦੇ ਮਾਹਰ ਡਾਕਟਰ ਜਸਬੀਰ ਸਿੰਘ ਲੋਹਾਨ ਤੇ ਡਾਕਟਰ ਸ਼ਿਲਪਾ ਕਪੂਰ ਨੇ ਸੰਬੋਧਨ ਕੀਤਾ। ਇਸ ਸੈਮੀਨਾਰ ਵਿਚ ਬਹੁਤ ਹਿੱਸਾ ਡਾਕਟਰ ਲੋਹਾਨ ਨੇ ਪਾਇਆ ਤੇ ਖਾਸ ਗੱਲਾਂ ਉੱਤੇ ਡਾਕਟਰ ਸ਼ਿਲਪਾ ਨੇ ਰੌਸ਼ਨੀ ਪਾਈ। ਉਨ੍ਹਾਂ ਦੱਸਿਆ ਕਿ ਕਿਸੇ ਵੀ ਚੀਜ਼ ਦਾ ਤਨਾਅ ਰਹਿਣਾ ਸਿਹਤ ਤੇ ਮਨ ਦੋਹਾਂ ਲਈ ਪ੍ਰੇਸ਼ਾਨੀ ਪੈਦਾ ਕਰਨ ਵਾਲਾ ਹੈ। ਜ਼ਿਆਦਾ ਗੁੱਸਾ ਆਉਣਾ ਜਾਂ ਸੁਭਾਅ ਦਾ ਚਿੜਚਿੜਾਪਣ ਤੇ ਹਰ ਵੇਲੇ ਲੜਾਈ ਲਈ ਤਿਆਰ ਰਹਿਣਾ ਬਹੁਤ ਗੰਭੀਰ ਕਿਸਮ ਦਾ ਦਬਾਅ ਤੇ ਤਨਾਅ ਗਿਣਿਆ ਜਾਂਦਾ ਹੈ, ਜਿਸ ਨਾਲ ਭਾਰੀ ਨੁਕਸਾਨ ਹੋਣ ਦਾ ਡਰ ਬਣਿਆ ਰਹਿੰਦਾ ਹੈ। ਇਹ ਹਾਲਤ ਤਨ ਤੇ ਮਨ ਦੋਹਾਂ ਲਈ ਨੁਕਸਾਨਦੇਹ ਹੈ। ਕਈ ਵਾਰ ਬਹੁਤ ਭਾਰ ਦਾ ਵਧ ਜਾਣਾ ਵੀ ਕਿਸੇ ਕਿਸਮ ਦੇ ਤਨਾਅ ਦੀ ਨਿਸ਼ਾਨੀ ਹੁੰਦੀ ਹੈ। ਕਿਸੇ ਨਸ਼ੇ ਰਹਿਤ ਮਨੁੱਖ ਵੱਲੋਂ ਅਚਾਨਕ ਨਸ਼ੇ ਵੱਲ ਖਿੱਚੇ ਜਾਣਾ ਤੇ ਮੁੜ ਕਈ ਕਿਸਮ ਦੇ ਨਸ਼ੇ ਕਰਨ ਲੱਗ ਜਾਣਾ ਵੀ ਤਨਾਅਗ੍ਰਸਤ ਮਨ ਦੀ ਨਿਸ਼ਾਨੀ ਹੈ। ਮਨੁੱਖ ਕਿਸੇ ਅਦਿੱਖ ਹਾਲਤ ਤੋਂ ਪ੍ਰਭਾਵਤ ਹੋ ਕੇ ਵਕਤੀ ਛੁਟਕਾਰਾ ਪਾਉਣ ਲਈ ਨਸ਼ੇ ਕਰਨ ਲੱਗਦਾ ਹੈ ਪਰ ਇਸ ਨਾਲ ਕੋਈ ਫਾਇਦਾ ਨਹੀਂ ਹੁੰਦਾ, ਉਲਟਾ ਨੁਕਸਾਨ ਹੁੰਦਾ ਹੈ। ਆਤਮ ਹੱਤਿਆ ਕਰਨ ਵੱਲ ਰੁਚਿਤ ਹੋਣਾ ਜਾਂ ਇਕਦਮ ਨੌਕਰੀ ਤਿਆਗਣ ਲਈ ਤਿਆਰ ਹੋ ਜਾਣਾ ਵੀ ਬਾਹਰੀ ਤੇ ਅੰਦਰੂਨੀ ਤਨਾਅ ਦੀ ਨਿਸ਼ਾਨੀ ਹੈ। ਆਪਣੇ ਵਿਸ਼ਵਾਸ ਤੇ ਭਰੋਸੇਯੋਗਤਾ ਤੋਂ ਯਕੀਨ ਉਠ ਜਾਣਾ ਵੀ ਕਈ ਕਿਸਮ ਦੇ ਦਬਾਵਾਂ ਤੇ ਤਨਾਅ ਦੀ ਨਿਸ਼ਾਨੀ ਹੈ। ਨੀਂਦਰ ਦਾ ਨਾ ਆਉਣਾ ਤੇ ਕਈ ਵਾਰੀ ਲੋੜ ਤੋਂ ਜ਼ਿਆਦਾ ਨੀਂਦਰ ਦਾ ਆਉਣਾ ਵੀ ਤਨਾਅਗ੍ਰਸਤ ਹੋਣ ਦੀ ਨਿਸ਼ਾਨੀ ਹੈÐ ਤੇ ਇਨ੍ਹਾਂ ਸਾਰੀਆਂ ਮੁਸ਼ਕਿਲਾਂ ਤੋਂ ਛੁਟਕਾਰਾ ਪਾਇਆ ਜਾ ਸਕਦਾ ਹੈ। ਇਹ ਸਾਰੇ ਮਨੋਰੋਗ ਹਨ, ਜਿਨ੍ਹਾਂ ਦੀ ਇਲਾਜ ਹੋ ਸਕਦਾ ਹੈ ਤੇ ਇਸ ਲਈ ਕਿਸੇ ਵੀ ਮਨੋਚਿਕਿਤਸਕ ਕੋਲ ਜਾਣ ਦੀ ਲੋੜ ਹੈ ਤੇ ਅਜਿਹੀਆਂ ਨਿਸ਼ਾਨੀਆਂ ਪੈਦਾ ਹੋਣ ਨਾਲ ਹੀ ਮਨੋਰੋਗਾਂ ਦੇ ਮਨੋਵਿਗਿਆਨਕ ਡਾਕਟਰਾਂ ਕੋਲ ਜਾਣਾ ਚਾਹੀਦਾ ਹੈ ਤੇ ਇਲਾਜ ਕਰਵਾਉਣਾ ਚਾਹੀਦਾ ਹੈ। ਸੈਮੀਨਾਰ ਦੀ ਸਮਾਪਤੀ ਉੱਤੇ ਹਾਜ਼ਰ ਸੰਗਤਾਂ ਨੇ ਡਾਕਟਰ ਸ਼ਿਲਪਾ ਤੇ ਡਾਕਟਰ ਲੋਹਾਨ ਕੋਲੋਂ ਕਈ ਕਿਸਮ ਦੇ ਸੁਆਲ ਪੁੱਛੇ, ਜਿਨ੍ਹਾਂ ਦੇ ਉਨ੍ਹਾਂ ਤੱਸਲੀਬਖਸ਼ ਉਤਰ ਦਿੱਤੇ। ਭਾਈ ਕਸ਼ਮੀਰ ਸਿੰਘ ਸ਼ਾਹੀ ਨੇ ਦੋਹਾਂ ਡਾਕਟਰਾਂ ਤੇ ਸੰਗਤਾਂ ਦਾ ਸੈਮੀਨਾਰ ਵਿਚ ਪਹੁੰਚਣ ਲਈ ਧੰਨਵਾਦ ਕੀਤਾ ਤੇ ਦੱਸਿਆ ਕਿ ਅਗਲੇ ਮਹੀਨੇ ਫਿਰ ਮਨ ਦੀਆਂ ਬੀਮਾਰੀਆਂ ਬਾਰੇ ਇਕ ਹੋਰ ਸ਼ਾਨਦਾਰ ਸੈਮੀਨਾਰ ਕਰਵਾਇਆ ਜਾਵੇਗਾ।
