ਕੋਰੋਨਾ ਦਾ ਕਹਿਰ : ਭਾਰਤ ‘ਚ ਰੋਜ਼ਾਨਾ ਲੱਖ ਕੇਸ ਆਉਣ ਲੱਗੇ ਸਾਹਮਣੇ

92
Share

ਨਵੀਂ ਦਿੱਲੀ, 13 ਸਤੰਬਰ (ਪੰਜਾਬ ਮੇਲ)- ਭਾਰਤ ਵਿੱਚ ਰੋਜ਼ਾਨਾ ਕੋਰੋਨਾ ਦੇ ਕੇਸ ਇੱਕ ਲੱਖ ਤੱਕ ਆਉਣੇ ਸ਼ੁਰੂ ਹੋ ਗਏ ਹਨ। ਇਹ ਗਿਣਤੀ ਲਗਾਤਾਰ ਵਧਦੀ ਜਾ ਰਹੀ ਹੈ। ਸਿਹਤ ਮਾਹਿਰਾਂ ਦਾ ਮੰਨਣਾ ਹੈ ਕਿ ਅਗਲੇ ਕੁਝ ਸਮੇਂ ਵਿੱਚ ਕੋਰੋਨਾ ਦਾ ਕਹਿਰ ਹੋਰ ਵਧੇਗਾ। ਇਸ ਦਾ ਕਾਰਨ ਇਹ ਹੈ ਕਿ ਲੌਕਡਾਊਨ ਵਿੱਚ ਢਿੱਲ ਕਰਕੇ ਲੋਕ ਵੀ ਬੇਪ੍ਰਵਾਹ ਹੋ ਰਹੇ ਹਨ।

ਸਰਕਾਰੀ ਅੰਕੜਿਆਂ ਮੁਤਾਬਕ ਪਿਛਲੇ 24 ਘੰਟਿਆਂ ਵਿੱਚ ਦੇਸ਼ ਅੰਦਰ 94,372 ਨਵੇਂ ਕੇਸ ਸਾਹਮਣੇ ਆਏ ਹਨ। ਇਸ ਤੋਂ ਪਹਿਲਾਂ 11 ਸਤੰਬਰ ਨੂੰ ਰਿਕਾਰਡ 97,570 ਇਨਫੈਕਸ਼ਨ ਕੇਸ ਦਰਜ ਕੀਤੇ ਗਏ ਸਨ। ਇਸ ਦੌਰਾਨ ਪਿਛਲੇ 24 ਘੰਟਿਆਂ ਵਿੱਚ 1114 ਲੋਕਾਂ ਨੇ ਆਪਣੀਆਂ ਜਾਨਾਂ ਗੁਆ ਦਿੱਤੀਆਂ। ਦੋ ਸਤੰਬਰ ਤੋਂ ਦੇਸ਼ ਵਿੱਚ ਹਰ ਦਿਨ ਇੱਕ ਹਜ਼ਾਰ ਤੋਂ ਵੱਧ ਲੋਕ ਮਰ ਰਹੇ ਹਨ। ਚੰਗੀ ਖ਼ਬਰ ਇਹ ਹੈ ਕਿ 24 ਘੰਟਿਆਂ ਵਿੱਚ 78,399 ਮਰੀਜ਼ ਵੀ ਠੀਕ ਹੋ ਗਏ ਹਨ।

ਸਿਹਤ ਮੰਤਰਾਲੇ ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ ਦੇਸ਼ ਵਿੱਚ ਕੋਰੋਨਾ ਪੀੜਤਾਂ ਦੀ ਕੁੱਲ ਗਿਣਤੀ ਹੁਣ 47 ਲੱਖ 54 ਹਜ਼ਾਰ ਹੋ ਗਈ ਹੈ। ਇਨ੍ਹਾਂ ਵਿੱਚੋਂ 78,586 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਸਰਗਰਮ ਮਾਮਲਿਆਂ ਦੀ ਗਿਣਤੀ 9 ਲੱਖ 73 ਹਜ਼ਾਰ ਹੋ ਗਈ ਹੈ ਤੇ 37 ਲੱਖ ਲੋਕ ਠੀਕ ਹੋਏ ਹਨ।ਸਰਕਾਰੀ ਸੂਤਰਾਂ ਮੁਤਾਬਕ ਸ਼ਨੀਵਾਰ ਨੂੰ ਦੇਸ਼ ਅੰਦਰ ਰਿਕਾਰਡ 97,570 ਨਵੇਂ ਕੋਰੋਨਾ ਪਾਜ਼ੇਟਿਵ ਕੇਸ ਸਾਹਮਣੇ ਆਏ ਸੀ। ਇਸ ਦੌਰਾਨ 1201 ਹੋਰ ਮੌਤਾਂ ਨਾਲ ਮਰਨ ਵਾਲਿਆਂ ਦੀ ਗਿਣਤੀ 77,472 ਹੋ ਗਈ ਸੀ।

