PUNJABMAILUSA.COM

ਕੋਲੰਬੋ, 6 ਅਗਸਤ (ਪੰਜਾਬ ਮੇਲ)- ਭਾਰਤ ਅਤੇ ਸ਼੍ਰੀਲੰਕਾ ਦਰਮਿਆਨ ਤਿੰਨ ਟੈਸਟ ਮੈਚਾਂ ਦੀ ਸੀਰੀਜ਼ ਦਾ ਦੂਜਾ ਟੈਸਟ ਕੋਲੰਬੋ ਵਿੱਚ ਖੇਡਿਆ ਜਾ ਰਿਹਾ ਹੈ। ਭਾਰਤੀ ਟੀਮ ਦੇ ਪਹਿਲੇ ਪਾਰੀ ਵਿੱਚ ਬਣਾਏ ਗਏ 622 ਦੌੜਾਂ ਦੇ ਵਿਸ਼ਾਲ ਸਕੋਰ ਦੇ ਜਵਾਬ ਵਿੱਚ ਸ਼੍ਰੀਲੰਕਾ ਦੀ ਟੀਮ ਪਹਿਲੀ ਪਾਰੀ ਵਿੱਚ 183 ਦੌੜਾਂ ਉੱਤੇ ਹੀ ਢੇਰ ਹੋ ਗਈ। ਸ਼੍ਰੀਲੰਕਾ ਫਾਲੋਆਨ ਵੀ ਨਹੀਂ ਬਚਾ ਪਾਈ। ਇਸਦੇ ਬਾਅਦ ਫਾਲੋਆਨ ਖੇਡਣ ਉਤਰੀ ਸ਼੍ਰੀਲੰਕਾਈ ਟੀਮ ਨੇ ਦੂਜੀ ਪਾਰੀ ਵਿੱਚ 386 ਦੌੜਾਂ ਉੱਤੇ ਆਲ-ਆਊਟ ਹੋ ਗਈ। ਇਸ ਤਰ੍ਹਾਂ ਭਾਰਤ ਨੇ ਕੋਲੰਬੋ ਟੈਸਟ ਦੇ ਚੌਥੇ ਦਿਨ ਸ਼੍ਰੀਲੰਕਾ ਨੂੰ ਇਕ ਪਾਰੀ ਅਤੇ 53 ਦੌਡ਼ਾਂ ਨਾਲ ਢੇਰ ਕਰ ਕੇ ਮੈਚ ਅਤੇ ਸੀਰੀਜ਼ ਦੋਨੋਂ ਹੀ ਆਪਣੇ ਨਾ ਕਰ ਲਏ ਹਨ।
ਸ਼੍ਰੀਲੰਕਾ ਦੀ ਸ਼ੁਰੂਆਤ ਬੇਹੱਦ ਖ਼ਰਾਬ ਰਹੀ ਅਤੇ ਕੇਵਲ 7 ਦੌੜਾਂ ਦੇ ਸਕੋਰ ਉੱਤੇ ਪਹਿਲਾ ਵਿਕਟ ਡਿੱਗ ਗਿਆ। 2.6 ਓਵਰਾਂ ਵਿੱਚ ਉਮੇਸ਼ ਯਾਦਵ ਨੇ ਉਪੁਲ ਥਰੰਗਾ (2) ਨੂੰ ਬੋਲਡ ਕਰਦੇ ਹੋਏ ਦੂਜੀ ਪਾਰੀ ਵਿੱਚ ਸ਼੍ਰੀਲੰਕਾ ਦਾ ਪਹਿਲਾ ਵਿਕਟ ਹਾਸਲ ਕੀਤਾ। 55ਵੇਂ ਓਵਰ ਵਿੱਚ ਹਾਰਦਿਕ ਪੰਡਯਾ ਨੇ ਸ਼੍ਰੀਲੰਕਾ ਨੂੰ ਦੂਜਾ ਝਟਕਾ ਦਿੱਤਾ, ਜਦੋਂ ਉਨ੍ਹਾਂ ਨੇ ਵਧੀਆ ਬੱਲੇਬਾਜ਼ੀ ਕਰ ਰਹੇ ਕੁਸ਼ਲ ਮੇਂਡਿਸ ਨੂੰ ਰਿਧੀਮਾਨ ਸਾਹਾ ਦੇ ਹੱਥੋਂ ਕੈਚ ਕਰਾ ਦਿੱਤਾ। ਕੁਸ਼ਲ ਮੇਂਡਿਸ 110 ਦੌੜਾਂ ਬਣਾਕੇ ਆਊਟ ਹੋਏ। ਪੁਸ਼ਪਾਕਾਰਾ ਦੇ ਰੂਪ ‘ਚ ਸ਼੍ਰੀਲੰਕਾ ਨੂੰ 4 ਝਟਕਾ ਲੱਗਾ। ਉਨ੍ਹਾਂ ਤੋਂ ਬਾਅਦ ਚਾਂਦੀਮਲ ਵੀ ਕੁਝ ਖਾਸ ਨਾ ਕਰ ਸਕੇ ਤੇ 2 ਦੌੜਾਂ ਬਣਾ ਕੇ ਚਲਦੇ ਬਣੇ। ਸ਼੍ਰੀਲੰਕਾ ਦੇ ਸਲਾਮੀ ਬੱਲੇਬਾਜ਼ ਦਿਮੁਥ ਕਰੁਣਾਰਤਨੇ (141) ਨੇ ਟੀਮ ਦੇ ਸਕੋਰ ਨੂੰ ਅੱਗੇ ਵਧਾਉਂਦੇ ਹੋਏ ਆਪਣਾ ਸੈਂਕੜਾ ਪੂਰਾ ਕੀਤਾ। ਉਨ੍ਹਾਂ ਨੂੰ ਜਡੇਜਾ ਨੇ ਆਪਣੇ ਜਾਲ ‘ਚ ਫਸਾਇਆ ਤੇ ਰਹਾਨੇ ਦੇ ਹੱਥੋਂ ਕੈਚ ਕਰਵਾ ਕੇ ਪੈਵੇਲੀਅਨ ਭੇਜਿਆ। ਉਨ੍ਹਾਂ ਤੋਂ ਬਾਅਦ ਕੋਈ ਵੀ ਖਿਡਾਰੀ ਭਾਰਤੀ ਸਪਿਨ ਅਟੈਕ ਅੱਗੇ ਟਿਕ ਨਾ ਸਕਿਆ।
ਦੂਜੀ ਪਾਰੀ ਦੌਰਾਨ ਭਾਰਤੀ ਟੀਮ ਵਲੋਂ ਉਮੇਸ਼ ਜਾਦਵ ਇਕ, ਅਸ਼ਿਵਨ 2, ਹਾਰਿਦਕ ਪੰਡਯਾ 2 ਨੇ ਵਿਕਟਂ ਹਾਸਲ ਕੀਤੀਆਂ। ਜਡੇਜਾ ਨੇ ਆਪਣੀ ਸਪਿਨ ਦਾ ਜਾਦੂ ਦਿਖਾਉਂਦੇ ਹੋਏ 5 ਵਿਕਟਾਂ ਹਾਸਲ ਕੀਤੀਆਂ।
ਭਾਰਤ ਨੇ ਸ਼੍ਰੀਲੰਕਾ ਨੂੰ ਦਿੱਤਾ ਫਾਲੋਆਨ
ਭਾਰਤੀ ਟੀਮ ਨੇ ਆਪਣੀ ਪਹਿਲੀ ਪਾਰੀ ਵਿੱਚ 9 ਵਿਕਟਾਂ ਗੁਆ ਕੇ 622 ਦੌੜਾਂ ਬਣਾਈਆਂ ਸਨ। ਇਸ ਦੇ ਨਾਲ ਹੀ ਵਿਰਾਟ ਕੋਹਲੀ ਨੇ ਪਾਰੀ ਘੋਸ਼ਿਤ ਕਰ ਦਿੱਤੀ। ਭਾਰਤ ਦੇ ਵੱਡੇ ਸਕੋਰ ਦੇ ਜਵਾਬ ਵਿੱਚ ਬੱਲੇਬਾਜੀ ਕਰਨ ਉਤਰੀ ਸ਼੍ਰੀਲੰਕਾ ਦੀ ਟੀਮ 49.4 ਓਵਰਾਂ ਵਿੱਚ 183 ਦੌੜਾਂ ਉੱਤੇ ਹੀ ਢੇਰ ਹੋ ਗਈ। ਸ਼੍ਰੀਲੰਕਾ ਦੀ ਟੀਮ ਫਾਲੋਆਨ ਵੀ ਨਹੀਂ ਬਚਾ ਪਾਈ, ਜਿਸਦੇ ਬਾਅਦ ਉਨ੍ਹਾਂ ਨੂੰ ਦੁਬਾਰਾ ਬੱਲੇਬਾਜੀ ਲਈ ਉਤਰਨਾ ਪਿਆ। ਪਹਿਲੀ ਪਾਰੀ ਦੇ ਆਧਾਰ ਉੱਤੇ ਭਾਰਤ ਨੂੰ 439 ਦੌੜਾਂ ਦੀ ਲੀਡ ਹਾਸਲ ਹੋਈ। ਭਾਰਤ ਵਲੋਂ ਅਸ਼ਵਿਨ ਨੇ ਸ਼੍ਰੀਲੰਕਾਈ ਬੱਲੇਬਾਜਾਂ ਉੱਤੇ ਆਪਣਾ ਕਹਿਰ ਬਰਸਾਇਆ। ਅਸ਼ਵਿਨ ਨੇ 5 ਵਿਕਟਾਂ ਲਈਆਂ। ਪਹਿਲੀ ਪਾਰੀ ਵਿੱਚ ਅਸ਼ਵਿਨ ਦੇ ਇਲਾਵਾ ਜਡੇਜਾ ਅਤੇ ਸ਼ਮੀ ਨੇ 2-2 ਵਿਕਟ ਹਾਸਲ ਕੀਤੇ ਸਨ।