ਪਾਕਿਸਤਾਨ ਦੇ ਸਾਬਕਾ ਪ੍ਰਧਾਨ ਮੰਤਰੀ ਗਿਲਾਨੀ ਨੇ ਸੈਨੇਟ ਚੋਣਾਂ ‘ਚ ਇਮਰਾਨ ਦੇ ਮੰਤਰੀ ਨੂੰ ਹਰਾਇਆ

65
Share

ਪਾਕਿਸਤਾਨ, 5 ਮਾਰਚ (ਪੰਜਾਬ ਮੇਲ)- ਪਾਕਿਸਤਾਨ ਦੇ ਵਿੱਤ ਮੰਤਰੀ ਅਬਦੁੱਲ ਹਫੀਜ਼ ਸ਼ੇਖ ਨੂੰ ਮਹੱਤਵਪੂਰਨ ਸੈਨੇਟ ਚੋਣਾਂ ‘ਚ ਸਾਬਕਾ ਪ੍ਰਧਾਨ ਮੰਤਰੀ ਯੂਸਫ ਰਜਾ ਗਿਲਾਨੀ ਨੇ ਹਰਾ ਦਿੱਤਾ। ਇਸ ਨਤੀਜੇ ਨੂੰ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਲਈ ਇਕ ਵੱਡਾ ਝਟਕਾ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਉਨ੍ਹਾਂ ਨੇ ਵਿਅਕਤੀਗਤ ਰੂਪ ਨਾਲ ਮੰਤਰੀ ਮੰਡਲ ਦੇ ਆਪਣੇ ਸਹਿਯੋਗੀ ਲਈ ਪ੍ਰਚਾਰ ਕੀਤਾ ਸੀ। 

ਪਾਕਿਸਤਾਨ ਚੋਣ ਕਮਿਸ਼ਨ (ਈ. ਸੀ. ਪੀ.) ਨੇ ਐਲਾਨ ਕੀਤਾ ਕਿ- ਯੂਸਫ ਰਜਾ ਗਿਲਾਨੀ ਨੂੰ 169 ਵੋਟਾਂ ਮਿਲੀਆਂ ਜਦਕਿ ਸ਼ੇਖ ਨੂੰ 164 ਵੋਟਾਂ ਮਿਲੀਆਂ । ਸੱਤ ਵੋਟਾਂ ਖਾਰਿਜ਼ ਹੋਈਆਂ। ਕੁੱਲ ਵੋਟਾਂ ਦੀ ਗਿਣਤੀ 340 ਸੀ। ਗਿਆਰਾਂ ਵਿਰੋਧੀ ਪਾਰਟੀਆਂ ਦੇ ਇਕ ਗਠਜੋੜ ਪਾਕਿਸਤਾਨ ਡੇਮੋਕ੍ਰੇਟਿਕ ਮੂਵਮੈਂਟ (ਪੀ. ਡੀ. ਐੱਮ.) ਨੇ ਗਿਲਾਨੀ ਦਾ ਸਮਰਥਨ ਕੀਤਾ।

ਇਸ ਤੋਂ ਇਲਾਵਾ ਪਾਕਿਸਤਾਨ ਮੁਸਲਿਮ ਲੀਗ (ਨਵਾਜ਼) ਤੇ ਪਾਕਿਸਤਾਨ ਪੀਪਲਜ਼ ਪਾਰਟੀ ਨੇ ਵੀ ਗਿਲਾਨੀ ਨੂੰ ਸਮਰਥਨ ਦਿੱਤਾ। ਦਿਲਚਸਪ ਗੱਲ ਇਹ ਹੈ ਕਿ ਸ਼ੇਖ 2008 ਤੋਂ 2012 ਤੱਕ ਸਾਬਕਾ ਪ੍ਰਧਾਨ ਮੰਤਰੀ ਗਿਲਾਨੀ ਦੇ ਕਾਰਜਕਾਲ ਦੌਰਾਨ ਉਸਦੇ ਮੰਤਰੀ ਮੰਡਲ ‘ਚ ਮੰਤਰੀ ਸਨ।


Share