ਨਿਊਯਾਰਕ ਦੇ ਚਿੜੀਆਘਰ ‘ਚ ਕੋਰੋਨਾਵਾਇਰਸ ਪਾਜ਼ੀਟਿਵ ਪਾਈ ਗਈ ਬਾਘਿਨ!

149
Share

ਜਾਨਵਰਾਂ ‘ਚ ਵਾਇਰਸ ਮਿਲਣ ਦਾ ਵਿਸ਼ਵ ‘ਚ ਸਭ ਤੋਂ ਪਹਿਲਾ ਮਾਮਲਾ
ਵਾਸ਼ਿੰਗਟਨ, 6 ਅਪ੍ਰੈਲ (ਪੰਜਾਬ ਮੇਲ)- ਨਿਊਯਾਰਕ ਦੇ ਬ੍ਰੋਂਕਸ ਚਿੜੀਆਘਰ ‘ਚ ਇਕ ਚਾਰ ਸਾਲਾ ਨਾਦੀਆ ਨਾਂ ਦੀ ਬਾਘਿਨ ਕੋਰੋਨਾਵਾਇਰਸ ਪਾਜ਼ੀਟਿਵ ਪਾਈ ਗਈ ਹੈ। ਇਹ ਇਸ ਤਰ੍ਹਾਂ ਦਾ ਵਿਸ਼ਵ ਵਿਚ ਪਹਿਲਾ ਮਾਮਲਾ ਹੈ। ਇਸ ਦੀ ਪੁਸ਼ਟੀ ਸੰਯੁਕਤ ਰਾਜ ਅਮਰੀਕਾ ਦੇ ਖੇਤੀਬਾੜੀ ਵਿਭਾਗ ਦੀ ਲੋਵਾ ਨੈਸ਼ਨਲ ਵੈਟਨੇਰੀ ਸਰਵਿਸਜ਼ ਲੈਬੋਰੇਟਰੀ ਨੇ ਕੀਤੀ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਇਸ ਬਾਘਿਨ ਨੂੰ ਕੋਰੋਨਾਵਾਇਰਸ ਚਿੜੀਆਘਰ ਦੇ ਕਿਸੇ ਕਰਮਚਾਰੀ ਤੋਂ ਹੋਇਆ ਹੋਵੇਗਾ ਕਿਉਂਕਿ 16 ਮਾਰਚ ਤੋਂ ਇਹ ਆਮ ਲੋਕਾਂ ਲਈ ਬੰਦ ਹੈ। 5 ਹੋਰ ਜਾਨਵਰਾਂ ਦੇ ਸੈਂਪਲ ਲਏ ਗਏ ਹਨ।  
ਸੰਯੁਕਤ ਰਾਜ ਅਮਰੀਕਾ ਦੇ ਖੇਤੀਬਾੜੀ ਵਿਭਾਗ (ਯੂ.ਐੱਸ.ਡੀ.ਏ.) ਦੀ ਰਾਸ਼ਟਰੀ ਵੈਟਨੇਰੀ ਸਰਵਿਸਿਜ਼ ਲੈਬੋਰੇਟਰੀ ਦਾ ਕਹਿਣਾ ਹੈ ਕਿ ਚਿੜੀਆਘਰ ਦੇ ਕਈ ਜਾਨਵਰਾਂ ਵਿਚ ਸਾਹ ਲੈਣ ਸਬੰਧੀ ਬੀਮਾਰੀ ਦੇ ਲੱਛਣ ਦਿਸਣ ‘ਤੇ ਸੈਂਪਲ ਲਏ ਗਏ ਸਨ, ਜਿਸ ‘ਚ ਬਾਘਿਨ ਦੀ ਰਿਪੋਰਟ ਪਾਜ਼ੀਟਿਵ ਆਈ ਹੈ। ਚਿੜੀਆਘਰ ਵਲੋਂ ਜਾਰੀ ਸੂਚਨਾ ਦੇ ਆਧਾਰ ‘ਤੇ ਬਾਘਿਨ ਦੀ ਭੈਣ ਦੇ ਇਲਾਵਾ 3 ਹੋਰ ਅਫਰੀਕੀ ਸ਼ੇਰਾਂ ਨੂੰ ਸੁੱਕੀ ਖੰਘ ਸੀ ਅਤੇ ਉਮੀਦ ਹੈ ਕਿ ਉਹ ਜਲਦੀ ਠੀਕ ਹੋ ਜਾਣਗੇ। ਹਾਲਾਂਕਿ ਹੋਰ ਜਾਨਵਰਾਂ ਵਿਚ ਇਸ ਦੇ ਲੱਛਣ ਨਹੀਂ ਦਿਖਾਈ ਦਿੱਤੇ।
ਚਿੜੀਆਘਰ ਨੇ ਕਿਹਾ ਕਿ ਇਹ ਪਤਾ ਨਹੀਂ ਹੈ ਕਿ ਬਾਘਾਂ ਅਤੇ ਸ਼ੇਰ ਵਰਗੇ ਜਾਨਵਰਾਂ ‘ਚ ਵਾਇਰਸ ਕਿਵੇਂ ਫੈਲਦਾ ਹੈ ਕਿਉਂਕਿ ਵੱਖ-ਵੱਖ ਨਸਲਾਂ ਨਵੇਂ ਇਨਫੈਕਸ਼ਨ ਪ੍ਰਤੀ ਵੱਖੋ-ਵੱਖਰੀ ਪ੍ਰਤੀਕ੍ਰਿਆ ਕਰ ਸਕਦੀਆਂ ਹਨ ਪਰ ਸਾਰੇ ਜਾਨਵਰਾਂ ਦੀ ਨਿਗਰਾਨੀ ਨਜ਼ਦੀਕੀ ਨਾਲ ਕੀਤੀ ਜਾਵੇਗੀ।
ਵਿਭਾਗ ਨੇ ਇਕ ਬਿਆਨ ‘ਚ ਕਿਹਾ ਕਿ ਕੋਵਿਡ-19 ਨਾਲ ਬੀਮਾਰ ਕਿਸੇ ਵੀ ਵਿਅਕਤੀ ਨੂੰ ਪਾਲਤੂ ਜਾਨਵਰਾਂ ਦੇ ਨਜ਼ਦੀਕ ਨਹੀਂ ਜਾਣਾ ਚਾਹੀਦਾ। ਜਾਨਵਰਾਂ ਨਾਲ ਸੰਪਰਕ ਨੂੰ ਸੀਮਤ ਕਰਨਾ ਚਾਹੀਦਾ ਹੈ। ਹਾਲਾਂਕਿ ਸੰਯੁਕਤ ਰਾਜ ਅਮਰੀਕਾ ‘ਚ ਕੋਵਿਡ-19 ਨਾਲ ਪਾਲਤੂ ਜਾਨਵਰਾਂ ਦੇ ਬੀਮਾਰ ਹੋਣ ਦੀਆਂ ਖ਼ਬਰਾਂ ਨਹੀਂ ਮਿਲੀਆਂ ਹਨ ਪਰ ਅਜੇ ਵੀ ਇਹ ਸਿਫਾਰਸ਼ ਕੀਤੀ ਜਾਂਦੀ ਹੈ ਕਿ ਕੋਵਿਡ-19 ਨਾਲ ਬੀਮਾਰ ਲੋਕ ਵਾਇਰਸ ਬਾਰੇ ਵਧੇਰੇ ਜਾਣਕਾਰੀ ਹੋਣ ਤੱਕ ਜਾਨਵਰਾਂ ਨਾਲ ਸੰਪਰਕ ਸੀਮਿਤ ਰੱਖਣ। ਜੇਕਰ ਕਿਸੇ ਬੀਮਾਰ ਵਿਅਕਤੀ ਨੂੰ ਲਾਜ਼ਮੀ ਤੌਰ ‘ਤੇ ਕਿਸੇ ਪਾਲਤੂ ਜਾਨਵਰ ਦੀ ਦੇਖਭਾਲ ਕਰਨੀ ਪੈਂਦੀ ਹੈ, ਤਾਂ ਉਸ ਨੂੰ ਆਪਣੇ ਹੱਥ ਧੋਣੇ ਚਾਹੀਦੇ ਹਨ।


Share