ਸਿਹਤ ਮੰਤਰਾਲੇ ਵੱਲੋਂ ਜਾਰੀ ਅੰਕੜਿਆਂ ਮੁਤਾਬਕ ਸ਼ਨੀਵਾਰ ਤੱਕ 36,24,196 ਲੋਕ ਕੋਵਿਡ-19 ਦੀ ਲਾਗ ਤੋਂ ਉਭਰ ਕੇ ਸਿਹਤਯਾਬ ਹੋਣ ਵਿੱਚ ਸਫ਼ਲ ਰਹੇ ਹਨ ਤੇ ਕੌਮੀ ਰਿਕਵਰੀ ਦਰ 77.77 ਫੀਸਦ ਹੈ। ਉਧਰ ਕੁੱਲ ਸਰਗਰਮ ਕੇਸਾਂ ਦੀ ਗਿਣਤੀ 9,58,316 ਹੈ, ਜੋ ਕੁੱਲ ਕੇਸ ਲੋਡ ਦਾ 20.56 ਫੀਸਦ ਬਣਦਾ ਹੈ। ਕੋਵਿਡ-19 ਕੇਸਾਂ ਦੀ ਮੌਤ ਦਰ ਘੱਟ ਕੇ 1.66 ਫੀਸਦ ਰਹਿ ਗਈ ਹੈ।

ਸੱਤ ਅਗਸਤ ਨੂੰ ਕੋਵਿਡ ਕੇਸਾਂ ਦੀ ਗਿਣਤੀ 20 ਲੱਖ ਦੇ ਅੰਕੜੇ ਨੂੰ ਟੱਪੀ ਸੀ, 23 ਅਗਸਤ ਨੂੰ ਇਹ ਅੰਕੜਾ 30 ਲੱਖ ਤੇ 5 ਸਤੰਬਰ ਨੂੰ 40 ਲੱਖ ਨੂੰ ਪਾਰ ਕਰ ਗਿਆ। ਉਂਜ ਅੱਜ ਲਗਾਤਾਰ ਤੀਜਾ ਦਿਨ ਹੈ ਜਦੋਂ 95000 ਤੋਂ ਵੱਧ ਕੇਸ ਸਾਹਮਣੇ ਆਏ ਹਨ। ਭਾਰਤੀ ਮੈਡੀਕਲ ਖੋਜ ਕੌਂਸਲ ਮੁਤਾਬਕ 11 ਸਤੰਬਰ ਤਕ 5,51,89,226 ਨਮੂਨਿਆਂ ਦੀ ਜਾਂਚ ਕੀਤੀ ਜਾ ਚੁੱਕੀ ਹੈ।

ਸ਼ਨੀਵਾਰ ਦੀਆਂ ਰਿਪੋਰਟਾਂ ਮੁਤਾਬਕ 1201 ਮੌਤਾਂ ’ਚੋਂ ਮਹਾਰਾਸ਼ਟਰ ਵਿੱਚ 442, ਕਰਨਾਟਕ 130, ਆਂਧਰਾ ਪ੍ਰਦੇਸ਼ ਤੇ ਤਾਮਿਲਨਾਡੂ ਵਿੱਚ 77-77, ਉੱਤਰ ਪ੍ਰਦੇਸ਼ 76, ਪੰਜਾਬ 63, ਪੱਛਮੀ ਬੰਗਾਲ 57, ਮੱਧ ਪ੍ਰਦੇਸ਼ 30, ਛੱਤੀਸਗੜ੍ਹ 26, ਹਰਿਆਣਾ 25, ਦਿੱਲੀ 21, ਅਸਾਮ ਤੇ ਗੁਜਰਾਤ 16-16, ਝਾਰਖੰਡ ਤੇ ਰਾਜਸਥਾਨ 15-15, ਕੇਰਲਾ ਤੇ ਉੜੀਸਾ 14-14, ਬਿਹਾਰ ਤੇ ਪੁੱਡੂਚੇਰੀ 12-12, ਉੱਤਰਾਖੰਡ 11, ਤਿਲੰਗਾਨਾ 10, ਜੰਮੂ ਤੇ ਕਸ਼ਮੀਰ ਤੇ ਤ੍ਰਿਪੁਰਾ 9-9, ਗੋਆ 8, ਹਿਮਾਚਲ ਪ੍ਰਦੇਸ਼ 5, ਮੇਘਾਲਿਆ 4, ਚੰਡੀਗੜ੍ਹ 3, ਲੱਦਾਖ 2 ਜਦੋਂਕਿ ਅਰੁਣਾਚਲ ਪ੍ਰਦੇਸ਼ ਤੇ ਸਿੱਕਮ ਵਿੱਚ ਇੱਕ-ਇੱਕ ਵਿਅਕਤੀ ਦਮ ਤੋੜ ਗਿਆ।


Share