ਵਿਰਸੇ ‘ਚ ਮਿਲਣ ਵਾਲੀਆਂ ਚੁਣੌਤੀਆਂ ਨਾਲ ਕਾਰਗਰ ਢੰਗ ਨਾਲ ਨਜਿੱਠਿਆ ਜਾਵੇਗਾ : ਕਮਲਾ ਹੈਰਿਸ

231
ਅਮਰੀਕਾ ਦੇ ਰਾਸ਼ਟਰਪਤੀ ਚੁਣੇ ਜੋਅ ਬਾਇਡਨ ਤੇ ਉਪ ਰਾਸ਼ਟਰਪਤੀ ਚੁਣੀ ਕਮਲਾ ਹੈਰਿਸ ਵਿਲਮਿੰਗਟਨ ਵਿਚ ਕੌਮੀ ਸੁਰੱਖਿਆ ਅਤੇ ਵਿਦੇਸ਼ ਨੀਤੀ ਘਾੜਿਆਂ ਦੀਆਂ ਨਿਯੁਕਤੀਆਂ ਅਤੇ ਨਾਮਜ਼ਦਗੀਆਂ ਦਾ ਐਲਾਨ ਕਰਦੇ ਹੋਏ।
Share

ਕਿਹਾ: ਅਮਰੀਕੀ ਸਾਖ ਬਹਾਲ ਕਰਨ ਲਈ ਘਰੇਲੂ ਚੁਣੌਤੀਆਂ ਦਾ ਟਾਕਰਾ ਜ਼ਰੂਰੀ
ਵਾਸ਼ਿੰਗਟਨ, 26 ਨਵੰਬਰ (ਪੰਜਾਬ ਮੇਲ)-ਅਮਰੀਕਾ ਦੀ ਉਪ ਰਾਸ਼ਟਰਪਤੀ ਬਣਨ ਜਾ ਰਹੀ ਕਮਲਾ ਹੈਰਿਸ ਨੇ ਕਿਹਾ ਕਿ ਵ੍ਹਾਈਟ ਹਾਊਸ ਵਿਚ ਦਾਖ਼ਲੇ ਮਗਰੋਂ ਉਨ੍ਹਾਂ ਨੂੰ ਕਈ ਸਮੱਸਿਆਵਾਂ ਵਿਰਸੇ ਵਿਚ ਹੀ ਮਿਲਣਗੀਆਂ। ਹੈਰਿਸ ਨੇ ਕਿਹਾ ਕਿ ਇਨ੍ਹਾਂ ਘਰੇਲੂ ਚੁਣੌਤੀਆਂ ਤੋਂ ਪਾਰ ਪਾ ਕੇ ਹੀ ਆਲਮੀ ਪੱਧਰ ‘ਤੇ ਅਮਰੀਕਾ ਦੀ ਅਗਵਾਈ ਨੂੰ ਬਹਾਲ ਕੀਤਾ ਜਾ ਸਕੇਗਾ।
ਕਮਲਾ ਹੈਰਿਸ (56) ਨੇ ਕਿਹਾ ਕਿ ਰਾਸ਼ਟਰਪਤੀ ਬਣਨ ਜਾ ਰਹੇ ਬਾਈਡਨ ਤੇ ਉਹ ਲੰਮੇ ਸਮੇਂ ਤੋਂ ਜਾਣਦੇ ਹਨ ਕਿ ਜਦੋਂ ਉਹ ਚੁਣੇ ਜਾਣਗੇ ਤਾਂ ਬਹੁਤ ਮੁਸ਼ਕਲਾਂ ਪਿੱਛਿਓਂ ਹੀ ਮਿਲਣਗੀਆਂ। ਰਾਸ਼ਟਰਪਤੀ ਚੁਣੇ ਗਏ ਜੋਅ ਬਾਇਡਨ ਨੇ ਵਿਲਮਿੰਗਟਨ, ਡੈਲਾਵੇਅਰ ‘ਚ ਆਪਣੀ ਕੌਮੀ ਸੁਰੱਖਿਆ ਟੀਮ ਦਾ ਐਲਾਨ ਕਰ ਦਿੱਤਾ ਹੈ। ਹੈਰਿਸ ਨੇ ਕਿਹਾ ਕਿ ਪਹਿਲੀ ਚੁਣੌਤੀ ਮਹਾਮਾਰੀ ਉਤੇ ਕਾਬੂ ਪਾਉਣਾ ਹੈ। ਇਸ ਤੋਂ ਬਾਅਦ ਅਰਥਵਿਵਸਥਾ ਨੂੰ ਜ਼ਿੰਮੇਵਾਰੀ ਨਾਲ ਖੋਲ੍ਹਣਾ ਵੀ ਬੇਹੱਦ ਜ਼ਰੂਰੀ ਹੈ। ਕਮਲਾ ਹੈਰਿਸ ਨੇ ਕਿਹਾ ਕਿ ਉਹ ਅਮਰੀਕਾ ਦੇ ਭਾਈਵਾਲਾਂ ਨੂੰ ਨਵੇਂ ਸਿਰਿਓਂ ਚੁਣਨ ਤੇ ਮੁੜ ਜੋੜਨ ਲਈ ਤਿਆਰ ਹਨ। ਉਨ੍ਹਾਂ ਕਿਹਾ ਕਿ ਕੌਮੀ ਸੁਰੱਖਿਆ ਤੇ ਵਿਦੇਸ਼ ਨੀਤੀ ਨਾਲ ਜੁੜੀਆਂ ਸੰਸਥਾਵਾਂ ਨੂੰ ਮਜ਼ਬੂਤ ਕੀਤਾ ਜਾਵੇਗਾ। ਜਲਵਾਯੂ ਤਬਦੀਲੀ ਦੇ ਮੁੱਦੇ ‘ਤੇ ਤੁਰੰਤ ਕਾਰਵਾਈ ਕਰਨਾ ਵੀ ਤਰਜੀਹ ਹੋਵੇਗੀ।
ਬਾਇਡਨ ਨੇ ਮੰਗਲਵਾਰ ਨੂੰ ਐਂਥਨੀ ਬਲਿੰਕਨ ਨੂੰ ਆਪਣਾ ਵਿਦੇਸ਼ ਮੰਤਰੀ ਬਣਾਉਣ ਦਾ ਐਲਾਨ ਕੀਤਾ ਹੈ। ਐਵਰਿਲ ਹੇਨਸ ਨੂੰ ਕੌਮੀ ਇੰਟੈਲੀਜੈਂਸ ਦਾ ਡਾਇਰੈਕਟਰ ਨਿਯੁਕਤ ਕੀਤਾ ਜਾਵੇਗਾ। ਜੈਕ ਸੁਲੀਵਨ ਨੂੰ ਆਪਣਾ ਕੌਮੀ ਸੁਰੱਖਿਆ ਸਲਾਹਕਾਰ ਨਿਯੁਕਤ ਕਰਨ ਤੋਂ ਬਾਅਦ ਬਾਇਡਨ ਨੇ ਕਿਹਾ ਹੈ ਕਿ ਜੈਕ ਵਰਗਾ ਸਿਆਣਾ ਪ੍ਰਸ਼ਾਸਕ ਪੀੜ੍ਹੀ ਵਿਚ ਕਿਤੇ ਇਕ ਵਾਰ ਪੈਦਾ ਹੁੰਦਾ ਹੈ। ਉਸ ਕੋਲ ਦੁਨੀਆਂ ਦੀ ਇਸ ਸਭ ਤੋਂ ਸਖ਼ਤ ਨੌਕਰੀ ਲਈ ਲੋੜੀਂਦਾ ਤਜਰਬਾ ਤੇ ਰਵੱਈਆ ਹੈ। ਸੁਲੀਵਨ ਦੀ ਉਮਰ 43 ਸਾਲ ਹੈ ਤੇ ਦਹਾਕਿਆਂ ਬਾਅਦ ਐਨੀ ਘੱਟ ਉਮਰ ਦਾ ਸਲਾਹਕਾਰ ਨਿਯੁਕਤ ਕੀਤਾ ਗਿਆ ਹੈ। ਸੁਲੀਵਨ ਪਹਿਲਾਂ ਵੀ ਬਾਇਡਨ ਤੇ ਹਿਲੇਰੀ ਕਲਿੰਟਨ ਨਾਲ ਕੰਮ ਕਰ ਚੁੱਕੇ ਹਨ। ਈਰਾਨ ਪ੍ਰਮਾਣੂ ਸੌਦੇ, ਗਾਜ਼ਾ ਗੋਲੀਬੰਦੀ (2012) ਤੇ ਏਸ਼ੀਆ-ਪ੍ਰਸ਼ਾਂਤ ਖਿੱਤੇ ਦੀ ਅਮਰੀਕੀ ਰਣਨੀਤੀ ‘ਚ ਸੁਲੀਵਨ ਅਹਿਮ ਭੂਮਿਕਾ ਨਿਭਾ ਚੁੱਕੇ ਹਨ।


Share